ميدىڭ قىزمەتىن جاقسارتۋدىڭ قاراپايىم ءادىسى تابىلدى

 استانا. قازاقپارات - پەنسيلۆانيا ۋنيۆەرسيتەتىنىڭ عالىمدارى قۇرامىندا تەمىر مولشەرى جوعارى تاماق ونىمدەرى ەستە ساقتاۋ مەن زەيىندى جاقسارتۋعا كومەكتەسەتىنىن انىقتادى.

بۇل جونىندەگى ماقالا «Journal of Nutrition» باسىلىمىندا جاريالاندى، دەپ جازادى Stan.kz اقپاراتتىق اگەنتتىگى.

ماماندار مۇنداي قورىتىندىعا ءۇندىستاندىق جاس وسپىرىمدەردىڭ قاتىسۋىمەن جۇرگىزىلگەن زەرتتەۋلەردىڭ ناتيجەلەرىنە سۇيەنىپ كەلدى. زەرتتەۋ بارىسىندا ولارعا مينەرالدى قوسپالارمەن ازىرلەنگەن ءىنجۋ تارىسى بەرىلدى.

تەمىردىڭ جەتىسپەۋشىلىگى - الەمدەگى مينەرالداردى زاتتاردىڭ ەڭ كوپ تاراعان كەمشىلىكتەرىنىڭ ءبىرى. ال تەمىر تاپشىلىعى انەمياسى بالالار مەن ەرەسەكتەر اراسىندا مۇگەدەكتىكتىڭ نەگىزگى سەبەبى بولىپ تابىلادى. سونىمەن قاتار، عىلىمدا بالالار مەن جاس وسپىرىمدەردىڭ كوگنيتيۆتى قابىلەتتەرىنە تەمىردىڭ تيگىزەر اسەرى كوپ ايتىلا بەرمەيدى.

عالىمدار جۇرگىزگەن تاجىريبەگە ماحاراشترا شتاتىندا تۇراتىن جانە ءبىر اۋىلداعى مەكتەپتە وقيتىن الەۋمەتتىك جاعدايى تومەن وتباسىنان شىققان 12-16 جاس ارالىعىنداعى 140 بالا قاتىستى. قاتىسۋشىلار ەكى توپقا ءبولىندى، ولاردىڭ بىرىندە جاس وسپىرىمدەر قاراپايىم ءىنجۋ تارىسىن، ال ەكىنشىسىندە قۇرامىندا تەمىر بار داقىلداردى تۇتىندى.

التى ايدان كەيىن زەرتتەۋگە قاتىسقان جاس وسپىرىمدەردىڭ اعزاسىنداعى تەمىر قۇرامى جوعارىلاپ، بالالار زەيىن مەن ەستە ساقتاۋعا ارنالعان تاپسىرمالاردى ادەتتەگىدەن جاقسى ورىنداي باستادى.