ارىستانبەك مۇحامەدي ۇلى: دەنيس تەننىڭ اماندىعىن تىلەپ وتىرمىز
«الماتىدان وتە سۋىق حابار جەتتى. مانەرلەپ سىرعاناۋشى دەنيس تەن پىشاق جاراقاتىنان 3 ليتر قان جوعالتىپ، جانساقتاۋ بولىمىندە جاتىر. الماتى ورتالىق كلينيكالىق اۋۋرحاناسىنىڭ دارىگەرلەرى ونىڭ ءومىرى ءۇشىن كۇرەسىپ جاتىر. بۇل ۇلكەن قايعى، ءتىپتى اقىلعا قونبايدى. قازىر بارلىعىمىز دەنيستىڭ اماندىعىن تىلەپ وتىرمىز. مەن ءوزىم ىشكى ىستەر ءمينيسترى قالمۇحانبەت قاسىموۆپەن جانە دەنساۋلىق ساقتاۋ ءمينيسترى ەلجان بىرتانوۆپەن سويلەستىم. ولار بۇل وقيعانى وزدەرىنىڭ جەكە باقىلاۋلارىنا الدى. قازىر تەرگەۋ جۇرگىزىلىپ، قىلمىسكەرلەر ىزدەستىرىلىپ جاتىر»، - دەپ جازدى مينيستر فەيسبۋكتەگى پاراقشاسىندا.
ەسكە سالا كەتەيىك، بۇگىن سپورتشى اۋىر جاراقاتپەن اۋرۋحاناعا تۇسكەن بولاتىن.
وقيعا كۋاگەرلەرىنىڭ ايتۋىنشا، سپورتشىنى بەلگىسىز ادامدار پىشاقتاپ كەتكەن.
دەنيس تەن وڭ جاق سانىنىڭ جوعارعى تۇسىنان جاراقات العان. قازىرگى تاڭدا اۋرۋحانادا وسىعان بايلانىستى ءتۇرلى سالا ماماندارىنىڭ كونسيليۋم ءوتىپ جاتىر.
اۆتور: ايجان سەرىكجان قىزى