ەسەي جەڭىس ۇلى: كوممەنتاتورلار عانا ەمەس، كورەرمەن دە ءوزىن-ءوزى وسىرۋگە ءتيىس

None
None
 استانا. قازاقپارات - رەسەي تورىندە 4 جىل زارىقتىرىپ جەتكەن فۋتبولدان الەم چەمپيوناتى كوزدى اشىپ- جۇمعانشا ءوتتى دە كەتتى.

الايدا، بۇل دودادان ەل ەسىندە تالاي قىزىقتى وقيعالار، اسەرلى ساتتەر، ۇمىتىلماس ەستەلىكتەر قالعانى انىق. «الەمنىڭ تويى» دەپ بالاناتىن بىرىنشىلىكتى وتاندىق تەلەارنالار «قازاقستان» ۇلتتىق ارناسى مەن «قازسپورت» ارناسى بىردە-ءبىر ماتچىن قازا قىلماي تىكەلەي ەفيردە كورسەتتى.

وعان ەلىمىزدەگى تانىمال 10 نان استام كوممەنتاتور قىزمەت ەتتى. ولار ءار ويىندى حالىققا قىزىقتى ءارى تۇسىنىكتى تىلدە جۇرگىزۋگە تىرىستى. سونىڭ ءبىرى - بۇگىنگى تاڭدا سپورت جانكۇيەرلەرىنە جاقسى تانىس ەسەي جەڭىس ۇلى. ءبىز بۇگىن ەسەيدى اڭگىمەگە تارتىپ، وسى كوممەنتاتورلار تۋرالى سۇحباتتاسقان ەدىك.

- كەشە عانا فۋتبولدان رەسەي تورىندە الەم بىرىنشىگى ءوز مارەسىنە جەتتى. وسىنداي ءىرى دوداعا ءبىر اي بويى ۇزدىكسىز كوممەنتاتورلىق جاساۋ بارىسىندا قانداي قيىندىقتار مەن قىزىقتار بولدى؟

- مەن قازىر تىكەلەي جۋرناليستيكا سالاسىندا ەمەسپىن. نەگىزگى جۇمىسىم - ۇلتتىق اۋدارما بيۋروسىندا. سوندىقتان ويىندار ترانسلياتسياسى استانا قالاسىندا جۇرگىزىلگەندىكتەن، توپتىق تۋرنيردەگى ماتچتارعا كوممەنتاري جاساۋعا بارا المايتىنىمدى «QazSport» ارناسىنىڭ باس پروديۋسەرى اسقات ساعىنايەۆقا الدىن الا ەسكەرتىپ، ريزاشىلىعىن الدىم. 1/8 فينالداعى ءۇش ويىننان باستاپ، فينالعا دەيىن 9 ماتچقا ارالاستىم. سەنبى-جەكسەنبى كۇندەرى عانا بارىپ تۇردىم، سوندىقتان وسى جولى كوپ ەڭبەگىم ءسىڭدى دەي المايمىن. ەڭ باستىسى، الەم چەمپيوناتىنىڭ ماتچتارىنا كوممەنتاتور بولۋ - ۇلكەن مارتەبە، ومىرلىك ەستەلىك. ال قيىندىق پەن قىزىق ماسەلەسىنە كەلسەك، ءبارى ءوزىمىز بوي ۇيرەتكەندەي بولدى. تۇنگى 12 دەن كەيىن ويىن جۇرگىزۋ اۋىر بولاتىنى راس، ءبىراق الدىن الا بىرەر ساعات كوز شىرىمىن الىپ، دايىن وتىرۋعا تىرىستىق. اسقات باۋىرىم ۇيىمداستىرعان «رەسەيدەگى فۋتبول تويى» باعدارلاماسى ويىندار الدىندا جانكۇيەرلەردىڭ ساراپ جاساۋىنا جاقسى اسەر ەتكەنى انىق بايقالدى.

