قازاق انيماتسياسى پورتۋگاليادا وتەتىن فەستيۆالدە باق سىناماق

None
None
 استانا. قازاقپارات - ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» ا ق جارىققا شىعارعان «كۇلتەگىن» اتتى تولىقمەتراجدى انيماتسيالىق ءفيلمى پورتۋگاليادا وتەتىن حالىقارالىق كينوفەستيۆالدىڭ نەگىزگى باعدارلاماسىنا قاتىسادى.

قىركۇيەكتىڭ 14-15 ى ارالىعىندا پورتۋگاليانىڭ پورتۋ قالاسىندا وتەتىن بۇل فەستيۆال وسىمەن ەكىنشى رەت وتكىزىلىپ وتىر.

بۇل بايقاۋدىڭ ماقساتى پورتۋگاليالىق جانە الەمدىك فيلمدەردى كەڭىنەن ناسيحاتتاۋ. دەگەنمەن، فەستيۆال ۇيىمداستىرۋشىلارى بايقاۋدىڭ باستى باعىتتارىنىڭ ءبىرى الەمگە ايگىلى كينوگەرلەرمەن قاتار، تانىلۋىنا كەڭ مۇمكىندىكتەرى بار جاڭا ەسىمدەردى اشۋ ەكەنىن ايتتى.



- ءبىزدىڭ ۇلتتىق ءفيلمنىڭ الەمدىك تۇساۋكەسەرى وسىنداي بەلدى كينوفەستيۆالدە وتەتىنىنە وتە قۋانىپ وتىرمىز. «كۇلتەگىن» ءفيلمى اتا- بابالارىمىزدىڭ جانقيارلىق ەرلىگى، بىرلىگى مەن اۋىزبىرشىلىگى، ولاردىڭ تۇرمىسى مەن سالت- داستۇرلەرى تۋرالى. كۇلتەگىن -  بۇل تۇتاس ءبىر ءداۋىردىڭ تاريحي تۇلعاسى. سوندىقتان دا فيلم باتىس كورەرمەندەرىنە قىزىقتى بولادى دەپ ۇمىتتەنەمىن. قازىلار القاسىنىڭ دا كوڭىلىنەن شىعىپ، جۇلدەلى ورىننان كورىنەتىنىمىزگە كامىل سەنەمىن، - دەدى ءفيلمنىڭ رەجيسسەرى اداي ءابىلدا.

ەستەرىڭىزگە سالا كەتسەك، جاس رەجيسسەر- انيماتور اداي ءابىلدانىڭ قولىنان شىققان بۇل تاريحي انيماتسيالىق تۋىندى كوشپەندى حالىقتاردىڭ باسىن بىرىكتىرىپ، ۇلى كوشپەندىلەردىڭ ءداستۇرىن جالعاستىرعان تۇرىك قاعاناتىنىڭ داڭقتى اسكەري قولباسشىسى كۇلتەگىننىڭ جاستىق شاعى تۋرالى باياندايدى.

ايتا كەتسەك، «كۇلتەگىن» ءفيلمى شىلدە ايىنىڭ باسىندا استانا قالاسىندا وتكەن XIV حالىقارالىق «ەۋرازيا» كينوفەستيۆالىنىڭ «ەۋرازيا جۇرەگىندە» اتتى كونكۋرستان تىس باعدارلاماسىندا كورسەتىلىپ، كورەرمەندەردىڭ ىستىق ىقىلاسىنا بولەنگەن بولاتىن.



ۇلى تۇرىك مەملەكەتىنە ىدىراۋ قاۋىپى تونەدى. تۇركىلەردىڭ بىرلىگىن ساقتاپ قالعان ۇلى ەلتەرىس قاعان جاڭا مەملەكەتتى قۇرۋدى كوزدەگەن ساتقىنداردىڭ قولىنان مەرت بولادى.

