دەنيس تەن: مانسابىمدى اياقتار كۇنىم دە الىس ەمەس

الماتى. قازاقپارات - قازاقستاندىق مانەرلەپ سىرعاناۋشى، سوچي وليمپياداسىنىڭ قولا جۇلدەگەرى دەنيس تەن قايعىلى جاعدايدا قازا بولدى.

«قازاقپارات» ح ا ا مارقۇمنىڭ وتباسىنا كوڭىل ايتا وتىرىپ، سايتىمىزعا بەرگەن سوڭعى سۇحباتتارىنىڭ بىرىنەن ءۇزىندى سوزدەرىن ۇسىنادى. تولىق نۇسقاسىن مىنا جەردەن وقۋعا بولادى.

1. «بۇل وتە ۇزاق ۋاقىتقا سوزىلاتىنداي كورىنگەنىمەن، قىسقا ۋاقىت كەزەڭى. مەن قازىر 24 جاستامىن. 20 جىلدان بەرى سپورتتامىن. مانساپتى اياقتار كۇنىم دە الىس ەمەس. سپورتتان قاشان كەتەتىنىمدى بىلمەيمىن، سوندىقتان دا ول جايلى سۇراماڭىز»، - دەگەن ەكەن دەنيس تەن «قازاقپارات» تىلشىسىنە.

2. «ەستەتيكا دەگەن - ءسىزدىڭ بەلگىلى ءبىر ادامعا قاراي بەرگىڭىز كەلەتىنى نەمەسە قىزىعۋشىلىق تۋدىراتىن ەلەمەنتتى كورۋدەن تالمايتىنىڭىز - ءبىراق كورگىڭىز كەلە بەرەتىنى»، - دەگەن دەنيس حالىقتىڭ كوز قۋانىشىنا اينالعان «ەستەت» ەدى...

3. ءسىز سپورتشى رەتىندە ورنىڭىزدى تابا الماۋىڭىز مۇمكىن، ءبىراق تۇلعا رەتىندە قالىپتاسۋ كەرەك.

4. مەن ءوز-وزىمە سىنمەن قارايمىن جانە ءوزىمدى حاريزماشىلمىن دەپ ايتا المايمىن. باعدارلامالارىمدى كورۋ ماعان وتە قيىن، جۇمىسىمدى باعالاۋ كۇردەلى. ارتىقشىلىقتاردان گورى كەمشىلىكتەرى كوزىمە ۇرىپ تۇرادى.

5. تاتيانا اناتوليەۆنا تاراسوۆا ماعان ۇنەمى: «ءبىز قىزمەتتىڭ وزگەرۋىنە بەيىمدەلۋىمىز كەرەك» دەيتىن. «ءۇيدى جينادىڭ با - دەمالعانىڭ سول. قىزمەتتىڭ وزگەرۋى - مىنە، ساۋىعۋ دەگەن سول». ونىڭ بۇل اقىلىنا ءالى دە مويىنسۇنامىن!

6. بالا شاعىمدا مۋزىكانى وقىدىم. مەن ءۇشىن مۋزىكا - ەموتسيالىق كومپونەنت. بۇل - ايتقىم كەلەتىن شاعىن اڭگىمە. جۇرەگىمىزگە قىمبات اندەردىڭ كوبى - ءوزىمىزدىڭ باسىمىزدان وتكەن وقيعالارعا ۇقسايدى.

7. يدەيالاردى شىنايى ىسكە اسىرۋعا بولاتىنىن تۇيسىنگەن كەزىمدە ىشكى داۋىسىما سۇيەندىم.

8. مەن ەشقاشان دەمالعان ەمەسپىن. مەن ءۇشىن دەمالىس - بەلگىلى ءبىر يدەيالاردى جوبالاۋ.

9. مۋزىكا جازعىم كەلەدى. ەگەر مۋزىكا بولماسا، گرافيكالىق ديزايندى قولعا الامىن. ەگەر گرافيكالىق ديزاين باعىنباعان كۇندە، سۋرەتكە تۇسىرۋمەن اينالىسامىن. ەگەر فوتوسۋرەت بولماسا، وندا... العاشقى جەكە موبيلدىك قوسىمشامدى جاسار ەدىم...