- وسى بىرىنشىلىك بارىسىندا ەلىمىزدە كوممەنتاتورلار تاپشىلىعى سەزىلدى مە؟

- قازاقستاندا كوممەنتاتور تاپشىلىعى جوق. بىزدە تىلەۋلەستىك پەن جانكۇيەرلىك مادەنيەت تاپشى. ءبىر فۋتبولشىنىڭ اتىنان قاتەلەسكەن كوممەنتاتوردى اتا جاۋىنداي كورىپ، جەتپىس جەتى اتاسىنان تارتىپ بالاعاتتاپ وتىراتىنداردان شارشادىق. مىسالى، فرانسيا - ارگەنتينا (4:3) كەزدەسۋىندە ارگەنتينالىق انحەل دي ماريانىڭ ءوز شەبىنەن وڭ جاققا كەنەت ويىسىپ، العاشقى قارىمتا گول سوققانىن تۇسىنبەي قالدىق. ياعني، ونىڭ پوزيتسيا اۋىستىرعانىن اڭداپ ۇلگەرمەدىك. ونى بىرەسە مەسسي، بىرەسە پەرەس دەگەنىمىز ءۇشىن ءبىزدى «اتۋ جازاسىنا» كەسە سالعانداردان اياق الىپ جۇرگىسىز. قازاقستاندا بارلىق ماماندار ءوز سالاسىندا قاتەلىك جاساي بەرۋىنە بولادى، تەك كوممەنتاتور عانا قاتەلەسپەۋى كەرەك! سوت وتىرىك سوتتاسىن - كەشىرىمدى، پروكۋرور پارا السىن - كەشىرىمدى، عالىم تۇگەلدەي ۇرلىق عىلىمي جاڭالىق جازسىن - كەشىرىمدى، اكەسىنىڭ بايلىعىنا سەنگەن بىرەۋ بەس ادامدى تاپتاپ ءولتىرسىن - كەشىرىمدى، تەك كوممەنتاتور عانا كەشىرىلمەيدى! قاتەلەسسە، «حالىق جاۋى»! وسى ۇستانىمدى ەش تۇسىنبەدىم. كەشىرىپ قويىڭىزدار، دي ماريا مەنىڭ بىرگە تۋعان باۋىرىم ەمەس، ءجيى بولماسا دا، ءىشىنارا قاتەلەسۋگە بولادى. قۇداي دا كۇنانى كەشىرەدى. مىنە، وسىنداي قىسىمدا جۇرگەن كوممەنتاتورلاردان «ديۆان ساراپشىلارى» «تاۋ توڭكەرەر» ەرلىك كۇتەدى. ونىڭ ۇستىنە، 2012-جىلى ەۋروپا بىرىنشىلىگى مەن چەمپيوندار ليگاسىندا ەكى-ءۇش اي عانا كوممەنتاريلەر تازا قازاق تىلىندە جاسالدى، ودان كەيىن تازا قازاقشا سويلەپ وتىرعانىمىز بيىل عانا. مەن ورىستىلدى ارىپتەستەرىمدى مانسۇقتاماق، ءيا سىرتىنان تاس اتپاق ەمەسپىن. ءبىراق ەكى تىلدە كوممەنتاري جاساۋ تابيعاتى تازا قازاق تىلىندە جۇرگىزگەندەگىدەن مۇلدە بولەك. بەس مينۋت سايىن ىركىلە بەرگەسىن، ىرعاق بۇزىلادى. مەنىڭ ويىمشا، ءبىزدىڭ جىگىتتەردىڭ كوممەنتاريلەرى ەشكىمنەن كەم ەمەس. ءبىزدىڭ ەلدە ەشكىم ءوزىن «ءتىل بىلمەيمىن» دەپ سانامايدى. ءبارى - بىلگىر، ءبارى - كوممەنتاتورلاردىڭ قاتەسىن كورگىش. بۇعان دەيىن دە ءجۇز رەت ايتقانمىن، بۇدان كەيىن دە ءجۇز رەت ايتامىن: بىزگە تىلەۋلەستىك قاجەت. باستان-اياق سىپىرا ماقتاۋ ەمەس، تىلەۋلەستىك. قالادا وسكەن قازاقتار ءبىزدىڭ سويلەۋ مانەرىمىزدى ءتىپتى قابىلداي المايدى. تەرمەلەپ سويلەسەڭىز، ولارعا «اۋىلباي» بولىپ كورىنەدى. دەمەك، باردى باياندى ەتۋگە تىرىسۋىمىز كەرەك. ارينە، ورىسشادان تىكەلەي قوتارىپ، «كالكا» تىلمەن سويلەيتىن تۇستارىمىز دا بولادى، ءبىراق سوڭعى جىلدارى بۇل ولقىلىق ازايىپ كەلەدى.

