مينيستر: دەنيس تەن قاندى كوپ جوعالتقاندىقتان قايتىس بولدى

استانا. قازاقپارات - ق ر دەنساۋلىق ساقتاۋ ءمينيسترى ەلجان ءبىرتانوۆ سپورتشى دەنيس تەننىڭ قازاسى جانە دارىگەرلەر كومەگى تۋرالى ايتتى، دەپ حابارلايدى قازاقپارات ءتىلشىسى.

بۇگىن ساعات 14:16-دا جەدەل جاردەم قىزمەتىنە كوشەدە بەلگىسىز ادامنىڭ پىشاق جاراقاتىمەن جاتقانى تۋرالى حابار كەلىپ ءتۇستى. ەكى مينۋتتا شاقىرۋ بريگاداعا جىبەرىلدى جانە 10 مينۋتتا جەدەل جاردەم بريگاداسى وقيعا ورىنا جەتتى. 11 مينۋتتا ناۋقاس جەدەل ستاتسيونارعا جەتكىزىلدى. جەدەل جاردەم ماشيناسىندا رەانيماتسيالىق شارالار جاسالدى. جول ۇستىندە اۋرۋحاناعا حابار بەرىلىپ، ناۋقاستى حيرۋرگتار توبى كۇتىپ الدى. دارىگەرلەر بىردەن وتا جاساپ، ەكى ساعات بويى جانساقتاۋ بولىمىندە سپورتشىنىڭ ءومىرى ءۇشىن كۇرەستى. ءبىراق، قاندى كوپ جوعالتقاندىقتان، 17:30-دا دەنيس تەن قايتىس بولدى»، - دەپ جاۋاپ بەردى مينيستر جۋرناليستەر سۇراعىنا «نۇرساۋلەت» بيزنەس- ورتالىعىندا.

 ءمينيستردىڭ ايتۋىنشا، جەدەل جاردەمگە حابار بەرىلگەنشە سپورتشى كوپ قان جوعالتقان.

«دارىگەرلەر تاراپىنان بارلىق كومەك تولىق كورسەتىلدى. ءبىراق، جەدەل جاردەمگە حابار بەرىلگەنشە سپورتشى كوپ قان جوعالتقان ەدى. قاننىڭ كوپ كەتۋى قاشاندا ومىرگە قاۋىپ توندىرەتىن فاكتورلاردىڭ ءبىرى. وقيعانىڭ ەگجەي- تەگجەيى پاتولوگويالىق- اناتوميالىق زەرتتەۋدەن كەيىن انىقتالادى»، - دەدى مينيستر.

ەسكە سالا كەتەيىك، دانيس تەن ساعات ۇشتە پىشاق جاراقاتىن الىپ، الماتىداعى ورتالىق اۋرۋحاناعا تۇسكەن. وقىس وقيعا قۇرمانعازى- بايسەيىتوۆا كوشەلەرىنىڭ قيىلىسىندا بولعان.

 الماتى ءى ءى د بەرگەن مالىمەتتەرگە قاراعاندا، سپورتشى كولىگىنىڭ ايناسىن ۇرلاپ بارا جاتقان ەكى ادامنىڭ ۇستىنەن تۇسكەن. ەكى ارادا باستالعان جانجالدىڭ ناتيجەسىندە الگى ادامدار دەنيس تەندى پىشاقتاپ كەتكەن.

وكىنىشكە قاراي، 17:30-دا تەنيس تەن قايتىس بولدى.

اۆتور: ايجان سەرىكجان قىزى