گولوۆكين دەنيس تەن تۋرالى: سەن ماڭگى ءبىزدىڭ ەسىمىزدەسىڭ

استانا. قازاقپارات - WBA (Super) ، WBC جانە IBO تۇجىرىمدارى بويىنشا ورتا سالماقتاعى الەم چەمپيونى گەننادي گولوۆكين مانەرلەپ سىرعاناۋشى دەنيس تەننىڭ قازاسىنا بايلانىستى كوڭىل ايتتى، دەپ حابارلايدى «SPORTINFORM» س ا ا.

گولوۆكين ءوزىنىڭ ينستگرام پاراقشاسىندا دەنيسپەن بىرگە تۇسكەن سۋرەتىن جاريالاپ قىسقا عانا: «سەن ماڭگى ءبىزدىڭ ەسىمىزدەسىڭ...»، - دەپ جازدى.

ايتا كەتەيىك، 19- شىلدە كۇنى الماتىدا قازاقستانعا تانىمال سپورتشىلاردىڭ ءبىرى دەنيس تەن جامباسىنان پىشاقتان جاراقات الدى. دارىگەرلەر قانشاما ارپالىسقانىمەن ونىڭ ءومىرىن امان الىپ قالا المادى. دەنيس تەننىڭ قازاسى بۇكىل قازاقستاندى دۇرلىكتىرگەن قايعىلى وقيعا بولدى. ەلباسى تانىمال سپورتشىنىڭ وتباسىنا كوڭىل ايتتى.