قازاقستاندىق سۋرەتشى «يادروسىز بولاشاق ءۇشىن» سىيلىعىن الدى
بۇل تۋرالى س ءى م باسپا ءسوز قىزمەتى حابارلايدى.
حالىقارالىق قازىلار القاسى مۇشەلەرىنىڭ شەشىمى 16- شىلدەدە «يادروسىز بولاشاق ءۇشىن» سىيلىعى قورىنىڭ سايتىندا جاريالاندى. سىيلىقتى تاپسىرۋ ءراسىمى زالتسبۋرگتە (اۋستريا) قازاندا وتەدى.
قازاقستاندىق بەلسەندىمەن بىرگە اۋستراليادان دجەفري لي جانە ۇلى بريتانيادان ليندا ۋولكەر سىيلىققا لايىق دەپ تانىلدى. تاعى ەكى قۇرمەت سىيلىقتارى فرانسۋز بەلسەندىلەرىنىڭ جۇبى ديدە جانە پولەت انگەرگە جانە ولاردىڭ اۋستريالىق پىكىرلەسى پيتەر ۆەيشكە بەرىلدى.
سۋرەتشىنىڭ پىكىرىنشە، سىيلىقتىڭ تابىستالۋى حالىقارالىق قوعامداستىقتى يادرولىق سىناقتاردىڭ قاۋىپى مەن سالدارى تۋرالى اقپاراتتاندىرۋ بويىنشا قازاقستان جۇرگىزىپ جاتقان جۇمىستىڭ تانىلۋ بەلگىسى بولىپ تابىلادى.
«بۇل سىيلىق - بۇكىل قازاقستاننىڭ ەڭبەگى! بۇل - ەلىمىزدىڭ، اتوم جوباسىنىڭ باستاماشىسى - پرەزيدەنت نۇرسۇلتان نازاربايەۆتىڭ ۇلكەن جانە اۋىر جۇمىسىنىڭ باعاسى. رەسپۋبليكامىز ءوزىنىڭ جەكە ۇلگىسىمەن يادرولىق تاراتپاۋ جانە قارۋسىزدانۋ ءۇشىن قالاي كۇرەسۋ قاجەتتىگىن كورسەتتى، جانە يادرولىق بولاشاق ءۇشىن نەمەسە وعان قارسى شەشىم قابىلداۋ ماسەلەسىندە قوبالجىعان الەمنىڭ باسقا مەملەكەتتەرى ءۇشىن تىرەك بولدى»، - دەپ حالىقارالىق سىيلىقتىڭ لاۋرەاتى ق. كۇيىكوۆ باسا اتاپ ءوتتى.
اتوم جوباسى (Abolish Testing, Our Mission - سىناقتاردى بولدىرماۋ - ءبىزدىڭ ميسسيامىز) جاھاندىق يادرولىق قارۋسىزدانۋ مەن قوعامدىق ديپلوماتيا سالاسىندا قازاقستان رەسپۋبليكاسىنىڭ پرەزيدەنتى ن. نازاربايەۆتىڭ ماڭىزدى باستاماسى بولىپ تابىلادى. بۇل باستاما ب ۇ ۇ جاريالاعان حالىقارالىق يادرولىق سىناقتارعا قارسى ارەكەتتەر كۇنى 2012-جىلعى 29- تامىزدا استانادا «يادرولىق سىناقتارعا تىيىم سالۋدان يادرولىق قارۋدان ازات الەمگە» حالىقارالىق كونفەرەنتسياسىندا جاريالانعان بولاتىن.
اتوم جوباسىنىڭ جاريالانۋ مەزەتىنەن بەرى التى جىلدا الەم بويىنشا باستامانىڭ پرەزەنتاتسيالارىن جانە ءوزى سەمەي پوليگونىنداعى يادرولىق سىناقتاردىڭ قۇربانى بولىپ تابىلاتىن ق. كۇيىكوۆتىڭ سۋرەتتەرى كورمەلەرىنىڭ ۇيىمداستىرىلۋىن قوسا العاندا ەل ىشىندە جانە شەتەلدە وسى باستامانى ىلگەرىلەتۋ بويىنشا اناعۇرلىم جۇمىس اتقارىلدى. قازىرگى ۋاقىتتا الەمنىڭ 100 ەلدەرىنەن 300000 اسا ادام يادرولىق سىناقتارعا جاپپاي تىيىم سالۋ تۋرالى شارتتىڭ (دۆزياي) ءوز كۇشىنە جەدەل ەنۋىن قامتاماسىز ەتۋ جونىندە الەم ليدەرلەرىنە دەگەن ۇندەۋمەن اتوم جوباسىنىڭ ونلاين-پەتيتسياسىنا قول قويدى.
يادرولىق قارۋدىڭ سىناقتارىن توقتاتۋدىڭ جانە ناتيجەسىندە الەمدى يادرولىق قارۋدان ازات ەتۋدىڭ بەلسەندى كۇرەسشىسى رەتىندە 2017-جىلى اتوم جوباسىنىڭ قۇرمەتتى ەلشىسى ق. كۇيىكوۆ حالىقارالىق يادرولىق قارۋعا تىيىم سالۋ قوزعالىسىنا بەرىلگەن يادرولىق قارۋدى جويۋدا كۇش-جىگەرى ءۇشىن بەيبىتشىلىك سالاسىنداعى نوبەل سىيلىعىنىڭ تابىستالۋ راسىمىنە شاقىرىلعان.