توكيو وليمپياداسى ويىندارىنىڭ باعدارلاماسى بەكىتىلدى
2020 -جىلدىڭ 24 - شىلدەسى مەن 9 - تامىزى ارالىعىندا وتەتىن ويىنداردا سپورتتىڭ 33 تۇرىنەن 339 سايىس وتپەكشى. وليمپيادانىڭ رەسمي تۇردە اشىلۋى 24 - شىلدەگە، جابىلۋ سالتاناتى 9 - تامىزعا جوسپارلانعان.
اشىلۋ سالتاناتىنان بۇرىن، ياعني 2020 -جىلدىڭ 22 - شىلدەسىندە فۋتبول مەن سوفتبولدان ىرىكتەۋ سىندارى باستالادى. سونداي- اق، اشىلۋ سالتاناتى وتەتىن كۇنى ەسكەك ەسۋ مەن ساداق اتۋ سپورتىنىڭ وكىلدەرى جارىس جولىنا شىعادى. 2020 -جىلعى توكيو وليمپياداسىنىڭ 1- جارىس كۇنىندە سپورتتىڭ 21 تۇرىنەن سايىستار وتەدى. ونىڭ ىشىندە، ۇستەل تەننيسى، تەننيس، دزيۋدو، بادمينتون، گيمناستيكا، تەننيس پەن ۆەلوسپورت بار.
توكيو-2020 ويىندارىنىڭ باعدارلاماسىنا قوسىلعان 3x3 باسكەتبول، سكەيتبوردينگ پەن سەرفينگ العاشقى دەمالىستا باستالىپ، بۇكىل ويىن بارىسىندا ەل نازارىنا ۇسىنىلادى.
2020 -جىلدىڭ 1- تامىزىندا وليمپيادا ويىندارىنا العاش رەت ەنگەن سپورت تۇرلەرىنەن كوپتەگەن جۇلدە ءوز يەسىن تاپپاق. اتاپ ايتار بولساق، دزيۋدودان كوماندالىق جارىس، ترياتلوننان ارالاس كوماندالىق ەستافەتا جانە ارالاس كوماندالىق اتۋدان مەدالدار جيىنتىعى ساراپقا سالىنادى. بۇل كۇنى سپورتتىڭ 23 تۇرىنەن جارىس وتپەكشى.
توكيو-2020 وليمپياداسىنىڭ ەڭ سوڭعى جارىس كۇنىندە ەرلەر اراسىنداعى مارافون باستالادى. الەمدەگى ۇزدىك التى مارافون قاتارىنا ەنەتىن جىل سايىنعى توكيو مارافونى ەندى ميلليونداعان كورەرمەننىڭ نازارىن اۋدارماق.
«توكيو-2020 وليمپياداسىنىڭ كەستەسىن ح و ك- ءتىڭ اتقارۋشى كوميتەتى بەكىتتى. ءبىز مۇنداي ءىستى وليمپيادانىڭ باستالۋى مەن اشىلۋ سالتاناتىنا ەكى جىل قالعانعا دەيىن اتقارعانىمىزعا قۋانىشتىمىن. مەنىڭشە، توكيو-2020 ويىندارى كەرەمەت ەنتۋزيازم مەن ەرەكشە كوڭىل- كۇيگە تولى بولادى. ويىندار اشىلۋ سالتاناتىنا ەكى كۇن قالعاندا فۋكۋسيماداعى سوفتبول تۋرنيرىنەن باستالىپ، ەرلەر مارافونىمەن اياقتالادى»، - دەيدى توكيو-2020 پرەزيدەنتى يوشيرو موري.
توكيو-2020 وليمپياداسىندا 42 سپورت نىسانى جۇمىس ىستەيدى. بۇگىنگە دەيىن 24 نىسان جۇمىس ىستەپ تۇر، 10 ۋاقىتشا نىسان جانە 8 جاڭا نىسان سالىنادى.
توكيو-2020 ۇيىمداستىرۋشىلارى سۋدا ءجۇزۋ، سۋدا كوركەم ءجۇزۋ جانە دايۆينگ كەستەسىن تولىقتىرىپ جاتىر.
اۆتور: كۇنسۇلتان وتارباي