تەڭىز تۇبىنە كوكونىس وسىرگەن يتاليا جۇرتتى تاڭقالدىردى

استانا. قازاقپارات - سۋ استىنداعى باقشا. يتاليالىقتار گەنۋيا ماڭىنداعى تەڭىزدە كوكەنىس پەن ەمدىك قاسيەتى بار شوپتەردى ءوسىرىپ، ەلدى تاڭقالدىرىپ وتىر. ءتىپتى جەر كولەمى شاعىن كەيبىر مەملەكەتتەر بۇل تاسىلگە قىزىعۋشىلىق تانىتۋدا.

 بۇل نەمو ەسىمدى كاپيتاننىڭ باقشاسى. ەرەكشە جىلىجاي 8 مەتر تەرەڭدىكتە ورنالاسقان. باقشاعا ارنايى جۇيەمەن قوسپالار ءبولىنىپ، تەڭىز سۋىمەن سۋارىلىپ تۇرادى.

 لۋكا گامبەريني، سۋاستى قوندىرعىسىن شىعاراتىن كومپانيانىڭ وكىلى:

 - تەڭىزدە تەمپەراتۋرا ءبىر قالىپتا ساقتالادى. باقشا ەكولوگيالىق تازا سۋدان ءنار الادى. قاجەتتى دارۋمەندەردى سىڭىرەدى. تىڭ ءتاسىلىمىزدىڭ ناتيجەسى جاقسى. باقشاعا ارنايى قوندىرعىلاردىڭ كومەگىمەن كۇتىم جاسالادى. جاڭا تەحنولوگيالار كوكەنىستەردىڭ ءوسۋىن قاداعالاۋعا مۇمكىندىك بەرەدى. باعباندار سۋ استىنا تەك جەمىستى جينايتىن كەزدە ءبىراق تۇسەدى.

 تەڭىز استىنداعى باقشادا قىزاناق، سارىمساق سىندى ءتۇرلى كوكەنىستەر مەن ەمدىك شوپتەر ءوسىپ تۇر. عالىمدار جاڭا تەحنولوگيالاردىڭ كومەگىمەن جەمىس وسىرۋگە دە نيەتتەنىپ وتىر. تاڭ قالارلىق ءادىستىڭ شىعىنى دا از ەمەس. ءار بيوسفەرانىڭ قۇنى وننان جيىرما مىڭ ەۋروعا دەيىن بارادى. بۇدان بولەك سۇڭگۋىرلەردىڭ جالاقىسى بار.

انتونيو فەررانتە، ميلان ۋنيۆەرسيتەتىنىڭ پروفەسسورى:

- بۇگىندە تىڭ تەحنولوگيانىڭ كومەگىمەن انتاركتيدا ياكي ايدادا وسىمدىك وسىرۋگە بولادى. مۇنداي تاجىريبەنى نەگە سۋ استىندا كورمەسكە؟! تەڭىز استىنداعى باقشا تەك شىعىن ەمەس. پايداسىن دا بەرىپ جاتىر. جىلىجايىمىزدىڭ كەلەشەگى بار دەپ ايتا الامىز.

يتاليالىق باعبانداردىڭ سۋ استىنداعى باقشاسىنا وزگەلەر دە قىزىعۋشىلىق تانىتىپ وتىر. تىڭ تەحنولوگيا ارقىلى بۇل ءتاسىلدى جەتىلدىرۋگە بولادى. ماماندار ونىڭ پايداسىن بولاشاقتا كورەتىنىن ايتتى. سەبەبى ب ۇ ۇ بولجامىنشا شامامەن 30 جىلدان سوڭ جەر بەتىندەگى ادامداردىڭ سانى 10 ميللياردقا جەتۋى ىقتيمال. ياعني سول كەزدە حالىقتىڭ ازىقتان تارشىلىق كورمەۋىنە وسى جوبا كەپىلدىك بەرمەك.

www.24.kz