اتىشۋلى ءالىبي جۇماعۇلوۆ ءىسى: بيزنەسمەن جاماليەۆ بوستاندىققا شىقتى
ۆەدومستۆونىڭ مالىمەتى بويىنشا، اعىمداعى جىلدىڭ 23- مامىرىندا كوكشەتاۋ قالالىق سوتىندا «ءالىبي جۇماعۇلوۆ ءىسى» بويىنشا جازاسىن وتەپ جاتقان قايرات جاماليەۆتىڭ ءوتىنىشى قارالدى. ول جازانىڭ قالعان مەرزىمىن ايىپپۇلعا اۋىستىرۋدى سۇراعان.
ەسكە سالايىق، كاسىپكەر جاماليەۆ 2015-جىلدىڭ تامىز ايىندا كوڭىلى جاراسقان اينۇر يسينانى ءالىبي جۇماعۇلوۆتان قىزعانىپ، جىگىتتى ءولىمشى ەتىپ ساباعان بولاتىن. سول كەزدە بۇل وقيعا الەۋمەتتىك جەلىگە تاراپ، قىزۋ تالقىلانعان ەدى. استانا قالالىق سوتىنىڭ ۇكىمىمەن بيزنەسمەن ق ر قىلمىستىق كودەكسىنىڭ 194-بابى (بوپسالاۋ)، 126-بابى (باس بوستاندىعىنان ەرىكسىز ايىرۋ) جانە 121-بابى (سەكسۋالدىق سيپاتتاعى زورلىق-زومبىلىق ارەكەتتەر) 13 جىلعا سوتتالدى.
كەيىن كاسساتسيالىق شاعىم بويىنشا جازا مەرزىمى 7 جىلعا قىسقارتىلدى. 2015-جىلدان 2018-جىلعا دەيىن جازاسىن الماتى وبلىسىنداعى تۇزەتۋ مەكەمەسىندە وتەگەن. 2018-جىلدىڭ قاڭتار ايىندا كوكشەتاۋداعى قونىستانۋ كولونياسىنا اۋىستىرىلدى.
اقمولا وبلىستىق سوتىنىڭ باسپا ءسوز حاتشىسى كۇلاش دومالاقوۆا اتاپ وتكەندەي، جاماليەۆ تۇرمەدە مادەني-بۇقارالىق شارالارعا بەلسەندى قاتىسىپ، ءوزىن-ءوزى تاربيەلەۋدە وزگەلەرگە ۇلگى كورسەتكەن. ءتارتىبى جاقسى بولعان. وعان قىلمىستىق اتقارۋ جۇيەسى قىزمەتكەرلەرى تاراپىنان وڭ مىنەزدەمە بەرىلگەن. ونىمەن قوسا، ونىڭ ءوتىنىشىن قاراۋ كەزىندە زارداپ شەككەن تاراپ تا قاتىسقان. ءالىبي جۇماعۇلوۆ شىعىننىڭ وتەلۋىنە بايلانىستى جازانى جەڭىلدەتۋدى سۇراعان. سولايشا، بيزنەسمەننىڭ ءوتىنىشى پروكۋرور، زارداپ شەگۋشى جانە سوت تاراپىنان قولداۋ تاپتى.
«جاماليەۆ جازاسىنىڭ ۇشتەن ءبىرىن وتەگەن. وسى ۋاقىتتا بىردە-ءبىر تەرىس مىنەز كورسەتپەگەن. قىلمىستىق اتقارۋ جۇيەسى قىزمەتكەرلەرى تاراپىنان تەك ماداقتاما الىپ وتىرعان. وزىنە جۇكتەلگەن جۇمىستارعا جاۋاپكەرشىلىكپەن قارادى. وعان قوسا، زارداپ شەككەن جاقتىڭ ماتەريالدىق شىعىنىن تولىق وتەدى. سوت وسىنىڭ بارلىعىن ەسكەرە كەلە، وعان قالعان 1434 كۇن جازاسىن 862 مىڭ 193 تەڭگە ايىپپۇلعا اۋىستىردى»، - دەپ ءتۇسىندىردى كۇلاش دومالاقوۆا.