قازاقستاندا سەنىمدى تۋريستىك كومپانيالاردىڭ ءتىزىمى جاسالدى

استانا. قازاقپارات - قازاقستاندا سەنىمدى تۋريستىك كومپانيالاردىڭ ءتىزىمى جاسالدى. اتالمىش ءتىزىمدى «تۋريستىك قامقور» كورپوراتيۆتىك قورىنىڭ باسپا ءسوز قىزمەتى جاريا ەتتى.

باسپا ءسوز مالىمەتتەرىنە قاراعاندا، «تۋريستىك قامقور» كورپوراتيۆتىك قورى قازاقستاندىقتاردىڭ شەتەلدە قاۋىپسىز دەمالۋىن قامتاماسىز ەتۋگە قامقورلىق جاسايدى. سول سەبەپتەن دە شەتەلگە بارىپ دەمالۋ ءۇشىن جولدامالاردى سەنىمدى تۋروپەراتورلاردان، ياعني ازاماتتاردىڭ قۇقىقتارىنا كەپىلدىك بەرەتىن ۇجىمداردان ساتىپ الۋعا كەڭەس بەرەدى.

شەتەلگە شىقپاس بۇرىن الدىمەن ءوزىڭىز توقتايتىن قوناق ءۇي برونىن، ەلگە كەرى قايتۋ بيلەتى مەن تۋركود- تى تەكسەرىپ العانىڭىز ابزال.

تۋركود دەگەن نە؟ تۋريستىك كود 11-13 (شىعاتىن ەلگە قاتىستى) قارىپتىك-ساندىق سيمۆولداردان تۇرادى. ول ءار جولدامانى رەسىمدەگەن كەزدە اۆتوماتتى تۇردە بەرىلەدى. تۋريست كۇتپەگەن جاعدايعا تاپ بولعان كەزدە قورمەن بايلانىسىپ، ءوزىنىڭ تۋركودىنىڭ ءنومىرىن حابارلايدى جانە شۇعىل تۇردە 24 ساعاتتىڭ ىشىندە كومەك كۇتەدى.

تۋركود جەكە پاراقپەن نەمەسە جولداماعا جازىلىپ بەرىلۋى مۇمكىن. ولاي بولماعان جاعدايدا تۋروپەراتوردىڭ قىزمەتى زاڭسىز دەپ تانىلادى جانە ءسىز ولاردىڭ قىزمەتىنە كۇمانمەن قاراپ، بىردەن باس تارتۋعا قۇقىلىسىز.

كەلەڭسىز جاعدايعا تاپ بولا قالعان جاعدايدا، تۋركود ءسىزدىڭ ەڭ جاقىن ۋاقىتتاعى رەيسپەن ەلگە امان- ەسەن ورالۋىڭىزدىڭ كەپىلى بولادى.

«تۋريستىك قامقور» كورپوراتيۆتىك قورىنا ازىرشە 56 تۋروپەراتور مۇشەلىككە ەنگەن. ولار ساياحاتشىلاردىڭ قاۋىپسىزدىگىنە تولىق كەپىلدىك بەرەدى. ولاردىڭ تولىق ءتىزىمىن مىنا سىلتەمەدەن بىلۋگە بولادى.

قازاقستاندا 2016-جىلدىڭ اياعىندا زاڭنامالىق دەڭگەيدە قازاقستان رەسپۋبليكاسىنداعى شەتەلگە شىعۋ تۋريزمى اياسىندا ازاماتتاردىڭ قۇقىقتارىنا كەپىلدىك بەرەتىن «تۋريستىك قامقور» جۇيەسى ەنگىزىلدى.

«تۋريستىك قامقور» قورى 2016-جىلدىڭ 7- قاراشاسىنان باستاپ جۇمىس ىستەيدى.

قوردىڭ بۇكىل جۇمىس ىستەگەن ۋاقىتىندا 460 مىڭنان استام قازاقستاندىقتارعا تۋركود بەرىلدى.