استانادا جىل سايىن جۇزدەگەن انا مەن ءسابي ولىمنەن قۇتقارىلادى

None
None
استانا. قازاقپارات - استانا قالاسىنىڭ دەنساۋلىق ساقتاۋ باسقارماسى بوساناتىن ايەلدەر مەن نارەستەلەرگە شۇعىل كومەك قاجەت بولعان جاعدايدا بارلىق قۇرىلىمدار ءوزارا ناقتى رەگلامەنتتەر بويىنشا جۇمىس ىستەيتىنىن ايتتى.

بۇل تۋرالى قازاقپارات ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ حابارلايدى.

ءمالىم ەتىلگەندەي، دەنساۋلىق ساقتاۋ باسقارماسىندا باسشىنىڭ انا مەن بالا دەنساۋلىعىن قورعاۋ جونىندەگى ورىنباسارى لاۋازىمى بار.

بۇدان بولەك، بۇل ماسەلەمەن انا مەن بالا دەنساۋلىعىن قورعاۋ ءبولىمىنىڭ باسشىسى جانە ماماندارى، باسقارمانىڭ شتاتتان تىس ماماندارى، اكۋشەر-گينەكولوگيالىق قىزمەت جونىندەگى ماماندار دا اينالىسادى.

انا جانە نارەستەلەر ءولىمى جونىندەگى شتاب جۇمىس ىستەيدى. انا مەن بالا دەنساۋلىعىن ساقتاۋ ماسەلەلەرى قارالاتىن جانە جۇيەلى شەشىمدەر قابىلداناتىن وتىرىستار تۇراقتى نەگىزدە وتكىزىلىپ تۇرادى.

«اۋىر جاعدايلار تۋىنداعان كەزدە كونسيليۋمدار شاقىرىلىپ، ۇلتتىق انا مەن بالا ورتالىعىنان، ۇلتتىق كارديوحيرۋرگيا ورتالىعىنان، «استانا» مەديتسينا ۋنيۆەرسيتەتى كافەدرالارىنان پروفەسسورلار مەن ساراپشىلار شاقىرىلادى (...) مامانداردىڭ ۇيلەسىمدى ارەكەتتەرىنىڭ ارقاسىندا جىل سايىن جۇزدەگەن كەلىنشەك پەن ءسابيدىڭ ءومىرىن ساقتاپ قالۋ مۇمكىن بولىپ وتىر»، - دەپ جاۋاپ بەردى باسپا ءسوز قىزمەتىنىڭ وكىدەرى قازاقپارات ءتىلشىسىنىڭ ساۋالىنا.

ەسكە سالا كەتەيىك، سوڭعى ەكى ايدا ەلوردادا جاڭا بوسانعان ءتورت ايەل كوز جۇمعان بولاتىن. 21 -ماۋسىم كۇنى استاناداعى №1 -پەريناتالدىق ورتالىقتا 34 جاستاعى ايەل، 25 -ماۋسىمدا 31 جاستاعى ايەل قايتىس بولدى.

«ءبىرىنشى جاعدايدا كەلىنشەك بالانى ءوزى بوساندى، ال ەكىنشى جاعدايدا كەسار تىلىگى جاسالدى. ەكەۋى دە وسىعان دەيىن بوسانعان ايەلدەر. سونىمەن قاتار ولاردىڭ جۇكتىلىككە بايلانىستى ەمەس اۋرۋلارى بولعان»، - دەگەن بولاتىن استانا قالاسى قوعامدىق دەنساۋلىق ساقتاۋ باسقارماسى باسشىسى ورىنباسارىنىڭ مىندەتىن اتقارۋشى ساۋلە مۇقىشەۆا.

3 -شىلدە كۇنى تاعى ءبىر كەلىنشەك كوز جۇمدى. №1 پەريناتالدىق ورتالىقتىڭ باس دارىگەرىنىڭ ورىنباسارى ەربول اۋباكىروۆ كەلىنشەك ءولىمىنىڭ اكۋشەرلىك قيىندىقتارمەن بايلانىستى بولعانىن ايتتى. كەلىنشەكتىڭ 19 جاسىنان باستاپ زياندى ادەتتەرى بولعان.

ءتورتىنشى جاعداي 16 -شىلدەدە №2-پەريناتالدىق ورتالىقتا تىركەلدى.

 

سوڭعى جاڭالىقتار