تاقتىڭ مۇراگەرى ەلتەرىستىڭ ۇلى 12 جاسار كۇلتەگىن قاشىپ قۇتىلادى. ءوزىنىڭ تۋعان جەرىنە ورالۋ ءۇشىن ول كوپتەگەن قيىندىقتاردى باسىنان وتكىزەدى. بۇل جولدا وعان تۇركىلەردىڭ جەبەۋشىسى كوك ءبورى مەن تۋعان باۋىرى بىلگە كومەككە كەلەدى. باسى بىرىككەن ولار جاۋدى جەڭىپ تۇركى الەمىن قۇتقارىپ الادى. بىلگە قاعاندى تاققا وتىرعىزعان كۇلتەگىن تۇركى مەملەكەتىنىڭ اسكەري قولباسشىسى اتانادى.

ۇزاقتىعى: 60 مينۋت ءتىلى: قازاق تىلىندە قويۋشى رەجيسسەر: اداي ءابىلدا سەناري اۆتورلارى: اداي ءابىلدا، جانىبەك نۇربەك ۇلى قويۋشى سۋرتشىلەر: قاسيەت ساقيوللا، جانىبەك نۇربەك ۇلى، اداي ءابىلدا كومپوزيتورى: اسەت دانەنوۆ دىبىس رەجيسسەرى: ەۆگەني سەليۋكوۆ رەداكتورى: سالتانات دۇنگەنبايەۆا كەڭەسشىلەر: تامارا مۇقانوۆا، ەدىگە تۇرسىنوۆ پروديۋسەر: اداي ءابىلدا ديرەكتورى: ايبيكە راقىمجانوۆا انيماتورلار: ابزال ينسەبايەۆ، قۋانىش ناعىز، مەيىرجان تولەپباي، شاتتىق تۇرسىنالي، قاسيەت ساقيوللا، ەرمەك مانانبايەۆ، جاقسىبەك كامىل، باعدار جىنسابەك، قالي باقىتحان، گۇلجان قادىلبەك، ماريام قاليبەك، تەمىرلان كەنجەعاليەۆ، كۇنانباي ابەلدينوۆ، ءجانادىل بايداربەك، شىڭعىس ساپار.

رولدەردى دىبىستاعان: مەرەي اجىبەكوۆ، ازامات قاناپيا، باقىتجان جارمۇحامبەتوۆ، گۇلناز اۋەسبايەۆا، رۋسلان احمەتوۆ، دينارا ابىكەيەۆا، نۇكەتاي مىشبايەۆا جانە باسقالارى.

رەجيسسەر اداي ءابىلدا 1987 -جىلى پاۆلودار وبلىسىنىڭ مايقوڭىر اۋىلىندا تۋعان. ت. جۇرگەنوۆ اتىنداعى قازاق ۇلتتىق ونەر اكادەمياسىن بىتىرگەن (2009).

ش. ايمانوۆ اتىنداعى «قازاق فيلم» ا ق جانىنداعى «انيماتسيالىق كينو» ءو ب باسشىسى، «Astana film» ج ش س قۇرىلتايشىلارىنىڭ ءبىرى جانە ديرەكتورى. ق ر كينەماتوگرافيستەر وداعىنىڭ مۇشەسى. ول «قوڭىراۋ» (2009 ج)، «ميكو» (2009 ج)، «اڭشى» (2010 ج)، «كوكبالاق» (2011 ج)، «جەرۇيىق» (2013 ج)، «كىلەم ۇستىندەگى قالا» (2014 ج)، «كۇلتەگىن» تولىقمەتراجدى انيماتسيالىق ءفيلمى، «مۇزبالاق» تولىقمەتراجدى انيماتسيالىق ءفيلمى (قويۋشى سۋرەتشى) جۇمىسىنا قاتىسقان.

رەجيسسەر «ۇزدىك ستۋدەنتتىك جۇمىس» («شاكەن جۇلدىزدار» ح ك ف، 2009)، «كروك» فەستيۆالىنىڭ جۇلدەسى (ماسكەۋ، 2010)، «يسلام كينوسى» فەستيۆالىنىڭ جۇلدەسى (قازان، تاتارستان، 2011)، «باستاۋ» ح ك ف باس جۇلدەسى (الماتى,2011)، «قارلىعاش» كينوفەستيۆالىنىڭ (الماتى، 2016) جۇلدەلەرىنە قول جەتكىزگەن.

Massaget.kz

سوڭعى جاڭالىقتار