قوش بول، چەمپيون: دەنيس تەن قازاق سپورتىنىڭ جارىق جۇلدىزى ەدى

استانا. قازاقپارات - قازاقستاننىڭ ەڭبەك سىڭىرگەن سپورت شەبەرى، سوچي وليمپياداسىنىڭ قولا جۇلدەگەرى دەنيس تەن قازاق سپورتىنىڭ جارىق جۇلدىزى ەدى، دەپ حابارلايدى قازاقپارات ءتىلشىسى.

الماتىدا 1993 -جىلى 13  - ماۋسىمدا ءومىر ەسىگىن اشقان دەنيس تەننىڭ تەكتى اۋلەتتەن شىققاندىعى بەلگىلى. ول كورەيادا اتى ءمالىم گەنەرال مين گىن حونىڭ ۇرپاقتارىنىڭ ءبىرى ەدى.

دەنيس تەن بالالىق شاعىندا مۋزىكا، سونداي- اق باسقا دا سپورت تۇرلەرىمەن اينالىسقانىمەن، تۇپتەپ كەلگەندە، مانەرلەپ سىرعاناۋدى تاڭدادى.

2003 - جىلى «حرۋستالدى كونكي» تۋرنيرىندە ونى وسى سپورت ءتۇرىنىڭ بەلگىلى شەبەرى ەلەنا بۋيانوۆا (ۆودورەزوۆا) بايقاپ، بىردەن ماسكەۋگە شاقىردى. ال 2010 -جىلى شەبەرلىگىن ودان ءارى شىڭداۋ ءۇشىن لوس- اندجەلەسكە، ءوزىنىڭ جاڭا باپكەرى فرەنك كەررولگە بەت الدى. مۇنىسى وتە ءجون ەدى.

 دەنيس تەن قازاقستاننىڭ مانەرلەپ سىرعاناۋ سپورتىنىڭ تاريحىندا جاڭا بەتتەر جازدى. لوس- اندجەلەستە وتكەن 2009 -جىلعى الەم چەمپيوناتىندا تابىستى ونەر كورسەتكەن ول ۇزدىك وندىقتىڭ قاتارىنا ەنىپ، سەگىزىنشى ورىنعا يە بولدى. وسىلايشا ول ۆانكۋۆەر وليمپياداسىنا قازاقستانعا قوس بىردەي جولداما الىپ بەردى. 2010 -جىلعى وليمپيادادا ەڭ جاس قاتىسۋشى بولعانىنا قاراماستان، 11- ورىننان كورىندى. بۇل الداعى جارقىن جەڭىستەردىڭ باسى ەدى.

2011 - جىلدىڭ اقپانىندا قازاقستاندا وتكەن  Ⅶ قىسقى ازيا ويىندارىندا جۇلدىزى جانعان دەنيس تەن التىن جۇلدەنى جەڭىپ الدى. ەكى جىلدان كەيىن كانادادا وتكەن الەم چەمپيوناتىندا د. تەن ءوزىنىڭ جەكە رەكوردى - 266,48 بالعا قول جەتكىزدى. ەركىن باعدارلامادا ۇزدىك شىققان ول قورىتىندىدا كانادالىق پاتريك چاننان نەبارى 1,3 بالعا قالىپ قويىپ، كۇمىس جۇلدەنى ەنشىلەدى. ءسويتىپ قازاقستاندىق مانەرلەپ سىرعاناۋشىلار اراسىندا العاش رەت الەم چەمپيوناتىنىڭ جۇلدەگەرى اتاندى.

 

دەنيس تەننىڭ سپورتتىق جولىنداعى ەڭ باستى تابىسى، ارينە، سوچي وليمپياداسىنداعى قولا مەدال ەدى. ەرلەر اراسىندا العاشقى كۇنى 84,06 بالل العان دەنيس توعىزىنشى ورىننان كورىنسە دە، بارشا قازاقستان حالقى وعان ءۇمىت ارتتى. كەلەسى كۇنى ەركىن باعدارلامادا بار كۇشى مەن شەبەرلىگىن سالىپ، 171,04 بالل الىپ، قورىتىندىسىندا 255,10 بالعا قول جەتكىزگەن ول ەل ءۇمىتىن اقتاپ، ۇزدىك ۇشتىكتىڭ قاتارىنان كورىندى. بۇل سول دوداداعى قازاقستان قورجىنىنداعى جالعىز جۇلدە بولاتىن ءارى تاۋەلسىز ەل تاريحىندا مانەرلەپ سىرعاناۋدان الىنعان ءبىرىنشى مەدال ەدى. مۇندا باپكەرى فرەنك كەررولدىڭ دە ۇلەسى مول.

«قۇرمەت» وردەنىنىڭ جانە مەملەكەتتىك «دارىن» جاستار سىيلىعىنىڭ يەگەرى دەنيس تەننىڭ بۇدان باسقا دا تابىستارعا قول جەتكىزۋىنە العان جاراقاتتارى مۇمكىندىك بەرگەن جوق.

 نەبارى 25 جاسىندا عۇمىرى كىلت ۇزىلگەن سپورتشىنىڭ بولاشاعى الدا ەدى. قانشاما بيىكتەن كورىنسە دە، ءوزىنىڭ كىشىپەيىل مىنەزىنەن، سۇيكىمدى قالپىنان تانباي، حالقىنىڭ قوشەمەتىنە بولەنگەن دەنيس تەننىڭ جارقىن بەينەسى ەل جادىنان ماڭگى وشپەيتىنى انىق.

اۆتور: ەلجان ەرالى