ساۋد ارابياسى تاريحىنداعى تۇڭعىش مودەل جايلى نە بىلەمىز؟
ساۋد ارابياسى دەگەندە كوبىسى قاتاڭ زاڭدارعا باعىناتىن حيدجاب كيگەن ايەلدەردى ەلەستەتەتىنى انىق. الايدا، بۇل تۇجىرىم بۇرىڭعى ءوتىپ كەتكەن شاقتا قالىپ قويدى. بۇگىندە، ارابيالىق ايەلدەرگە كولىك جۇرگىزۋ مەن سپورتتىق شارالارعا ەرلەر قاتارلى بارۋعا رۇقسات بەرىلگەن.
اقىرىنداپ ايەلدەر مارتەبەمىز كوتەرىپ كەلە جاتقان ەلدە تۇڭعىش مودەل دە پايدا بولدى.
اكەسى اراب، اناسى يتاليالىق بولعان بويجەتكەن ساۋد ارابياسىنداعى دجيددا قالاسىندا تۋىلىپ وسكەن. بويجەتكەننىڭ اناسى دا بۇرىندا مودەل قىزمەتىن اتقارعان.
كريستينا تامەر Giorgio Armani, Gianfranco Ferre جانە La Perla ىسپەتتى تانىمال برەندتەرمەن جۇمىس ىستەگەن. تاليدانىڭ ءسان الەمىنە بەت بۇرۋعا اناسىنىڭ سەپتىگى مەن ۇلەسى زور بولدى.
نەبارى 17 جاستاعى تاليدا مودەلدىك بيزنەسكە ەندى عانا اياق باسىپ كەلە جاتىر. ول ازىرگە Korloff اتتى ءيىس سۋ فيرماسىمەن جانە تانىمال Rubaiyat ساعات برەندىمەن جۇمىس ىستەپ ۇلگەردى.
بۇرىندارى ساۋد ارابياسى اتىنان پوديۋمعا شىققان مودەلدەر بولعانى راس. الايدا، ەل تاريحىندا تانىمال برەندتەر اتىنان ماڭىزدى ءسان اپتالىعىندا بوي كورسەتىپ، الەمدىك ءسان باسىلىمدارىنا تۇسكەن ارۋ بولماعان.
تاليدا تامەردىڭ پوديۋمعا العاشقى شىعۋى فرانسۋز اپتالىعى كەزىندە ورىن الدى. ول تانىمال Antonio Grimaldi برەندىنىڭ كورسەتىلىمىن اشىپ، ونىڭ جابىلۋىنا دا قاتىستى. بويجەتكەننىڭ كيىپ شىققان وبرازدارى كوپشىلىكتىڭ كوڭىلىنەن شىعىپ، 17 جاستاعى مودەل بىردەن ۇلكەن تانىمالدىلىققا يە بولعان.
وعان قوسا، تاليدا Harper's Bazaar Arabia جۋرنالىنىڭ باس بەتىنە شىقتى.
«بۇل مەنىڭ ءسان الەمىندەگى العاشقى قادامدارىم ەكەنىن بىلەمىن. الايدا كەدەرگىلەر كوپ ەكەنىن دە جاقسى بىلەمىن. مەن ساۋد ارابياسىندا تۇراتىندىعىمنان مەنى ءوز ەلىمدە تۇسىنبەيتىن ءارى مەنىڭ مانسابىما قارسى كەلەر ادامدار تابىلارى ءسوزسىز.
ءبىراق مەن بولاشاقتا ءبارى وزگەرىسكە ۇشىرايتىنىنا سەنەمىن. ءسان سالاسىنا العاش بولىپ قادام باسقان ادام بولعانىم ماعان قۋانىش سىيلايدى»، - دەپ ايتتى تاليدا.
بويجەتكەن بولاشاقتا ميلاندا ءبىلىم العىسى كەلەتىنىن ايتىپ، ءوز مودەلدىك قىرىن جەتىلدىرۋگە نيەتتى ەكەنىن ايتتى.