وباما: ساياسي جەتەكشىلەر ۇياتتىڭ نە ەكەنىن ۇمىتتى

استانا. قازاقپارات - ا ق ش- تىڭ بۇرىنعى پرەزيدەنتى باراك وباما پوستىنان تۇسكەلى بەرى العاش رەت ەل الدىنا شىعىپ، ءسوز سويلەدى.

ول «جۇرگەن جەرىندە قورقىنىش پەن ىزا سەيىلتەتىن ساياساتكەرلەر بۇرىن-سوڭدى بايقالماعان بەلسەندىلىكپەن جۇمىس ىستەپ جاتىر» دەدى.

17- شىلدەدە وباما اپارتەيدپەن كۇرەسكەن، وڭتۇستىك افريكا رەسپۋبليكاسىنىڭ پرەزيدەنتى بولعان مارقۇم نەلسون ماندەلانىڭ 100 جىلدىعىنا وراي يوحانناسبۋرگتە وتكەن ءىس-شارادا ءسوز سويلەدى. ول الەم پرەزيدەنتتەرىن ادام قۇقىقتارى مەن قاتەردە تۇرعان قۇندىلىقتاردى قۇرمەتتەۋگە شاقىردى.

وزىنەن سوڭ پرەزيدەنت بولىپ سايلانعان دونالد ترامپتىڭ اتىن اتاماسا دا، جۇرگىزىپ وتىرعان ساياساتىنىڭ كەيبىر تۇستارىن سىنادى.

وباما ءسوز اراسىندا: «ساياسي جەتەكشىلەر ۇياتتىڭ نە ەكەنىن ۇمىتتى. جالعان سويلەگەنىن بەتىنە باسسا، ولار ودان سايىن كۇشەيىپ، تاعى الدايدى»، - دەدى.

ەكس-پرەزيدەنتتىڭ سوزىنشە، «مۇنداي ادامداردىڭ وتىرىگى اشىلسا، بەتى قىزارمايدى. ول «بيلىكتە دەموكراتيانىڭ ءمانىن اشاتىن ينستيتۋتتاردى جويعىسى كەلەتىن ساياساتكەرلەر بار. اينالاعا قاراڭىزدارشى. بۇل - اتتانداپ جاتقانىم ەمەس، جاي فاكتىلەر»، - دەدى.

«ازاتتىق»