كوميكس تۇرىندە جازىلعان ەڭ العاشقى دوكتورلىق ديسسەرتاتسيا
ءبىر قىزىعى، بۇل جاي عانا كوميكس ەمەس، دوكتورلىق ديسسەرتاتسيا ەكەن. 2014 -جىلى كوميكستىڭ اۆتورى نيك سيۋزانيس بۇل تۋىندىسى ءۇشىن ءپانارالىق زەرتتەۋلەر سالاسىنداعى عىلىمي دارەجەگە يە بولدى. قازىرگى ۋاقىتتا كولۋمبيا ۋنيۆەرسيتەتىنىڭ وقىتۋشىلار كوللەدجىنىڭ (Teachers College) دوكتورانتى سيۋزانيستىڭ گرافيكالىق نوۆەللاسى سوزدىك جانە ۆيزۋال نارراتيۆتەردىڭ بايلانىسىنا ارنالعان.
اۆتور ءوز جۇمىسىندا باتىس مادەنيەتىندە ورنىققان ۆەربال (اۋىزشا) داستۇرگە قاراماستان، ۆيزۋال وبرازدار مەن ءماتىندى تەڭ دارەجەلى «ارىپتەس» رەتىندە قابىلداۋ كەرەكتىگىن دالەلدەيدى جانە سوعان دايەك رەتىندە جۇمىسىن كوممۋنيكاتسيانىڭ ەكى فورماسىندا جاساپ شىققان. سول ارقىلى سيۋزانيس بۇل فورماتتى ءداستۇرلى تاسىلدەرگە بالاما رەتىندە قولدانۋعا بولاتىنىن كورسەتتى.
ديسسەرتاتسيا جاريالانعاندا كوبى ونى سكوتت ماككلاۋدتىڭ «Understanding Comics» ەسسەسىمەن بايلانىستىرعان.
الايدا ەكەۋىنىڭ ايىرماسى بارشىلىق: ماككلاۋدتىڭ گرافيكالىق نوۆەللاسى كوميكس جانرىنىڭ تاريحىنا ارنالعان، ال سيۋزانيس بۇل فورماتپەن ەپيستەمولوگيا، سەميوتيكا، ءتۇيسىنۋ تەورياسى جانە ۆيزۋال زەرتتەۋلەردى قامتىدى.
P.S.
كوميكس - اعىلشىن تىلىندە comic - كۇلكىلى دەگەن ماعىنا بەرەدى. كوميكس - سۋرەتپەن سالىنعان حيكايا. ادەبيەت جانە سۋرەت ونەرىن ۇشتاستىرادى. بۇل ونەردىڭ سان ءتۇرلى تارماعى بار. ءبىرى گرافيكالىق رومان ءتارىزدى بولسا، ەندى ءبىرى ءتىپتى قىسقا بولادى، ولاردى ستريپ دەپ اتايدى. كەي مەملەكەتتە سۋرەت سالىنعان شىعارمالاردىڭ وزىندىك اتاۋى بار. فرانسۋز ءتىلدى ەلدەر كوميكستى bande dessinée، ياعني سۋرەتپەن سالىنعان لەنتا دەسە، جاپونيالىق كوميكس مانگا دەپ اتالادى.