ەرتەڭ استانا اۆتوبۋستارىندا جولاقى وزگەرەدى: كىم-قانشا تولەيدى؟
بۇعان دەيىن حابارلاعانىمىزداي، «استانا LRT» جانە ەلوردا اكىمدىگى قالالىق جانە قالاماڭى اۆتوبۋستارىنا سارالانعان تاريفتەر ەنگىزۋدى ۇسىنىپ، ونى ءماسليحات دەپۋتاتتارى قولداعان بولاتىن. ونداعى ماقسات - قوعامدىق كولىك سالاسىنداعى كولەڭكەلى اقشا اينالىمىن ءتۇپ تامىرىمەن جويۋ، بيۋجەتكە تۇسىمدەردى مولايتۋ، قالانىڭ كولىك جۇيەسىن ودان ءارى دامىتۋعا كوبىرەك قاراجات ءبولۋ.
2018-جىلدىڭ 10- شىلدەسىندە «استانا اقشامى»، «ۆەچەرنيايا استانا» گازەتتەرىندە جانە استانا اكىمدىگى سايتىندا ءتيىستى قاۋلىنىڭ ءماتىنى جاريالاندى. سونداي-اق تۇرعىندارعا ەلەكتروندىق كارتالاردى ساتىپ الۋعا 21- شىلدەگە دەيىن ۋاقىت بەرىلدى. سەبەبى سارالانعان تاريفتەر قولما-قول جانە قولما-قول اقشاسىز ەلەكتروندىق كارتامەن ەسەپ ايىرىسۋدى قاراستىرادى.
اتاپ ايتقاندا، 21- شىلدەدەن باستاپ قالالىق اۆتوبۋستاردا قولما-قول اقشاسىز ەلەكتروندىق كارتامەن تولەۋ 90 تەڭگەنى قۇرايتىن بولادى. ەلەكتروندى كارتالاردى ساتىپ الىپ ۇلگەرمەگەندەر كوندۋكتورعا قولما-قول اقشامەن 180 تەڭگە تولەيدى.
سونداي-اق جولاۋشىلار مەن باگاجدى قوعامدىق ەكسپرەسس كولىكپەن تاسىمالداۋ - قولما-قول اقشامەن 250 تەڭگەنى قۇراماق (قازىرگى تاريف 150 تەڭگە).
استانا قالاسىنىڭ قالاماڭى قاتىناستارىندا - قولما-قول اقشاسىز ەلەكتروندىق كارتا ارقىلى تولەۋ 1 كيلومەتر ءۇشىن 8,0 تەڭگەگە تەڭ. ال قالاماڭى قاتىناستارىندا قولما-قول اقشامەن ەسەپ ايىرىسۋ 1 كيلومەتر ءۇشىن 11,5 تەڭگە بولادى.
بۇل رەتتە، ەلەكتروندىق كارتانى وقيتىن ۆاليداتورلار جۇمىس ىستەمەي تۇرسا، جولاۋشىلار اۆتوبۋستا تەگىن جۇرۋگە قۇقىلى.
«استانا LRT» باسقارما ءتوراعاسى بەكمىرزا يگەنبەردينوۆ بۇگىن وتكەن باسپا ءسوز ءماسليحاتىندا اتاپ وتكەندەي، تەك سوڭعى ەكى كۇندە 16500 كولىك كارتاسى ساتىلدى. جىل باسىندا كولىك كارتاسىن قولدانۋشىلار %5 بولسا، قازىر %50 اسىپ جىعىلدى.
تاعى اتاپ وتەرلىگى، بۇعان دەيىن جول ءجۇرۋ اقىسىنان بوساتىلعان جەڭىلدىك ساناتتارىنداعى ازاماتتار ءۇشىن جولاۋشىلاردى تاسىمالداۋ ەرەجەلەرى وزگەرىسسىز قالادى.
ەسكە سالايىق، ەلوردالىق زەينەتكەرلەر 2018-جىلدىڭ 1- شىلدەسىنە دەيىن جولاقىدان بوساتاتىن ەلەكتروندىق كارتالار ساتىپ الۋعا مىندەتتەلگەن بولاتىن. كارتانى الىپ ۇلگەرمەگەن زەينەتكەرلەر 1- شىلدەدەن بۇگىنگە دەيىن 90 تەڭگە قولما-قول اقشامەن تولەپ كەلدى. ەرتەڭنەن باستاپ 180 تەڭگە تولەيتىن بولادى.
«اۆتوموبيل كولىگى تۋرالى» ق ر زاڭىنا سايكەس 7 جاستان 15 جاسقا دەيىنگى بالالار ءۇشىن قالالىق جانە قالاماڭى قاتىناستارىندا استانانىڭ قوعامدىق كولىگىمەن ءجۇرۋ تاريفى جولاقىنىڭ تولىق كولەمىنىڭ ەلۋ پايىزىنا تەڭ.