مەنى ديماشپەن سالىستىراتىنداردى تۇسىنبەيمىن - ەرنار سادىربايەۆ
امىرە لاقاپ اتىمەن تانىلعان ءانشى ءوزىن ءانشى ديماش قۇدايبەرگەنمەن سالىستىراتىندارعا رەنىش ءبىلدىردى.
«كونكۋرسقا دەيىن دە، بەلارۋسكە بارعاندا دا ديماش تۋرالى كوپ ايتىلدى. ونداعى حالىق ديماشتى قاتتى سىيلايدى. ءتىپتى قىتايلىق جانكۇيەرلەر ديماشتىڭ ارتىنان ەرىپ ءجۇردى. ءبىز وعان، ارينە، قۋانامىز. وكىنىشكە وراي، كەي ادامدار ەكەۋمىزدى سالىستىرىپ جاتادى. ديماشقا جەتپەيسىڭ دەپ جاماندايتىندار بار. ونداي ادامداردى تۇسىنبەيمىن»، - دەدى ەرنار سادىربايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
«امىرەنىڭ» ايتۋىنشا، قوس ءانشى باياعىدان تانىس جانە ارالارىندا قۇرمەت پەن سىيلاستىق بار.
«ءاردايىم ايتۋدان جالىققان ەمەسپىن، ديماشپەن باياعىدان تانىسپىن، ونى دوسىم رەتىندە، ارىپتەسىم رەتىندە قاتتى سىيلايمىن. جۇرگەن جەرىمىزدە ءبىر-ءبىرىمىزدى قولداپ جۇرەمىز، «سلاۆيان بازارىندا» دا قۋانىشپەن كورىستىك. ديماشقا تەك قانا ساتتىلىك تىلەيمىن. ال ءبىزدى سالىستىراتىندارعا ايتارىم، ءار ادامنىڭ ءوز دارا جولى بار»، - دەدى امىرە.
ايتا كەتەيىك، ەرنار سادىربايەۆ بەلارۋستە وتكەن «سلاۆيان بازارى» حالىقارالىق ونەر فەستيۆالىندە جۇلدەلى 1-ورىندى جەڭىپ الدى. 2015-جىلى بۇل بايقاۋدا قازاقستاندىق ديماش قۇدايبەرگەن باس جۇلدە يەلەنگەن بولاتىن.
ەرنار سادىربايەۆ اۋەلى نۇرعيسا تىلەنديەۆتىڭ «قۇستار ءانىن» شىرقادى. ەكىنشى كۇنى وركەستردىڭ سۇيەمەلدەۋىمەن رايان پوۋستىڭ «پودبەري مۋزىكۋ» جانە روكوپەرا موتسارتتىڭ «يا سپليۋ نا روزاح» اتتى شىعارمالارىن ورىندادى.
ءانشىنىڭ پروديۋسەرى جان مۇقانوۆ بايقاۋدا بولعان قىزىقتى وقيعالاردى ايتىپ بەردى.