تارازدا ءجۇزجىلدىق ۇيلەر قايتا جاڭعىرتىلادى

None
None
تاراز. قازاقپارات - تاراز بيلىگى قالا ورتالىعىندا بىرنەشە تاريحي كەزەڭدەردى بىرىكتىرەتىن اۋقىمدى تۋريستىك الاڭ اشۋدى جوسپارلاپ وتىر، دەپ حابارلايدى قازاقپارات ءتىلشىسى.

جامبىل وبلىستىق تۋريزم باسقارماسى وكىلدەرىنىڭ ايتۋىنشا، ءوڭىردىڭ ىشكى تۋريزمدى دامىتۋ كارتاسىنا جاڭا كورىكتى مەكەن - «اۋليە اتا ءداۋىرى» دەپ اتالاتىن تاريحي-مادەني نىساندار ەنگىزىلگەن.

«تارازداعى تۋريستىك كەشەن بۇرىنعى كوك بازاردى عانا ەمەس، وعان جاپسارلاس جاتقان تۇرعىن ۇيلەردى دە قامتيدى. ول ۇيلەر دە بىرەگەي تاريحىمەن ەرەكشەلەنەدى. ⅩⅨعاسىردىڭ سوڭى مەن ⅩⅩعاسىردىڭ باس كەزىندە بۇل اۋماقتا ساۋدا لاپكەلەرى، دۇكەندەر سالىنعان. توڭكەرىستەن كەيىن عيماراتتاردىڭ كوپشىلىگى مەملەكەتتىك مەكەمەلەرگە بەرىلگەن»، - دەيدى تۋريزم باسقارماسىنىڭ باسشىسى قارلىعاش ارالبەكوۆا.

وننان استام ەسكى ۇيلەردىڭ تاريحي قۇندىلىعى بار. ءبىراق ولاردىڭ كوپشىلىگى قازىر جەكەمەنشىكتىڭ يەلىگىندە، ايانىشتى حالدە. ويتكەنى ولاردىڭ يەلەرىنە بىرەگەي عيماراتتاردى ءوز ماقساتىنا پايدالانۋعا تىيىم سالىنعان. ەندى بيلىك ولاردى كۇردەلى جوندەۋ ارقىلى تاريحي-مادەني تۋريستىك كەشەن اياسىندا قايتا جانداندىرۋدىڭ جولدارىن قاراستىرىپ جاتىر.

«جامبىل وبلىسىنىڭ اكىمى اسقار مىرزاحمەتوۆ مۇندا كەلىپ، كونە ۇيلەردىڭ جاعدايىن كوردى. ول جۇرتشىلىقپەن، ۇيلەردىڭ يەلەرىمەن كەزدەسىپ، قيىن جاعدايدان شىعۋ تۋرالى ۇسىنىستارىن تىڭدادى. اكىمنىڭ تاپسىرماسىمەن جاساقتالعان ارنايى كوميسسيا عيمارات يەلەرىنىڭ وسى ۇيلەردى ساقتالعان تاريحي قۇجاتتار نەگىزىندە بۇرىنعى قالپىنا كەلتىرۋگە دايىن ەكەنىن انىقتادى»، - دەيدى قارلىعاش ارالبەكوۆا.

جامبىلدىق تاريح اۋەسقويلارىنىڭ «وبەليسك» قوعامدىق بىرلەستىگى كونە ۇيلەرمەن شەكتەلمەي، كونە توسەمەلى جولدى دا قالپىنا كەلتىرۋ باستاماسىن كوتەرىپ جاتىر. بۇدان تىس، اۋەسقويلار تۇرار رىسقۇلوۆ اتىنداعى ساياباقتىڭ جانىنان «كەڭەستىك كەزەڭ ساياباعىن» سالۋدى ۇسىندى.

تاراز قالاسىنىڭ اكىمى سايلاۋعالى باينازاروۆتىڭ ايتۋىنشا، عيمارات يەلەرىنىڭ كەيبىرى ۇيلەردى ءوز قارجىسىنا جوندەۋگە ءازىر. كونە ۇيلەرگە قانشالىقتى زاقىم كەلگەنىن جانە ولاردى الداعى ۋاقىتتا پايدالانۋ مۇمكىندىكتەرىن انىقتاۋ ءۇشىن ءاربىر نىسانعا ساراپتاما جۇرگىزۋ قاجەت.

بولاشاقتا «اۋليە اتا شارشىسى»، «كەڭەستىك كەزەڭ ساياباعى»، كيەلى قاراحان كەسەنەسى، داۋىتبەك كەسەنەسى، ەجەلگى مەشىت جانە «ەجەلگى تاراز» تاريحي- مادەني ورتالىعىن ءبىرىڭعاي تۋريستىك جاياۋجولمەن بىرىكتىرۋ جوسپارلانۋدا.

ايتا كەتەيىك، تارازدا جىل باسىنان بەرى عيماراتتاردى، ساياباقتاردى، باقتاردى جانە جالپى قالالىق ينفراقۇرىلىمدى اۋقىمدى جوندەۋ جۇمىستارى ءجۇرىپ جاتىر.

سوڭعى جاڭالىقتار