ا ق ش- تا «كرەملدىڭ ساياساتىن جۇرگىزگەن» ايەل تۇتقىندالدى

 استانا. قازاقپارات - ا ق ش پروكۋرورلارى امەريكالىق كونسەرۆاتور ساياساتكەرلەرمەن، توپتارمەن «بايلانىسى بار» ايەلدى تۇتقىندادى. ول رەسەي ۇكىمەتىنىڭ «قۇپيا اگەنتى» دەپ كۇدىكتەلىپ وتىر.

16- شىلدە كۇنى ۆاشينگتون سوتىنىڭ پروكۋرورلارى جاريالاعان حابارلامادا 29 جاستاعى ماريا بۋتينا «امەريكالىق ساياساتكەرلەردىڭ كوڭىلىن كوتەرىپ، تىعىز قاتىناستا بولعان. وسى ارقىلى ا ق ش- تىڭ ۇلتتىق اتقىشتار قاۋىمداستىعىن، قارۋ-جاراققا مۇددەلى ءىرى ۇيىمداردى ىشتەي بىلۋگە تىرىسقان. جۇمىسى جايلى ماسكەۋدەگى شەنەۋنىكتەرگە ەسەپ بەرىپ وتىرعان» دەپ جازىلعان.

ا ق ش مەملەكەتتىك ايىپتاۋشىلارى بۋتينا «2015-جىلى جازعان ەلەكتروندى حاتىندا قارۋ-جاراق قاۋىمداستىعىن ا ق ش- تاعى كونگرەسس سايلاۋىنىڭ «ءىرى قولداۋشىسى» دەپ باعالاعانىن، رەسەي وسى قاۋىمداستىقپەن بايلانىس ورناتۋى كەرەك» دەپ جازعانىن» ايتادى.

«قارۋ ۇستاۋ ەركى» قۇقىق قورعاۋ ۇيىمىنىڭ نەگىزىن سالعان بۋتينا ءىسى حەلسينكيدە دونالد ترامپ پەن ۆلاديمير پۋتيننىڭ كەزدەسۋىنەن سوڭ بەلگىلى بولدى.

پروكۋرورلار بۋتينانىڭ ارەكەتىن «ا ق ش ساياساتىندا رەسەي مۇددەسىنىڭ ەسكەرىلىپ وتىرۋىنا ارەكەت ەتتى، ونىڭ ىشىندە 2014-جىلى سالىنعان سانكسيالاردى جۇمسارتۋعا كۇش سالدى» دەپ سيپاتتايدى.

FreedomFest ۇيىمىنىڭ YouTube كانالىنا جۇكتەگەن ۆيدەوسىندا بۋتينا لاس-ۆەگاستاعى جيىن كەزىندە - 2015-جىلدىڭ شىلدەسىندە ترامپتان «پرەزيدەنت بولىپ سايلانساڭىز، رەسەيگە قاتىستى سانكسيا ساياساتىن جالعاستىراسىز با؟» دەپ سۇراعان.

«ازاتتىق»