- قازاق كوممەنتاتورى بولۋ ءۇشىن ەڭ باستىسى جۇرگىزىپ وتىرعان سالانى جەتىك ءبىلۋ مە، الدە كوركەم، جاتىق سويلەۋ باستى رول اتقارا ما؟

- قازاق كوممەنتاتورى امبەباپ بولۋعا ءتيىس. ايتىپ وتكەنىمدەي، الاڭداعى كوماندا جايلى بىلمەي، قۇر ءسوز ساپىرىپ وتىرساڭ دا كەشىرمەيدى، ارا-اراسىندا ءسوز بۇزىلسا دا كەشىرمەيدى. جاقىندا «قازاقستان بارىسىن» جۇرگىزدىم. سوندا چەمپيون ەرجان شىنكەيەۆ ورتاعا شىققاندا: «ماڭ-ماڭ باسىپ، ماڭ باسىپ، ءار جەردەن ءبىر باسىپ، جەڭىمپاز كەلە جاتىر»، - دەدىم. وسى سوزىمە ءبىراز ادام قاراداي شۇيلىگىپتى. الەۋمەتتىك جەلىگە قايتا كىرگەنىمشە ءوشىرىلىپ كەتكەن بە، ءبىراق ءبىر-ەكى ادامنان ەستىپ قالدىم. «ماڭ-ماڭ باسقان، شۋدالارىن شاڭ باسقان» جانۋار جايلى جۇمباقتى، ارينە، ءبارىمىز بالا كەزدەن ەستىپ وستىك. ءبىراق «ماڭ-ماڭ باسۋ» تىركەسى ادىمىن كەسەك تاستايتىن الىپ جىگىتكە قاراتا ايتىلسا نەسى ايىپ؟ ءبىر تىركەستى ءبىر جانۋارعا عانا ويشا مەنشىكتەپ قويىپ، ونى ايتقان كوممەنتاتوردى جەردەن الىپ، جەرگە سالۋدان نە ۇتامىز؟ كوممەنتاتور «ماڭ-ماڭ باسىپ، ماڭ باسىپ» دەگەندە، تىڭداعان ادامنىڭ كوز الدىنا تۇيە عانا ەلەستەي كەتكەنى ءۇشىن ءبىزدىڭ ەش كىنامىز جوق. وكىنىشكە قاراي، وسىنداي نەگىزسىز شابۋىلدار دا جۇيكەگە تيەدى. وبرازدى ءسال ويناتقانىمىز ءۇشىن «كىتاپ وقىمايتىن»، «كەشە»، «نادان»، «ۇعىمسىز» ادام بولىپ شىعا كەلەمىز. ارينە، كوممەنتاتور ءوزى جۇرگىزىپ وتىرعان سپورت ءتۇرى جايلى ءبارىن بىلۋگە ءتيىس. ءتىپتى بيىلعى الەم چەمپيوناتىنىڭ جابىلۋ سالتاناتىندا كادردان ءار ساتتە جىلت ەتە قالعان بەلگىلى تۇلعالاردى دا تانىپ وتىرۋعا تىرىستىق. فرانسيا، حورۆاتيا، رەسەي پرەزيدەنتتەرى، ف ي ف ا باسشىسى، اتى اڭىزعا اينالعان فۋتبولشىلار، سالا ماماندارى - ءبارى كوزىمىزدەن تاسا قالعان جوق. قىزدى-قىزدىمەن پول پوگبانىڭ تريبۋنادا وتىرعان ەكى باۋىرى مەن اناسىنىڭ دا اتىن اتاپ جىبەردىك. ودان ەش ۇتىلعانىمىز جوق. كوممەنتاتور 24 ساعات دايىندىقتا جۇرەدى. كەي كورەرمەن: «جۇرت بىلەتىن نارسەنى ايتادى»، - دەپ جازعىرادى. كەشىرىڭىز، ءسىز فۋتبول فاناتى بولعانمەن، تەلەديدار الدىندا وتىرعان ادامداردىڭ 90 پايىزى الەم چەمپيوناتىن عانا كورەدى. ولارعا ءار دەتال قىزىق. ءادىل رامي مۇرتىن ەدىرەيتىپ شىعا كەلگەنشە-اق ءبىز الدىن الا سوعان قاتىستى ءبىراز نارسە ايتىپ ۇلگەرگەنبىز. رامي قوسالقى قۇرامدا وتىردى، تەك ماراپاتتاۋ راسىمىندە عانا كادرعا ءىلىندى. ءبىراق كورەرمەن ونىڭ قانداي فۋتبولشى ەكەنىن، مۇرتىنىڭ نە قۇدىرەتى بارىن الدىن الا ەستىپ الدى. دەمەك، كورەرمەن دايىن. مىنە، ءبىزدىڭ ميسسيا دا سول: اقپاراتتى ءدال ۋاقىتىندا، ءتىپتى ەرتەرەك ۇسىنىپ وتىرۋىمىز قاجەت.