10. وتباسى جاۋاپكەرشىلىگىن ارقالاپ جۇرگەن جاندار، باسىندا نەسيەسى بارلار، نەمەسە مۇلدە باسقا وي مازالاپ جۇرگەن جاندار مەنىڭ ونەرىمدى تاماشالاپ، ءلاززات السا دەيمىن.

11. ەشكىمدى تىڭداماڭىز، ىشكى تۇيسىگىڭىزبەن سەزىنىڭىز. ءومىر باسقالار ايتقانداي ەمەس، ودان دا كۇردەلى.

12. سەنىڭ اقىلسىز، اڭعال بولۋىڭا قۇقىڭ بار. كوپ ادامدار ويىنداعىنى سۇراۋدان قىمسىنادى. سونداعىسى ءوزى جايلى قاتە تۇسىنىك قالىپتاستىرماۋ. ەگەر بىلگىڭ كەلسە، سۇرا! بىلىمدە اشىقتىق كەرەك!

13. قىزداردى گۇلگە تەڭەيمىن. ونى جۇلساڭ ولەدى...

14. الماتى - ەرەكشە قالا. مەن ونى قاتتى جاقسى كورەمىن. مەنىڭ ءومىرىم وسى قالامەن بايلانىستى. مەن شەت مەملەكەتتەردە بولدىم. وتانىما دەگەن ساعىنىش مەنى ءبىر ساتكە بوساتقان ەمەس.

15. قازاقستاننىڭ حالقى ادەمى. ءارقايسىسى ءارتۇرلى. ول ارالاس قان مەن مادەنيەتتىڭ ۇلگىسى. ماعان ولاردىڭ نە تۋرالى ويلايتىندىعى، قالاي ءومىر سۇرەتىندىگى قىزىق... قازاقستاننىڭ بارلىق ايماعىن ارالاپ، ادامدارىمەن ارالاسقىم كەلەدى. مەنىڭ بۇعان قىزىعۋشىلىعىم ەرەك.

 16. مەنەن ۇنەمى قازاق نە كارىس ەكەنىمدى سۇرايدى. قازاقستان - مەنىڭ ءومىرىمنىڭ نەگىزگى بولشەگى. مەنىڭ سانام - قازاقى. مەنىڭ مىنەزىم قازاق مەنتاليتەتىنە ساي.

17. مەن - قازاقستاندىقپىن جانە وسىلاي بولىپ قالامىن...

18. مەنىڭ جولىم بولدى. وتباسىمنان ۇنەمى قولداۋ تابامىن. مەنىڭ ومىرىمدە كەزدەسكەن بۇكىل سىناقتى بىرگە كوتەرگەن وتباسىما العىسىمدى ايتامىن.

19. سوڭعى جىلدار مەن ءۇشىن وتە قيىنعا سوقتى. قازىر قايتا قالپىما كەلدىم. الدا بىرنەشە جوسپار بار. ول اياق استى شەشىمدەر بولۋى مۇمكىن. مەن الداعى كۇننەن ەشتەڭە كۇتپەيمىن، سەبەبى الداعى ءومىرىمدى الىسقا بولجامايمىن.

20. سۇحباتتارىنىڭ بىرىندە «مەن قازىر سپورتشىنىڭ سپورتتاعى «عۇمىرى» ، مانسابى قىسقا ەكەنىن ءتۇسىندىم. ەڭ ۇزاعاندا 20-25 جىل سپورتتا جۇرۋگە بولاتىن شىعار»، - دەگەن دەنيستىڭ ءومىرى راسىندا ولشەۋلى بولدى.

قالالىق ءى ءى د باسپا ءسوز قىزمەتىنىڭ حابارلاۋىنشا، وقيعا قۇرمانعازى بايسەيىتوۆا كوشەلەرىنىڭ قيىلىسىندا بۇگىن تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.

2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30 دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى.