تارباعاتايدا «التىن ادام» قورىمى قازىلىپ جاتىر

None
None
وسكەمەن. قازاقپارات - شىعىس قازاقستاننىڭ تارباعاتاي اۋدانىندا «التىن ادام» قورىمى قازىلىپ جاتىر، دەپ حابارلايدى قازاقپارات ءتىلشىسى.

ش ق و اكىمىنىڭ باسپا ءسوز قىزمەتى تاراتقان اقپاراتقا سەنسەك، تارباعاتاي تاۋلارىنىڭ قويناۋىنداعى ەلەكە سازى دەپ اتالاتىن كورىكتى جايلاۋدان ءبىزدىڭ زامانىمىزعا دەيىنگى 8-7- عاسىرلارعا جاتاتىن ساق اقسۇيەكتەرىنىڭ قورىمى تابىلعان. قورىمنىڭ قۇلپىن اشىپ، قۇپياسىن زەرتتەپ جۇرگەن - ارحەولوگ زەينوللا ساماشيەۆ.

ارحەولوگيانى دامىتۋدىڭ وڭىرلىك باعدارلاماسى اياسىندا قولعا الىنعان قازبا جۇمىستارىنىڭ ناتيجەسىمەن ش ق و اكىمى دانيال احمەتوۆ بارىپ تانىستى.

2016-جىلى عانا ارحەلوگتاردىڭ نازارىنا ىلىنگەن بۇل اۋماقتا 300 دەن استام كونە بەيىت پەن قورىم بار. ول تۋرالى العاش ارحەلوگتارعا جەرگىلىكتى شوپاندار ايتقان ەكەن. زەينوللا ساماشيەۆ پەن ابدەش تولەۋبەكوۆ باستاعان ارحەولوگتار بۇگىنگە دەيىن جۇزدەگەن قورىمنىڭ ەڭ ۇلكەن دەگەن ەكەۋىن قازىپ زەرتتەپ ۇلگەرگەن.

زەينوللا ساماشيەۆتىڭ ايتۋىنشا، تابىلعان التىن بۇيىمدار ساق بەكزادالارى مەن حانزادالارىنا تيەسىلى بولعان. اسىرەسە ايەل زاتىنا قاجەت اشەكەيلى جاپسىرمالار مەن قاپسىرمالار، ات ابزەلىنىڭ اتريبۋتتارى كوپ تابىلعان.

«بۇل اۋماقتا 7 ۇلكەن قورىم، 300 دەن استام بەيىت بار. ءبىز قازىپ جاتقان قورىمنىڭ سىرتىندا 50 مەتر قاشىقتىقتا تاسپەن شەڭبەر ورىلگەن. بۇل - «التىن ادام» دەگەن ۇعىمعا سايكەس كەلەتىن قورىمداردىڭ ءبىرى. قورىمنىڭ قۇرىلىمى ءۇش بولىكتەن تۇرادى. ەڭ استىڭعى قاباتى تاستان قالانىپ، ونىڭ سىرتى توپىراقپەن قاپتالىپ، بەتىنەن تاعى تاس قالانعان. سىرتقى ءپىشىنى مەن قۇرىلىمىنا قاراپ، بۇل قورىمدى شىلىكتى قورىمىمەن، جەتىسۋداعى بەسشاتىر، تىۆاداعى ارجان، حاكاسياداعى سالبىق قورىمدارىمەن سالىستىرۋعا بولادى. ەرتە ساق داۋىرىنە كەلەدى» - دەيدى زەينوللا ساماشيەۆ.

سوڭعى جاڭالىقتار