ەلباسى پرەمەر- مينيستر باقىتجان ساعىنتايەۆتى قابىلدادى
كەزدەسۋدە ۇكىمەتتىڭ 2018 -جىلعى ءبىرىنشى جارتىجىلدىقتا اتقارعان جۇمىستارىنىڭ قورىتىندىلارى، مەملەكەتتىك جانە سالالىق باعدارلامالاردىڭ ىسكە اسىرىلۋ بارىسى تالقىلاندى.
نۇرسۇلتان نازاربايەۆ ەلىمىزدىڭ الەۋمەتتىك- ەكونوميكالىق دامۋ كورسەتكىشتەرى ارتىپ كەلە جاتقانىنا قاراماستان، مەملەكەت تاراپىنان قابىلدانعان باعدارلامالار تۇرعىنداردى تولىق قامتىماي وتىرعانىن ايتتى.
«؟بىرىنشى جارتىجىلدىق اياقتالدى. كورسەتكىشتەر ءوسىپ كەلەدى. جالپى، حالىقتىڭ ءال- اۋقاتى جاقسى. ءبىز يندۋستريالىق، ينفراقۇرىلىمدىق جانە الەۋمەتتىك باعدارلامالار قابىلدادىق. الايدا، جەرگىلىكتى اتقارۋشى ورگاندار مەن مينيسترلىكتەر ولاردى تولىق ورىنداماي وتىر، بەكىتىلگەن باعدارلامالار وڭىرلەرگە جەتپەي جاتىر»، - دەدى مەملەكەت باسشىسى.
ەلباسى كوممۋنالدىق قىزمەت كورسەتۋ تاريفتەرىنىڭ وسكەنىنە جانە ەلىمىزدەگى جوعارى وقۋ ورىندارىنداعى وقۋ اقىسىنىڭ قىمباتتاعانىنا توقتالىپ، مەديتسينالىق قىزمەت پەن ءبىلىم ساپاسىنىڭ تومەندەپ بارا جاتقانىن اتاپ ءوتتى.
«كوممۋنالدىق قىزمەتتەردىڭ باعاسى ءوستى. مەديتسينالىق قىزمەت كورسەتۋ ناشارلادى. ءبىلىم الۋ قىمباتتاپ بارادى. جاستار ءبىزدىڭ ۋنيۆەرسيتەتتەردەگى ءبىلىم ساپاسىنىڭ تومەندىگىنە بايلانىستى رەسەيدىڭ جوعارى وقۋ ورىندارىن تاڭدايتىن بولدى. ءبىزدىڭ قوعامدا وسىنداي پروبلەمالار ءجيى كوتەرىلۋدە»، - دەدى مەملەكەت باسشىسى.
قازاقستان پرەزيدەنتى ەل ەكونوميكاسىنداعى شاعىن جانە ورتا بيزنەستىڭ ءرولىن ارتتىرۋ، سونداي- اق كاسىبي مەملەكەتتىك اپپارات قالىپتاستىرۋ ماسەلەلەرىنە توقتالدى.
نۇرسۇلتان نازاربايەۆ «بەس الەۋمەتتىك باستامانى» جانە ينفراقۇرىلىمدىق دامۋ باعدارلاماسىن ساپالى جۇزەگە اسىرۋدىڭ ماڭىزدىلىعىن اتاپ ءوتتى. سونىمەن قاتار، مەملەكەت باسشىسى وڭىرلەردە جول سالۋ ماسەلەسىنە دە نازار اۋداردى.
سوڭىندا قازاقستان پرەزيدەنتى ۇكىمەت پەن جەرگىلىكتى اتقارۋشى ورگاندار تاراپىنان قابىلدانعان مەملەكەتتىك جانە سالالىق باعدارلامالاردىڭ ساپالى ورىندالۋىن قامتاماسىز ەتۋدى جانە ولاردىڭ جۇزەگە اسىرىلۋىنا مۇقيات باقىلاۋ جاساۋدى تاپسىردى.