چەمپيوندار ليگاسى: «استانا» بۇرىنعى جەتىستىكتەرىن قايتالاي الا ما؟
ەلوردانىڭ «استانا» كومانداسى سىرت الاڭدا چەرنوگوريانىڭ «سۋتەسكا» كومانداسىمەن كەزدەسەدى، دەپ حابارلايدى قازاقپارات ءتىلشىسى.
ءبىز بۇدان بۇرىن «استانا» مەن «سۋتەسكا» جايىندا قىسقاشا شولۋ جاساعان ەدىك. وندا قوس كوماندانىڭ بۇگىنگى تاريحى مەن بۇگىنگى كۇنگە دەيىنگى قول جەتكىزگەن جەتىستىكتەرى باياندالدى. بۇل جونىنەن ازىرگە «استانانىڭ» سالماعى باسىمداۋ سەكىلدى. ەلوردالىق كلۋب بۇعان دەيىن چەمپيوندار ليگاسى مەن ەۋروپا ليگاسىنىڭ توپتىق كەزەڭدەرىندە باق سىناپ، كارى قۇرلىقتىڭ بەدەلدى كلۋبتارىمەن شەبەرلىك بايقاستى.
ءتىپتى 2017/2018-جىلعى فۋتبول ماۋسىمىندا ايدى اسپانعا شىعارعان «استانا» ەۋروپا ليگاسىنىڭ توپتىق كەزەڭىندە ءوز توبىندا ەكىنشى ورىن الىپ، پلەي-وفف ساتىسىندا پورتۋگاليانىڭ «سپورتينگ» كلۋبىمەن جولى ءتۇيىستى. ولار ءوز الاڭىندا قارسىلاسىنا 1:3 ەسەبىمەن جول بەردى. ەسەسىنە ليسسابوندا وتكەن كەزدەسۋدە 3:3 ەسەبىمەن تەڭ ويناپ، جانكۇيەرلەردى ءبىر جەلپىندىرىپ قويدى.
ايتا كەتۋ كەرەك، «استانانىڭ» قازىرگە دەيىنگى جەتىستىگى بولگار مامانى ستانيمير ستويلوۆتىڭ ەسىمىمەن تىعىز بايلانىستى. بولگار مامانى تاجىريبەسى ازداي كوماندانى تۇلەتتى، شاكىرتتەرىن تالاي مىقتى كلۋبتارعا قارسى جىگەرلى ويىن كورسەتۋگە جەتەلەدى. دەگەنمەن ول بيىل قىزمەتىنەن كەتىپ، ەلىمىزدىڭ ۇلتتىق قۇراماسى تىزگىنىن ۇستادى. ال «استانا» كومانداسى بەلگىلى ۋكراينالىق مامان رومان گريگورچۋككە سەنىم ارتىپ وتىر. ۋكراينالىق مامان ەندى س. ستويلوۆ سالعان سوقپاقپەن جۇرە الا ما؟ ەلوردالىق كلۋب بۇرىنعى جەتىستىكتەرىن قايتالاي الا ما؟ بۇل - الداعى ۋاقىتتىڭ ەنشىسىندەگى شارۋا.
رومان گريگورچۋك تە تاجىريبەلى مامان. 2014-جىلى ۋكراينانىڭ ودەسسا قالاسىنىڭ «چەرنومورەتس» كلۋبىن ەۋروپا ليگاسىنىڭ توپتىق كەزەڭىنە الىپ شىقتى. B توبىندا سىنعا تۇسكەن «چەرنومورەتس» ءوز توبىندا ەكىنشى ورىن الىپ، پلەي- فف كەزەڭىندە فرانسيانىڭ «ليونىمەن» وينادى. ەكى كەزدەسۋدە نەبارى ءبىر عانا دوپ سوققان فرانسۋزدار جارىستى جالعاستىردى. ودان كەيىنگى جىلداردا ول ازەربايجاننىڭ «گابالا» كومانداسىنىڭ تىزگىنىن ۇستاپ، سول ەلدىڭ ورتانقول ۇجىمى سانالاتىن كلۋبتى 2015, 2016-جىلدارى ەۋروپا ليگاسىنىڭ توپتىق كەزەڭىنە الىپ شىقتى. ەكى جىلدا دا ءتورتىنشى ورىنعا تۇراقتادى. دەگەنمەن كوماندانى توپتىق كەزەڭگە دەيىن الىپ شىعۋ ءاربىر ماماننىڭ قولىنان كەلە بەرمەيدى. ەندىگى كەزەكتە ول «استانانى» ورگە سۇيرەيدى دەگەن ۇمىتتەمىز.
ايتا كەتەلىك، ءبىزدىڭ كوماندا ىرىكتەۋ جانە توپتىق كەزەڭدەردى قوسا ەسەپتەگەندە چەمپيوندار ليگاسىندا بۇگىنگى كۇنگە دەيىن 23 كەزدەسۋ وتكىزىپ، ونىڭ 8 ىندە جەڭىسكە جەتىپ، 9 ىندا تەڭ ويناپ، 6 ويىندا جەڭىلدى. ونىڭ ىشىندە 12 كەزدەسۋدى ءوز الاڭىندا وتكىزگەن ەلوردالىقتار 7 ىندە جەڭىسكە جەتىپ، 5 ىندە تەڭ تۇسكەن ەكەن. بىردە-ءبىر مارتە جەڭىلىپ كورمەگەن.
ال سىرت الاڭداعى 11 كەزدەسۋدىڭ 6 ۋىندا جەڭىلىپ، 4 ۋىندە تەڭ تۇسكەن، 1 ۋىندە ءۇش ۇپايدى ولجالاپ قايتتى. بۇگىنگى كەزدەسۋدە قالاي بولادى؟ «استانا» ءۇشىن تەڭ ويىن دا جەتكىلىكتى. «استانا» سوڭعى جىلداردا ەۋروكۋبوك ويىندارى توپتىق كەزەڭىنىڭ تۇراقتى قاتىسۋشى بولىپ كەلەدى. سوندىقتان ەل كوكەيىندە ەلوردالىق كلۋبتىڭ «ەرتەگىسى» بيىل دا جالعاسا ما دەگەن ساۋال بار.
اتالمىش ماتچ 00.00 دە باستالادى. كەزدەسۋ «Qazsport» تەلەارناسىنان تىكەلەي ەفيردە كورسەتىلەدى. بۇل جۇپتىڭ جەڭىمپازى جارىستىڭ كەلەسى كەزەڭىندە دانيانىڭ «ميدتيۋللانن» كلۋبىمەن 24- شىلدە جانە 1- تامىز كۇندەرى كەزدەسەدى.
سونداي-اق، ەرتەڭ 19- شىلدەدە ەۋروپا ليگاسىنىڭ ءبىرىنشى ىرىكتەۋ كەزەڭىنىڭ قارىمتا ويىندارى وتكىزىلەدى. ءوز الاڭىندا الماتىنىڭ «قايراتى» اندوررانىڭ «ەنگوردان»، قوستانايدىڭ «توبىلى» گرۋزيانىڭ «سامترەديا» كلۋبتارىن قابىلداسا، پاۆلوداردىڭ «ەرتىسى» ليتۆانىڭ «تراكايىمەن» شەبەرلىك بايقاسادى.
اۆتور: ءادىلجان ۇمبەت