پۋتين ۋكراينانىڭ ناتوعا «قوسىلۋىنان» قاۋىپتەنەدى

استانا. قازاقپارات - رەسەي پرەزيدەنتى ۆلاديمير پۋتين «ۋكراينا مەن گرۋزيا ناتوعا قوسىلسا رەسەي قاۋىپسىزدىگىنە قاتەر توندىرەدى» دەپ سانايدى.

بۇل تۋرالى ول دونالد ترامپپەن كەزدەسۋىنەن كەيىن امەريكالىق Fox News ارناسىنا بەرگەن سۇحباتىندا ايتتى.

جۋرناليست كريس ۋوللەسپەن اڭگىمەسىندە پۋتين «2014-جىلى قىرىم ستاتۋسىنا قاتىستى تۇبەكتە رەفەرەندۋم وتكىزگەنىن»، سوندىقتان ونىڭ اننەكسيالاپ الۋ جاعدايىن «دەموكراتيا كورىنىسى» دەپ ەسەپتەيتىنىن ايتادى.

پۋتين سۇحباتتا ماسكەۋدىڭ ا ق ش- تاعى سايلاۋعا ارالاسپاعانىن جانە ءبىر مارتە قايتالادى.

ول بيىلعى ناۋرىزدا «سارمات» زىمىرانىنىڭ تانىستىرىلىمىندا قولدانىلعان پرەزەنتاتسيادا «يادرولىق بومبانىڭ فلوريداعا سوققى جاساعانىن» جوققا شىعاردى. «ول جەردە «فلوريدا» دەپ جازىلىپ تۇرعان جوق ەدى. زىمىران شاردىڭ باسقا ءبىر بۇرىشىنا ۇشىپ بارا جاتقانى انىق كورىنىپ تۇر»، - دەدى رەسەي پرەزيدەنتى.

جۋرناليستىڭ «پۋتيننىڭ كوپ قارسىلاسى نەگە قايتىس بولىپ كەتەدى؟» دەگەن سۇراعانى رەسەي پرەزيدەنتى «ا ق ش- تىڭ ءوز پروبلەماسى جەتىپ جاتىر» دەپ جاۋاپ بەرگەن. ءبىراق «كريمينالدىڭ ارا-تۇرا بايقالاتىنىن»، بۇعان «ەلدىڭ «مەملەكەت رەتىندە قالىپتاسۋدىڭ بەلگىلى ءبىر دەڭگەيىندە تۇرعانى سەبەپ» دەپ ءتۇسىندىردى.

16- شىلدەدە ترامپ پەن پۋتين حەلسينكيدە وڭاشا كەزدەسىپ، كەيىن بىرىگىپ باسپا ءسوز كونفەرەنتسياسىن وتكىزگەن. ترامپ ا ق ش پەن رەسەي قاتىناسىنىڭ «ناشارلاۋىنا» امەريكانى كىنالاپ، ماسكەۋدى «2016-جىلعى سايلاۋعا ارالاستى» دەپ ايىپتاعان بارلاۋ قىزمەتىنىڭ تەرگەۋىن «قاسىرەت» دەپ اتاعان. ترامپتى سەناتورلار مەن ساياساتكەرلەر «پۋتيننىڭ الدىندا جۇرەكسىندى» دەپ جاپپاي سوككەن.

«ازاتتىق»