تامارا دۇيسەنوۆاعا ماڭىزدى جوبانى ىسكە اسىرۋ مىندەتى جۇكتەلدى

استانا. قازاقپارات - «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ «كەدەرگىسىز كەلەشەك» جوباسىنا جاڭا سەرپىن بەرۋدى كوزدەيدى، دەپ حابارلايدى قازاقپارات ءتىلشىسى.

اتالعان جوبانىڭ نەگىزگى ماقساتى - مۇمكىندىگى شەكتەۋلى جانداردىڭ ءومىر ساپاسىن ارتتىرۋ، ولاردىڭ ءجۇرىپ-تۇرۋ جاعدايىن جاقسارتۋ.

«قازىرگى كەزدە ءبىز وسى جوبانى قايتا قاراپ، ونىڭ ماڭىزدىلىعىن كۇشەيتۋدى كوزدەيمىز. سونىڭ اياسىندا ناقتى كومەك بەرىلۋى شارت، ناقتى جۇمىستار اتقارىلۋى قاجەت. وسى ورايدا، ءبىز ناقتى ءتورت باسىمدىقتى بەلگىلەدىك. بىرىنشىدەن، مۇمكىندىگى شەكتەۋلى جانداردىڭ ەركىن ءجۇرىپ- تۇرۋىنا ىڭعايلى ءارى كەدەرگىسىز جاعداي جاسالۋى قاجەت. ەكىنشىدەن، وسى ساناتتاعى بالالاردىڭ ينكليۋزيۆتى ءبىلىم الۋىنا كومەكتەسۋىمىز كەرەك. ۇشىنشىدەن، مۇگەدەكتەرگە تۇراقتى جۇمىسقا تۇرۋىنا قامقورلىق جاساۋ. ولار اقشا تاۋىپ، ءوزىن-ءوزى اسىراي ءبىلۋى كەرەك. تورتىنشىدەن، وسى سالاداعى زاڭنامانى جەتىلدىرۋ. ءدال وسى ءتورت باسىمدىقتىڭ اياسىندا ءبىز «كەدەرگىسىز كەلەشەك» جوباسىن قايتا جاساقتاپ، ناقتى جۇمىس جاسايتىن بولامىز»، - دەدى م. اشىمبايەۆ استانادا وتكەن كەڭەستە.

ونىڭ ايتۋىنشا، ورتاق جۇمىسقا ۇكىمەتتىك ەمەس ۇيىمدار دا اتسالىسۋى قاجەت. «كەدەرگىسىز كەلەشەك» جوباسى ناقتى ناتيجە بەرۋ شارت.

«ەرتەڭ جاي ستاتيستيكامەن اينالىسىپ كەتپەيىك، مونيتورينگ جاساپ جانە تاعىسىن تاعى. ءبىزدىڭ جوبامىز مۇمكىندىگى شەكتەۋلى جانداردىڭ جاعدايىن جاقسارتۋى قاجەت. پارتيا تاراپىنان بۇل ماسەلەنى تامارا دۇيسەنوۆا (نۇر وتان» پارتياسىنىڭ حاتشىسى- اۆت.) ۇيلەستىرەتىن بولادى. بۇل كىسىنى ءبارىڭىز جاقسى بىلەسىزدەر. ول حالىقتى الەۋمەتتىك قورعاۋ سالاسىندا ءبىراز ۋاقىت ەڭبەك ەتتى. مينيستر بولدى. تاجىريبەسى مول. ونىمەن بىرگە ءبىز «كەدەرگىسىز كەلەشەك» جوباسىنا جاڭاشا سەرپىن بەرۋىمىز كەرەك»، - دەپ اتاپ كورسەتتى م. اشىمبايەۆ.

ايتا كەتەيىك، استانا قالاسىنىڭ اكىمى اسەت يسەكەشەۆ مۇمكىندىگى شەكتەۋلى جاندارعا جاعداي جاساۋ ماسەلەسى بويىنشا ەسەپ بەردى. ال « «ЕLAMAN» الەۋمەتتىك-يننوۆاتسيالىق جوبالار قورىنىڭ ءتوراعاسى الماز ەرجان مۇگەدەكتەرگە جاعداي جاساۋدىڭ كەمشىن تۇستارىن اتادى. «پاندۋس، پاندۋس دەيمىز. مىسالى، ءدال قازىر مەن اكىمدىككە قالاي كىردىم؟ بۇل جەردە دەنى دۇرىس پاندۋس تا جوق. سول ءۇشىن اكىمدىكتى نەگە جاۋاپقا تارتپايدى؟ نەگە ايىپپۇل سالمايدى؟ نەگە اكىمدىكتى ەشكىم تەكسەرمەيدى؟ «نۇر وتان» پارتياسىنىڭ باس كەڭسەسىن الايىق، ول جاقتا مۇگەدەكتەرگە ارنالعان دارەتحانا جوق. ول دا دۇرىس ەمەس. زاڭ بويىنشا مۇمكىندىگى شەكتەۋلى ادامداردىڭ قۇقىعى دا شەكتەلىپ وتىر»، - دەپ اتاپ كورسەتتى ۇيىم باسشىسى.