قازاقستاندىق كەزەكتى قاۋىپتى رەكوردىنا دايىندالۋدا

استانا. قازاقپارات - قازاقستاندىق رەكوردشى سەرگەي سىرۋلنيكوۆ كەزەكتى رەكوردىنا دايىندالىپ جاتىر، دەپ حابارلايدى قازاقپارات ءتىلشىسى.

«سىزدەرمەن بولىسەيىن دەپ ەدىم: ماعان تاۋەكەلى جوعارى اۆانتيۋرا ۇسىنىلدى. ءبىر جاعىنان، بۇل وتە كەرەمەت! ەكىنشى جاعىنان، بۇل وتە قاۋىپتى، جاراقات پەن اۋىر سالدارعا اكەپ سوقتىرۋى مۇمكىن. ماعان 25 جىلىتقىنى (ىشىنە سۋ قۇيىلاتىن مەديتسينالىق رەزەڭكە ىدىس) ۇرلەپ، جارۋدى ۇسىنىپ جاتىر»، - دەپ جازدى ول فەيسبۋكتەگى پاراقشاسىندا.

بالۋاننىڭ ايتۋىنشا، بەسىنشى جىلىتقىدان كەيىن وتتەگى جەتىسپەۋشىلىگى تۋىندايتىندىقتان، بۇل تريۋك، ءتىپتى دايىندالعان اتلەت ءۇشىن دە وتە قاۋىپتى.

«قاتەلىك جىبەرسەڭ، سوڭى جاقسىلىقپەن اياقتالماۋى مۇمكىن. 25 دانا! مەن جاتتىعۋدا 14 كە دەيىن بارعانمىن. وتە قيىن بولدى. 25 شاردى جارىلعانشا ۇرلەگەنىڭىزدى كوز الدىڭىزعا ەلەستەتىپ كورىڭىزشى. ال مۇندا شاردىڭ ورنىندا جىلىتقى! سىزدەر نە دەپ ويلايسىزدار؟ مەن وعان كەلىستىم. ال ەندى جاتتىعۋدى باستايمىن»، - دەيدى رەكوردسمەن.

ەسكە سالا كەتەيىك، بيىلعى مامىر ايىندا استانادا سەرگەي سىرۋلنيكوۆ سالماعى 148 توننالىق ۆاگون تىركەۋلى تەپلوۆوزدى بىرنەشە مەترگە سۇيرەپ، رەكورد ورناتقان بولاتىن.

سەرگەي تۋلاعان اتتاردى ۇستاپ تۇرۋ، جىلىتقىلاردى ۇرلەپ جارۋ سياقتى كوپتەگەن رەكوردتاردىڭ يەسى. 2018 -جىلعى ماۋسىم ايىندا ول كوككە كوتەرىلىپ جاتقان ءارقايسىسى 800 كەلىلىك ەكى ۇشاقتى ۇستاپ تۇرعان بولاتىن. ول جولى قازاقستاندىق رەكوردتار كىتابىنىڭ وكىلدەرىن شاقىرماعان، ونىڭ ەرلىگىن جولداستارى كامەراعا ءتۇسىرىپ العان ەدى.

اۆتور: نۇرلان تۇياقوۆ