ەۋروپا ليگاسى: «ەرتىس» ەۋروكۋبوك ويىندارىنان شىعىپ قالدى

None
None
استانا. قازاقپارات - كەشە، 19- شىلدەدە ەۋروپا ليگاسىنىڭ ءبىرىنشى ىرىكتەۋ كەزەڭىندە پاۆلوداردىڭ «ەرتىسى» ليتۆانىڭ «تراكاي» كلۋبىن قابىلداپ، قارسىلاسىنان 0:1 ەسەبىمەن جەڭىلدى.

وسىنىڭ سالدارىنان ولار ەۋروكۋبوك ويىندارىنان شىعىپ قالدى، دەپ حابارلايدى قازاقپارات ءتىلشىسى.

پاۆلودارلىق ۇجىم اتالمىش قارسىلاسىمەن العاشقى كەزدەسۋىندە 0:0 ەسەبىمەن تەڭ ويناعان ەدى. ولاردىڭ ليتۆادان ولجالى ورالۋ مۇمكىندىگى دە بولعان. ەكىنشى كەزەڭ دە ءدال وسىنداي جاعدايدا وربىگەن ەدى. «ەرتىستىڭ» 86-مينۋتتا گول سوعاتىن مۇمكىندىگى بولدى. تورەشى «تراكاي» قاقپاسىنا پەنالتي بەلگىلەدى. ونى پاۆلودارلىق فۋتبولشى سەرگەي كيسلياك گولعا اينالدىرا المادى. ونىڭ تەپكەن دوبىن «تراكايدىڭ» قاقپاشىسى كەرى قايتاردى. ويىن 0:0 ەسەبىمەن تەڭ اياقتالدى.

سوندىقتان «ەرتىس» ءوز الاڭىندا مىندەتتى تۇردە جەڭىسكە جەتۋى ءتيىس ەدى. وسىنى تۇسىنگەن پاۆلودارلىق فۋتبولشىلار ويىن باستالىسىمەن «تراكاي» كومانداسىنا ماڭىنا لاپ قويدى. دەگەنمەن شابۋىلدى تۇيىندەيتىن مۇمكىندىك بولعان جوق. ەسەسىنە ليتۆالىقتار دا قارىمتا شابۋىلدارعا شىعىپ تۇردى. ولار ءوز دەگەنىنە 21-مينۋتتا جەتتى. «تراكاي» ساپىنان چيجاس سۆيايۋناس مەرگەندىك تانىتتى. وسىلايشا ءوز كومانداسىن العا شىعاردى. بۇل گول «تراكايدى» جارىستىڭ كەلەسى ساتىسىنا شىعۋىنا مۇمكىندىك تۋعىزدى. «ەرتىس» جارىستى جالعاستىرۋى ءۇشىن ەندى كەمىندە ەكى دوپ سوعۋ قاجەتتىلىگى تۋىندادى. وسىنداي ويمەن پاۆلودارلىق فۋتبولشىلار شابۋىلعا كوبىرەك شىعۋعا كوڭىل ءبولدى. دەسە دە بۇل ماقساتتارىنا جەتە الماي جاتتى. «تراكاي» كومانداسى دا قورعانىستا عانا قالۋمەن شەكتەلگەن جوق. وزدەرىنىڭ قايسار ەكەنىن دالەلدەۋگە تىرىستى.

ەكىنشى كەزەڭ دە ءدال وسىنداي كورىنىستە ءوربىپ جاتتى. «ەرتىس» بىردەن-اق شابۋىل شەبىن كۇشەيتتى. دەگەنمەن ولاردىڭ جاساعان شابۋىلى ناتيجەسىز اياقتالىپ جاتتى. پاۆلودارلىق كلۋب جۇيەلى ويىن ورنەگىن كورسەتە العان جوق. «ەرتىس» وسىلايشا جارىس جولىنان شىعىپ قالدى.

ەستەرىڭىزگە سالا كەتەلىك، بۇگىن ەۋروپا ليگاسىنىڭ ءبىرىنشى ىرىكتەۋ كەزەڭىندە الماتىنىڭ «قايراتى» ءوز الاڭىندا اندوررانىڭ «ەنگوردان» كلۋبىن 7:1 ەسەبىمەن تاس- تالقان ەتىپ جەڭدى. ەكى كوماندا اراسىنداعى العاشقى كەزدەسۋ 3:0 ەسەبىمەن «قايراتتىڭ» جەڭىسىمەن اياقتالدى. سونداي-اق، بۇگىن «توبىل» قوستانايدا گرۋزيانىڭ «سامترەديا» كلۋبىن 2:0 ەسەبىمەن تىزە بۇكتىردى. ولاردىڭ اراسىنداعى العاشقى ويىندا 1:0 ەسەبىمەن ءبىزدىڭ كوماندا باسىم ءتۇستى.

كەشە، 18- شىلدەدە چەمپيوندار ليگاسىنىڭ ءبىرىنشى ىرىكتەۋ كەزەڭىندە ەلوردالىق «استانا» كلۋبى سىرت الاڭدا چەرنوگوريانىڭ «سۋتەسكا» كومانداسىن 2:0 ەسەبىمەن جەڭسە، العاشقى كەزدەسۋدە «استانا» 1:0 ەسەبىمەن مىقتىلىعىن تانىتقان بولاتىن.

سوڭعى جاڭالىقتار