- كەيدە كوممەنتاتورلارىمىز ءتىلدىڭ ستيليستيكالىق، گرامماتيكالىق زاڭدىلىقتارىنا ءمان بەرمەي جاتقانداي سەزىلىپ جاتادى. كوممەنتاتور ءۇشىن باستى جاۋاپكەرشىك نە دەپ ويلايسىز؟

- ەفير ەشقاشان الدامايدى. كىمنىڭ ءبىلىمى، بىلىگى، تاجىريبەسى قانشالىق ەكەنىن ءدال كورسەتىپ وتىرادى. ءبىز ءبارىمىز - قازاق ءتىلىنىڭ تۋىن كوتەرۋشىلەرمىز. ارينە، «كالكا» تىلمەن سويلەيتىن جاس ارىپتەستەرىمىز بار. ءبىز دە جيىرما جاستىڭ اينالاسىندا سولاي سويلەدىك. اقىل كىرىپ، تىلگە قورعان بولا باستاعانىمىز ەندى عانا عوي. سوندىقتان ولارعا دا كەشىرىممەن قاراۋىمىز كەرەك. «نومينالدى شابۋىلشى»، «دوپقا جاناستى»، «گول ۇردى»، ت. ب. جاساندى، قازاقى ەمەس تىركەستەر ءبىزدىڭ دە جۇيكەمىزگە تيەدى. ءبىراق كوش جۇرە تۇزەلىپ كەلە جاتىر. قازاق تىلىندەگى كوممەنتاريلەردە ەندى عانا تەرميندەر مەن تىركەستەر قۇلاققا ۇيرەنشىكتى بولا باستادى. ورىس ءتىلدى كوممەنتاتورلاردى زور تۇتامىز عوي، ءبىراق ولار ءبىز سياقتى ىزدەنىپ اۋرە بولماي-اق، وزەروۆ، مايوروۆ، ماحارادزە، ماسلاچەنكو، پەرەتۋريندەردەن قالعان ۇلگىمەن جۇمىس ىستەپ كەلەدى. «ۋدار پو ۆوروتام»، «ناۆەس»، «پروسترەل»، «گرۋبايا يگرا»، ت. ب. ابدەن قالىپتاسقان تەرميندەر مەن تىركەستەرگە سوڭعى جىلدارى ولار «ينسايد»، «ۆينگەر»، «كورنەر» دەگەن سەكىلدى الەمگە ورتاق سوزدەردى عانا قوستى. بىزدە ءالى «ناۆەس» پەن «پروسترەلدىڭ» ناقتى بالاماسى جوق. «اۋەلەگەن دوپ» دەگەن تىركەس قۇلاعىما جاعا قويمايدى، «دوپتى اۋەلەتە تاستادى»، «جەرلەتە كوتەردى» دەپ ەتىستىكپەن اياقتاپ، تىگىسىن جاتقىزۋعا تىرىسامىز. قاراپ جۇرگەن جوقپىز، جاتساق-تۇرساق ىزدەنىستەمىز، وسىنى تۇسىنە قابىلداساڭىزدار ەكەن. مارقۇم سۇلتانعالي قاراتايەۆ اقساقال ءبىز ەفيردەن شىققان سوڭ ەرىنبەي قوڭىراۋ سوعىپ، كەم-كەتىگىمىزدى ەسكەرتىپ وتىراتىن ەدى. وسىنداي جاناشىرلىق جەتىسپەيدى بارىمىزگە. ءبارى قاتەمىزدى كوزگە شۇقۋعا بار، ال وزدەرى ۇسىناتىن نۇسقا - جوق.

