قاتەرلى ىسىككە شالدىققان ەر ادام ءولىپ بارا جاتىپ ءاميانىن ۇرلاعان ۇرىعا حات جازعان

 استانا. قازاقپارات - ۆەنەتسيادا دەمالىپ جاتقان امەريكالىق تۋريستىڭ قالتاسىنا ۇرى ءتۇسىپ، ءاميانىن ۇرلاپ كەتكەن. ارتىنشا تۋريست ۇرىعا حات جازعان.

بۇل تۋرالى La Nuova Venezia باسىلىمىنا سىلتەمە جاساپ Stan.kz حابارلايدى.

مايكل ۆيلي ەسىمدى ەر ادامدى وزەن بەتىمەن جۇرەتىن ۆەنەتسيالىق ترامۆايلاردىڭ بىرىندە توناپ كەتكەن. ءوز كەزەگىندە ول پوليتسياعا جۇگىنىپ، حات قالدىرعان. سونداي-اق، ول پوليتسيادان ءوز حاتىن تاراتۋىن سۇراپتى.

«مەن قاتەرلى ىسىكتىڭ كەسىرىنەن ءولىپ بارامىن. سەن مەنى اقشاسىز جانە كارتاسىز قالدىردىڭ. بۇل ارەكەتىڭ ءۇشىن قۇربانىڭنىڭ قالاي زيان شەككەنىن ەلەستەتىپ كورشى. مەن سەن ءۇشىن كەشىرىم سۇراپ، دۇعا جاسادىم. سەن ءۇشىن دۇعادا بولامىن. سەنىڭ ارەكەتىڭ ءۇشىن جازىقسىز ادامدار زارداپ شەگۋدە. بۇل كۇناڭنان ارىل. مەن سەنى كەشىرەمىن»، - دەپ جازعان ەر ادام.

سونىمەن قاتار حاتتا ەر ادام ۆەنەتسياعا ساپارى «ايەلىمەن بىرگە بارعان سوڭعى ساياحاتى» ەكەنىن جازعان.

ءوز كەزەگىندە تۋريستىڭ حاتىن جاريالاعان باسىلىم ۆيليدىڭ ءاميانىن تاۋىپ العانداردان ونى پوليتسيا بولىمشەسىنە الىپ كەلۋىن سۇرادى.