ەۋروپا ليگاسىنداعى «قايرات» پەن «توبىل» جەڭىسىن دەنيس تەنگە ارنادى
«كوكىرەگىمىز ورنى تولماس وكىنىشكە تولدى. سوچيدە وتكەن وليمپيادا ويىندارىنىڭ قولا جۇلدەگەرى، مانەرلەپ سىرعاناۋشى دەنيس تەن 25 جاسىندا قازا بولدى. «قايرات» فۋتبول كلۋبىنىڭ مۇشەلەرى دەنيستىڭ وتباسى مەن تۋىستارىنىڭ قايعىسىنا ورتاقتاسىپ، كوڭىل ايتادى جانە بۇگىنگى جەڭىسىن دەنيستىڭ قۇرمەتىنە ارنايدى. ول ءوزىنىڭ تاباندىلىعى مەن ەڭبەك قورلىعىنىڭ ارقاسىندا قازاقستاندى الەمگە تانىتتى»، - دەلىنگەن «قايرات» كومانداسىنىڭ Instagram پاراقشاسىندا.
«ومىردەن ءوز ءىسىنىڭ حاس شەبەرى وزدى. «توبىل» كومانداسى دەنيس تەننىڭ قايعىلى قازاعا ۇشىراۋىنا بايلانىستى قازاقستاندىقتاردىڭ قايعىسىنا ورتاق. دەنيس تەن مەملەكەتتەر دوستاستىعىنىڭ سيمۆولى ىسپەتتەس ەدى، ول دارىندى سپورتشى، قازاقستاننىڭ ماقتانىشى بولاتىن. قايعىلى جاعداي ءبارىمىزدىڭ دە قابىرعامىزدى قايىستىردى. ءبىز جەڭىسىمىزدى دەنيس تەننىڭ قۇرمەتىنە ارنايمىز»، - دەلىنگەن «توبىل» كومانداسىنىڭ حابارلاماسىندا.
ايتا كەتەيىك، 19- شىلدە كۇنى الماتىدا ەلدەگى ەڭ دارىندى، سپورتسۇيەر قاۋىمعا كەڭىنەن تانىس، تانىمال سپورتشىلاردىڭ ءبىرى دەنيس تەن جامباسىنان پىشاقتان جاراقات الدى. دارىگەرلەر قانشاما ارپالىسقانىمەن ونىڭ ءومىرىن امان الىپ قالا المادى.
دەنيس تەننىڭ قازاسى بۇكىل قازاقستاندى دۇرلىكتىرگەن قايعىلى وقيعا بولدى. ەلباسى تانىمال سپورتشىنىڭ وتباسىنا كوڭىل ايتتى. Qazsport تەلەارناسى وسى وقيعاعا بايلانىستى حابار تاراتۋ كەستەسىن وزگەرتتى. ISU پرەزيدەنتى يان دايكەما دەنيستىڭ قازاسىن جانتۇرشىگەرلىك وقيعا دەپ باعالادى.