- قازىرگى تاڭدا كوممەنتاتورلاردىڭ سپورتتىق ويىنداردى جۇرگىزۋ بارىسىندا تەك قاانا كورسەتەلىپ جاتقان بەينە بويىنشا سويلەپ وتىرۋى كورەرمەندەرگە ازدىق ەتەرى داۋسىز. كەيبىر جانكۇيەرلەر سول جارىس تۋرالى ستاتيستيكالىق ءمالىمەتتەر كۇتەتىنى دە جاسىرىن ەمەس. بۇل ولقىلىقتى بولدىرماۋدىڭ جولدارى تۋرالى دا ايتا كەتسەڭىز...

- دۇرىس بايقاپسىز، انشەيىن وقيعانى تالداپ وتىرۋ ازدىق ەتەدى. ءبىراق ستاتيستيكانى دا ساپىرا بەرۋگە بولمايدى. ستاتيستيكا رەپورتاج بارىسىندا ءبىر-ەكى سويلەم عانا بولۋعا ءتيىس. مىسالى، انتۋان گريزمانن فينالدا پەنالتيدەن گول سوقتى. «بۇل - بيىلعى دوداداعى 22-پەنالتي. بۇرىنعى رەكوردتاردان 4 پەنالتي ارتىق» دەڭىز، جەتەدى. ويىن ورىستەپ، قارسى قاقپا الدىندا قاربالاس بولىپ جاتسا، ءسىز ءالى پەنالتي جايىن تەرمەلەپ وتىرساڭىز، مىندەتتى تۇردە ۇرىس ەستيسىز. ءبىراق ءبىزدىڭ جانكۇيەرلىك مادەنيەتىمىز سول ساتتەگى ەموتسيا عانا ەكەنىنە دە كوزىم جەتتى. ەكى جىلدان بەرى statsport.kz دەپ اتالاتىن، سپورت ستاتيستيكاسىنا ارنالعان سايت جۇرگىزىپ كەلەمىن. وقىرمانى - بۇكىل الەمدەگى قازاقى كونتەنتتىڭ 0,0001 پايىزى عانا بولۋ كەرەك. «قايرات» كومانداسى سىرت الاڭدا العاشقى ءىرى جەڭىسىنە قول جەتكىزگەنى تۋرالى اقپارات جاريالايسىز، وقيتىن ادام - 10-12، اسىپ كەتسە، 100-120 عانا. سەبەبىنە ءۇڭىلىپ بايقاپ ەدىك، ءبىزدىڭ سپورت وقىرماندارىنا دا «كۇيىپ تۇرعان» جاڭالىق قاجەت ەكەن. وسى الەم چەمپيوناتى كەزىندە ءبىزدىڭ عانا ەمەس، رەسەيدىڭ سپورت سايتتارى تۇگەلدەي «الەم چەمپيوناتىنىڭ ەڭ ادەمى جانكۇيەر قىزدارىنىڭ» سۋرەتىن جاريالاپ الەك بولدى. سەبەپ بىرەۋ عانا - وقىرمان تارتۋ. «قاپاش- قۇپاش» الەم ءسىزدىڭ ناعىز كاسىبي اقپاراتتارىڭىزعا ءزارۋ ەمەس. ءسىز ول اقپاراتتاردى ساۋساق سورىپ تاۋىپ وتىرعان جوقسىز. ويىن قورىتىندىسىندا ارعى- بەرگىنى ەكشەپ، سالىستىرىپ، ەسەپتەپ جازعان اقپاراتىڭىز تۇككە تاتىمايدى. نيەتىڭىز جاقسى-اق ەدى: وسىنداي اقپارات ۇسىنۋ ارقىلى وقىرمانىڭىزدىڭ تانىم كوكجيەگىن ءسال دە بولسا كەڭەيتۋگە ۇمتىلاسىز. ءبىراق وعان فينال الدىنداعى شوۋعا شىققان قىزدىڭ جالاڭاشتالعان يىعىنىڭ سۋرەتى كەرەك... وكىنىشتى-اق... وسىنداي جاعدايدا، «جارتاسقا بارىپ، كۇندە ايعاي سالىپ، ودان دا جاڭعىرىق شىعارىپ» وتىرساق تا، ەفيردە ءبارىن ايتۋىمىز كەرەك. ءومىردى دە، الاڭداعى جاعدايدى دا.

