ەۋرو وداق پەن جاپونيا ەركىن ساۋدا جونىندە كەلىسىمگە قول قويدى
كەلىسىمگە وداق تاراپىنان ەۋروكەڭەستىڭ باسشىسى دونالد تۋسك پەن ەۋروكوميسسيا ءتوراعاسى جان- كلود يۋنكەر، ال جاپونيا جاعىنان پرەمەر- مينيستر سيندزو ابە قول قويدى. قۇجات كەلەر جىلى ناۋرىز ايىندا ۇلى بريتانيا وداقتان شىققان سوڭ بەكىتىلمەك.
كەلىسىمگە سايكەس توكيو ەۋرو وداقتان ەكسپورتتالاتىن تاۋارلاردىڭ 94 پايىزىنا، ال وداق كۇن شىعىس ەلىنەن يمپورتتالاتىن تاۋارلاردىڭ 99 پايىزىنا كەدەندىك سالىقتى الىپ تاستاماق. ساراپشىلاردىڭ ايتۋىنشا، بۇل ەكى جاقتىڭ ەكونوميكاسىنا وڭ اسەر ەتىپ، كومپانيالارعا ۇلكەن مۇمكىندىكتەر اشادى.
دونالد تۋسك، ەۋروپالىق كەڭەس ءتوراعاسى:
- بۇل كەلىسىمدى حالىقارالىق ساياساتتاعى شامشىراق دەسەك بولادى. ءبىز بۇل قادام ارقىلى حالىقارالىق ساۋدا قاتىناسىندا ەۋرووداق پەن جاپونياعا سەنىم ارتۋعا بولاتىنىن كورسەتىپ وتىرمىز. سونداي- اق قوس تاراپ تا بوستاندىق، اشىقتىق جانە حالىقارالىق زاڭدارعا باعىنعان الەمدىك ءتارتىپتى قورعاي بەرەتىنىن جەتكىزگىسى كەلەدى.
www.24.kz