اقمولادا «ۇلى دالا ەلىنىڭ كيەلى مۇراسى» اكسياسى مارەسىنە جەتتى
كوكشەتاۋداعى «قوعامدىق كەلىسىم» مەكەمەسىنىڭ باسپا ءسوز قىزمەتىنىڭ مالىمەتىنشە، ءبىر اپتاعا جالعاسقان اكسيا بارىسىندا قازاقستان حالقى اسسامبلەياسىنىڭ رەسپۋبليكالىق «جاڭعىرۋ جولى» جاستار قوزعالىسى وبلىستىق شتابىنىڭ مۇشەلەرى ءبىرجان سال، بۇلاندى، بۋراباي اۋداندارىنىڭ كيەلى ورىندارىن ارالاپ كوردى.
اتاپ ايتساق ءبىرجان سال اۋدانىندا ورنالاسقان قوعام اۋىلىنداعى شايمەردەن قوسشىعۇلوۆ اتىنداعى مۇراجايدا، ستەپنياك قالاسىنداعى ءبىرجان سال زيراتى مەموريالدىق كەشەنىندە، بۇلاندى اۋدانىنداعى بالۋان شولاق زيراتىنىڭ كۋلتتىك كەشەنىندە، قاراساي، اعىنتاي باتىرلاردىڭ مەموريالدى كەشەنىندە، ايعانىم، بوتاي كيەلى قونىستارىندا ەكسپەديتسيا جۇرگىزدى.
«اتالعان اكتسيا ەلباسىنىڭ باستاماسىمەن قولعا الىنىپ، قازاقستاندىقتاردىڭ باي مادەني مۇراسىن جانە شىعارماشىلىق الەۋەتىن نىعايتۋعا باعىتتالعان «رۋحاني جاڭعىرۋ» ۇلتتىق سانانى رۋحاني جاڭعىرتۋ مەن جاڭارتۋدىڭ ۇلتتىق يدەياسىن ىسكە اسىرۋدا ناقتىلى قادام بولدى»، - دەيدى ۇيىمداستىرۋشىلار.
اكسيانىڭ سوڭعى كۇنى ايىرتاۋ اۋدانىنداعى ايعانىم قونىسىندا «جاڭعىرۋ جولى» جاستار قوزعالىسى شتابىنىڭ مۇشەلەرى كەلەسى ەستافەتا كەزەڭىن، ونىڭ سيمۆوليكاسى بولىپ تابىلاتىن قازاقستان حالقى اسسامبلەياسىنىڭ تۋىن جانە فوتوالبومىن سولتۇستىك قازاقستاندىق ارىپتەستەرىنە تابىستادى. سونىمەن قاتار، ەستەلىك سىي رەتىندە «قازاقتىڭ باتىرلىق جىرلارى» ءۇش تومدىق كىتابىن تارتۋ ەتتى.