تۇركىستانعا تۇركياداعىداي قوناقتار نەگە اعىلمايدى: تۇيمەبايەۆ سەبەپتەرىن ايتتى
بۇل تۋرالى بۇگىن ءوڭىر باسشىسى جانسەيىت تۇيمەبايەۆ تۋريزم سالاسىنىڭ وكىلدەرىمەن وتكەن جيىندا ايتتى، دەپ حابارلايدى قازاقپارات.
وبلىس اكىمدىگىنەن ءمالىم ەتكەندەي، باسقوسۋعا ايماقتىق باسقارما باسشىلارى، تۋريستىك اگەنتتىكتەر، تاريحي، مادەني ورتالىق جەتەكشىلەرى مەن قولونەر شەبەرلەرى قاتىستى. ولار اتالعان سالانى دامىتۋ جايىندا ۇسىنىس- پىكىرلەرىن ءبىلدىردى.
«ءبىزدىڭ وبلىستا تۋريستەر قىزىعاتىن تاريحي جانە مادەني نىساندار وتە كوپ. تاماشا تابيعاتىنىڭ ءوزى ءبىر توبە. سولاي بولا تۇرا، نەگە بىزگە تۇركياداعىداي تۋريستەر اعىلمايدى. سەبەبى، قوناقتارعا كورسەتىلەتىن قىزمەت ءتيىستى دەڭگەيدە جاسالماعان. مىنە، وسى كەمشىلىكتەردى جويۋىمىز كەرەك. ياعني، اۋەجايدان باستاپ قوناق ءۇي، سەرۆيس، ءدامحانا، گيدتەرگە دەيىن جوعارى دارەجەدە قىزمەت كورسەتەتىن بولسا، كەلۋشىلەردىڭ قاتارى ارتا تۇسەدى. سول ءۇشىن شەتەلدىك ارىپتەستەرمەن جان- جاقتى تاجىريبە الماسا وتىرىپ، قوناق كۇتۋدىڭ وزىق ۇلگىلەرىن ۇيرەنۋىمىز كەرەك»، - دەدى جانسەيىت تۇيمەبايەۆ.
سونداي- اق، ءوڭىر باسشىسى تۋريستىك يندۋستريانى دامىتۋ ماقساتىندا ارنايى باعدارلاما قۇرىلاتىنىن ايتتى. وسىنىڭ نەگىزىندە تۋريستىك نىساندارداعى ينفراقۇرىلىم ماسەلەسى شەشىلىپ، سەرۆيستىك قىزمەتتى جاقسارتۋعا باعىتتالعان جۇمىستار اتقارىلماق.
ودان بولەك، وبلىس اكىمى شاردارا اۋدانىندا حالىقارالىق تۋريستىك فەستيۆال وتكىزۋدى تاپسىردى. شەتەلدىك تۋريستىك اگەنتتىكتەر قاتىساتىن شارانىڭ ماقساتى - شاعالالى شارداراداعى دەمالىس ايماقتارىن الەمدىك دەڭگەيدە ناسيحاتتاۋ.
ءوز كەزەگىندە تۋريستىك اگەنتتىكتەر قاۋىمداستىعىنىڭ ءتورايىمى گۇلميرا اقبەرديەۆا سەرۆيستىك قىزمەت كورسەتۋگە ۇيرەتەتىن ورتالىق اشۋدى ۇسىندى.
جيىن بارىسىندا وبلىس ورتالىعى - تۇركىستان قالاسىنىڭ دامۋ جوسپارى دا كەڭىنەن تالقىلاندى. ايماق باسشىسى ق. ا. ياساۋي كەسەنەسىنىڭ ماڭىنا ەسكى شىعىستىق ۇلگىدەگى عيماراتتاردىڭ بوي كوتەرەتىنىن ايتتى.