- بۇل كۇندەرى ەلىمىزدە تىكەلەي ەفيردەن كورسەتىلەتىن سپورت تۇرلەرى وتە كوپ. الايدا كوممەنتاتورلار سانى ساۋساقپەن سانارلىق. ءبىر كوممەنتاتور بىرنەشە سپورت ءتۇرىن جۇرگىزۋگە تۋرا كەلەدى. نەگىزى، ءار كوممەنتاتور بەلگىلى ءبىر سپورت تۇرىنە عانا بەيىمدەلگەنى دۇرىس پا، الدە امبەبەپ بولعانى دۇرىس پا؟

- ماعان سالسا، فۋتبول مەن ۆەلوسپورتتى عانا جۇرگىزىپ تىنىش وتىرار ەدىم. ءبىزدىڭ ەلدە كوممەنتاتورلار - ارزان جۇمىس كۇشى. ءبىر جارىم ساعاتتىق ەفير ءۇشىن رەسەيدەگى ارىپتەستەرىمىز بىزدەن 85 ەسە كوپ اقشا الاتىنىن ايتساق تا جەتكىلىكتى. اقيقاتىنا سالساق، ءبىزدىڭ امبەباپ كوممەنتاتورلار ءبىر ويىندى، الدە ءبىر جارىستى جۇرگىزىپ كەلىپ، ەكىنشىسىنە دەيىن جاقسىلاپ دايىندالۋعا ءتيىس. ءبىز نە ىستەيمىز؟ نەگىزگى جۇمىسىمىزدىڭ شارۋاسىن اياقتايمىز، ۇيگە كەلىپ ازداپ دەمالىپ الىپ، كوممەنتاريگە تارتامىز. ەرتەڭىنە مۇلدە باسقا ەكى-ءۇش جارىس كۇتىپ تۇرادى. ءسويتىپ، بولەك-سالاق بولىپ جۇرگەندە، سىندى دا، بالاعات پەن رەنىشتى دە كوپ ەستيمىز. ءوزىڭىز ويلاپ كورىڭىزشى، ۋتكين، چەردانتسيەۆ، گەنيچ، ورلوۆ، روزانوۆ، شمۋرنوۆ سياقتى رەسەيلىك كوممەنتاتورلار فۋتبولدان باسقا سالاعا مويىن بۇرا ما؟ بولماسا، كۋرديۋكوۆ جازدا - ۆەلوجارىستى، قىستا بياتلوندى عانا جۇرگىزەدى. باسقا جاعىنا اتتاپ باسپايدى. ويتكەنى، ولار ءبىر عانا سالامەن وتباسىن، ءتىپتى بۇكىل اۋلەتىن اسىرايدى. ءبىزدىڭ ءبىر ايدا جۇرگىزگەن 4-5 ويىنىمىزدىڭ پايداسى پاتەراقى تولەۋدەن ءسال ارتىلاتىنىنا ءمازبىز. ءبىراق جىلاي بەرۋگە بولمايدى. ەلىمىزدەگى شىنايى جاعداي وسى. «نەگە ءبىزدى فۋتبول ماتچىنا عانا قويمايسىز؟» نەمەسە «نەگە ءبىزدىڭ ءبىر ماتچىمىزعا رەسەيدەگىدەي قالاماقى تولەمەيسىز؟» دەپ ەشكىمگە ايتا المايمىز. جاعداي بەلگىلى. بارىمەن - بازار. ونىڭ ۇستىنە، امبەباپ بولعاننان ءدال قازىر قازاق بالاسى ەش ۇتىلمايدى. ءبىزدىڭ كوممەنتاتورلار قازىر «ءيت ءمىنىپ، يرەك قامشىلاپ»، بولاشاققا جول سالىپ جاتىر. يگىلىگىن بالالارىمىز كورەدى، قاراپ تۇرىڭىزشى.

- قازىر تاڭدا وزىڭىزدەن كەيىنگى كوممەنتاتور بولعىسى كەلەتىن جاستار قاۋىمىنا نە ايتار ەدىڭىز؟

- وقۋدان، ىزدەنۋدەن ارتىق راقات كورمەدىم. قۇداي ءتىل بەردى دەپ بەزەي بەرسەڭىز، بەس كۇندە تاۋسىلادى. وقۋ كەرەك.

- اڭگىمەڭىزگە راحمەت!

اۆتور: كۇنسۇلتان وتارباي

سوڭعى جاڭالىقتار