حانشالار كيگەن قاسابا
بۇل جادىگەردىڭ مۋزەي قورىنا قالاي، كىمنەن تۇسكەندىگى تۋرالى مالىمەت جوق. ءبىراق قورداعى 130 مىڭنان استام قۇندى زاتتاردىڭ ىشىندەگى ەڭ كونە جادىگەردىڭ ءبىرى - وسى قاسابا، - دەيدى باتىس قازاقستان وبلىستىق تاريحي- ولكەتانۋ مۋزەيى قور ءبولىمىنىڭ مەڭگەرۋشىسى گۇلزادا باقتىباي قىزى.
مۋزەي قورىندا ساقتالعان بۇل كونەتوز قاسابانىڭ تۇرپاتى دوڭگەلەك، جەلكەسىنە قاراي ويىڭقىلاۋ كەلگەن، دوڭگەلەك تاقياعا ۇقساس ەتىپ پىشىلگەن، جەلكەسىنە قاراي كىشكەنە بىرتە- بىرتە ويىڭقى تۇسكەن قۇلاماسى بار. ايدىنى، قيىلىسقان جەرى زەرلى جىپتەرمەن كەستەلەنىپ، گۇل ءتارىزدى، وسىمدىك بەينەلى ورنەكتەر تۇسكەن. قۇلاماسىنا شاشاق تاعىلعان. «شاشاقتىڭ كوپ تاعىلۋى «ۇرپاعى كوبەيسىن» دەگەن يگى تىلەكتى بىلدىرەدى»، دەيدى مۋزەي قىزمەتكەرى.
قاسابانىڭ ماڭداي تۇسىنا دوڭگەلەك تيىندار تىزىلگەن.
ايتا كەتەتىن جايت، زەر جىپتەرىمەن ويۋلاتىپ توبەسىن تۇتاس، جاندارى تۇگەل قولمەن تىگىلگەن. استارى قىزىل ماقپال ماتامەن كومكەرىلگەن. جالپى، بۇل باس كيىم تۋرالى «كونە تۇركى (قىپشاق) باس كيىمنىڭ نەگىزگى ەلەمەنتتەرىن بويىنا سىڭىرگەن قاسابا اتاۋى «التىن زەرلى» دەگەن ماعىنا بەرەدى»، دەپ جازعان ەكەن بەلگىلى ەتنوگراف عالىم وزبەكالى جانىبەكوۆ.
قاسابا كوبىنە تورە، سۇلتان قىزدارى كيەتىن باس كيىم سانالعان. وسىنداي قاسابانى جاڭگىر حاننىڭ سۇيىكتى زايىبى فاتيما حانىمنىڭ سۋرەتىنەن دە كورۋگە بولادى. قاسابانى كەيدە قالىڭدىق ۇيلەنۋ تويىنا، ساۋكەلەنىڭ ورنىنا دا كيگەن ەكەن. تويدان كەيىن ۇكىسىز، جەلەكسىز، ويىنقىسىنىڭ سىرتىنا جاۋلىق سالىپ جۇرگەن نەمەسە باسىنا ورامالدىڭ ۇستىنەن كيگەن. باسكيىمنىڭ ۇلگىسىنە قاراي قالىڭدىققا ارنايى القا، بىلەزىك، سىرعا، جۇزىك، بۇرىمعا تاعاتىن شولپى، بۇرىمىنىڭ قولاڭىنا ىلەتىن قوزا سىرعا، قامزولدىڭ سىرتىنان بۋىناتىن بەلدىك، اياققا كيەتىن مانەرلى كەبىس دايىندالاتىن بولعان.
«قۇلپىرعان قىزدىڭ اجارىن اشا تۇسەتىن قاسابا اسقان ۇقىپتىلىعىمەن، زەرلى تىگىسپەن، باسقا دا ءارتۇرلى مونشاقتارمەن، كۇمىس تەڭگە، مارجان تاستارمەن دە اشەكەيلەگەن»، دەيدى بۇل ەرەكشە جادىگەر تۋرالى باتىس قازاقستان وبلىستىق تاريحي- ولكەتانۋ مۋزەيى قور ءبولىمىنىڭ مەڭگەرۋشىسى گۇلزادا باقتىباي قىزى.
قازبەك قۇتتىمۇرات ۇلى، «ەگەمەن قازاقستان». ورال