دەنيس تەندى ءولتىردى دەگەن كۇدىكپەن ەكىنشى ادام ىزدەستىرىلىپ جاتىر

الماتى. قازاقپارات - دەنيس تەننىڭ ءولىمى بويىنشا كۇدىكتى ەكىنشى ادام ىزدەستىرىلۋدە، دەپ حابارلايدى قازاقپارات ءتىلشىسى ق ر ءى ءى م باسپا ءسوز قىزمەتىنە سىلتەمە جاساپ.

باسپا ءسوز مالىمەتتەرىنە قاراعاندا، قازىرگى تاڭدا الەۋمەتتىك جەلىلەردە، كۇدىكتىنىڭ بەت-بەينەسىنە قاتىستى مالىمەتتەرى تاراتىلىپ جاتىر.

پوليتسيا 1994-جىلى 23- جەلتوقساندا تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆتى ىزدەستىرىپ جاتىر.

ايتا كەتۋ كەرەك، قىلمىستىق ءىستى تەرگەۋ ءۇشىن تاجىريبەلى تەرگەۋشىلەردەن تەرگەۋ توبى قۇرىلعان بولاتىن.

تەرگەۋ توبىن ق ر ىشكى ىستەر ءمينيسترىنىڭ ورىنباسارى جانات سۇلەيمەنوۆ باسقاردى.

كۇدىكتىلەردىڭ ءبىرى بۇگىن ۇستالدى. ول 24 جاستاعى جامبىل وبلىسىنىڭ تۋماسى قياسوۆ نۇرالى. ول ءوزىنىڭ جاساعان قىلمىسىن مويىندادى.

قايعىلى وقيعا قۇرمانعازى بايسەيىتوۆ كوشەلەرىنىڭ قيىلىسىندا تۇسكى 15:00 دەر شاماسىندا بولعان ەدى.

سپورتشى كولىگىنىڭ ايناسىن ۇرلاپ بارا جاتقان ەكى ادامنىڭ ۇستىنەن تۇسكەن. ەكى ارادا باستالعان جانجالدىڭ ناتيجەسىندە الگى ادامدار دەنيس تەندى پىشاقتاپ كەتكەن.

ايتا كەتۋ كەرەك، كەشە تۇسكى 15:00 دەر شاماسىندا بەلگىلى سپورتشى دەنيس تەن اۋرۋحاناعا پىشاق جاراقاتىمەن تۇسكەن بولاتىن.

دارىگەرلەر كلينيكالىق ولىممەن تۇسكەن سپورتشىنى 2,5 ساعات بويى رەانيماتسيالىق شارالار جاساپ، امان الىپ قالا المادى.

دەنيس تەن كوپ قان جوعالتۋ سەبەپتى كوز جۇمدى.