بولاشاق ستيپەندياتتارى قاي ەلدەردە ءبىلىم الىپ ءجۇر

استانا. قازاقپارات - ق ر ءبىلىم جانە عىلىم مينيسترلىگى «بولاشاق» حالىقارالىق ستيپەندياسى يەگەرلەرىنىڭ قاي مەملەكەتتەردى تاڭدايتىنى تۋرالى اقپارات بەردى، دەپ حابارلايدى قازاقپارات ءتىلشىسى.

«قازىرگى ۋاقىتتا ستيپەندياتتاردىڭ %48,5 ۇلى بريتانيا مەن يرلانديادا ءبىلىم الىپ ءجۇر، % 36,2 - ا ق ش پەن كانادادا، 5,8 پايىز - ەۋروپا ەلدەرىندە، 5 پايىز - ازيا مەن وكەانيادا جانە 4,5 پايىز - رەسەي فەدەراتسياسىندا وقيدى»، - دەلىنگەن مينيسترلىكتىڭ «قازاقپارات» ح ا ا ساۋالىنا جىبەرىلگەن رەسمي جاۋابىندا.

مينيسترلىكتىڭ حابارلاۋىنشا، «بولاشاق» ستيپەندياتتارى وقۋ ورنىن ءبىلىم جانە عىلىم ءمينيسترى بۇيرىعىمەن بەكىتىلگەن ج و و تىزىمدەرى اراسىنان تاڭدايدى. 2018 -جىلعا ارنالعان تىزىمدە حالىقارالىق رەيتينگ اگەنتتىكتەرىنىڭ مالىمەتتەرىنە سايكەس جالپى كورسەتكىشتەر بويىنشا توپ-70 ۋنيۆەرسيتەت، ماماندىقتار بويىنشا توپ-20 ۋنيۆەرسيتەت تاڭداپ الىنعان.

 ب ع م كەلتىرگەن مالىمەتتەرگە سايكەس، 25 جىلدا «بولاشاق» حالىقارالىق ستيپەندياسى  12974 ۇمىتكەرگە بەرىلگەن. قازىرگى ۋاقىتتا  1243 ستيپەنديات ءبىلىم الۋدا، ولاردىڭ 13- ءى - باكالاۆر، 1053 - ماگيستراتۋرا، 122 - دوكتورانتۋرا بويىنشا. بىرەۋى اسپيرانتۋرادا وقىپ جاتىر، سونداي- اق 54 ادام تاعىلىمدامادان وتۋدە.

ودان بولەك، قازاقستاندىقتارعا گەرمانيا، فرانسيا، يسپانيا، يتاليا، پولشا، ۆەنگريا، وڭتۇستىك كورەيا، قىتاي حالىق رەسپۋبليكاسى، چەحيا، ليتۆا، لاتۆيا، ر ف جانە وزگە دە ەلدەردىڭ جوعارى وقۋ ورىندارىندا ءبىلىم الۋ ءۇشىن 20 مىڭعا جۋىق گرانت ۇسىنىلدى.

اۆتور: ايجان سەرىكجان قىزى