تۇركىستاندا جاڭادان سالىناتىن ۇيلەر قوجا احمەت ياساۋي كەسەنەسىنەن بيىك بولمايدى
بيۋدجەت ەسەبىنەن بوي كوتەرىپ جاتقان ۇيلەردە بارلىعى 2449 پاتەر بولادى. بيىل ونىڭ 500 ى، ياعني 35 تۇرعىن ءۇي پايدالانۋعا بەرىلەدى.
بۇل تۋرالى بۇگىن تۇركىستان وبلىستىق وڭىرلىك كوممۋنيكاتسيالار قىزمەتىندە وتكەن بريفينگتە قۇرىلىس باسقارماسىنىڭ باسشىسى قۇتتىبەك جاماشيەۆ ءمالىم ەتتى، دەپ حابارلايدى قازاقپارات.
وبلىس اكىمدىگىنىڭ باسپا ءسوز قىزمەتىنەن ءمالىم ەتكەندەي، بۇدان وزگە، تۇرعىن ۇيلەر سالىنىپ جاتقان اۋدانداردا مەملەكەت قاراجاتى ەسەبىنەن 9 نىساننىڭ قۇرىلىسى جۇرگىزىلۋدە.
ەسكە سالساق، تۇركىستان قالاسىنىڭ باس جوسپارىن قايتا ازىرلەۋ بويىنشا اعىمداعى جىلدىڭ 12 -شىلدەسىندە حالىقارالىق كونكۋرس جاريالانعان بولاتىن.
«قايتا ازىرلەنگەن باس جوسپارعا سايكەس، «تۇرعىن ءۇي قۇرىلىسىن دامىتۋ» تۇجىرىمداماسى بەكىتىلەتىن بولادى. تۇركىستان وبلىسىنىڭ اكىمى جانسەيىت تۇيمەبايەۆتىڭ يدەياسى بويىنشا تۇركىستان قالاسىن تۇركى الەمىنىڭ رۋحاني- مادەني ورتالىعى رەتىندە دامىتۋ ماقساتىندا جاڭادان سالىناتىن كوپقاباتتى ۇيلەر قوجا احمەت ياساۋي كەسەنەسىنەن بيىك بولمايدى. ويتكەنى - ماۆزولەي مۇمكىندىگىنشە قالانىڭ بارلىق جاعىنان كورىنۋى قاجەت. سالىناتىن باسپانالار ورتا ازيالىق ستيلدە، ياعني كونە داۋىردەگى ساۋلەتپەن سالىنادى»، - دەدى قۇتتىبەك راحماتتۋللا ۇلى.
ق ر ۇكىمەتىنىڭ 22.06.2018 -جىلعى №372-قاۋلىسىمەن بەكىتىلگەن «نۇرلى جەر» مەملەكەتتىك تۇرعىن ءۇي باعدارلاماسى اياسىندا اعىمداعى جىلى تۇركىستان وبلىسى ءۇشىن تۇرعىن ءۇيدى پايدالانۋعا تاپسىرۋ جوسپارى 344,7 مىڭ شارشى مەتر بولىپ بەلگىلەنگەن. 2018 -جىلدىڭ 6 ايىنىڭ قورىتىندىسى بويىنشا، 202,4 مىڭ شارشى مەتر تۇرعىن ءۇي پايدالانۋعا بەرىلىپ، وتكەن جىلدىڭ وسى مەرزىمىمەن سالىستىرعاندا 30 پايىزعا ارتقان.
وبلىستا 2018 -جىلى قارجىلاندىرۋدىڭ بارلىق كوزدەرى ارقىلى 79 كوپقاباتتى تۇرعىن ءۇيدىڭ قۇرىلىسى جۇرگىزىلۋدە. جىل قورىتىندىسىمەن 35 ءۇي پايدالانۋعا بەرىلەدى. قۇرىلىس جۇمىستارىنىڭ ناقتى كولەم يندەكسى بويىنشا 2018 -جىلدىڭ جوسپارى - 140,8 ميلليارد تەڭگە. بۇل مەجە التى ايدىڭ قورىتىندىسى بويىنشا 117,8 پايىزعا ورىندالدى.