تايلاندتا اداسىپ كەتكەن بالالار قۇتقارىلعان ۇڭگىرگە ەندى كىرۋگە بولمايدى
اتالعان ۇڭگىرگە ەندى سەيسەنبىدەن باستاپ كىرۋگە بولمايدى، دەپ دەپ حابارلادى تايلاندتىڭ ءۇشىنشى ۇلتتىق ارناسى.
ر ي ا نوۆوستي اگەنتتىگىنىڭ حابارلاۋىنشا، 18 كۇنگە سوزىلعان قۇتقارۋ وپەراتسياسى ناتيجەسىندە ۇڭگىرگە سۋ سورعىتۋ ءۇشىن كيلومەترگە سوزىلاتىن پلاستيك قۇبىرلار مەن ءورت ءسوندىرۋ قۇرالدارى جەتكىزىلگەن. ۇڭگىردىڭ العاشقى ۇلكەن ءۇش كامەراسىنا ارنايى قۇرىلعىلار ورناتىلدى، ونىڭ ىشىندە ەلەكترلى ناسوستار دا بار. سول جەردە وپەراتسيانىڭ ۋاقىتشا كوماندالىق پۋنكتى ورنالاستى.
وعان قوسا، ۇڭگىر اۋماعىندا جەراستى سۋىن سورعىتۋ مەن سۋدىڭ ۇڭگىردىڭ ىشىنە كىرۋىنە جول بەرمەۋ ماقساتىندا جۇزدەگەن ارتەزيان ۇڭعىمالارى قازىلدى. الداعى اپتالاردا جەراستى دالىزدەرىنەن بارلىق قۇرىلعىلار الىنىپ تاستايدى. ال ارتەزيان ۇڭعىمالارىنىڭ كوپشىلىگى جابىلادى، دەپ حابارلايدى تەلەارنا چيانگاراي پروۆينتسياسىنىڭ اكىمشىلىگىنە سىلتەمە جاساي وتىرىپ.
قالپىنا كەلتىرۋ جۇمىستارىنان سوڭ ۇگىرگە كىرۋگە تىيىم سالىنادى. ۇڭگىردە قالىپتى تابيعي ۇدەرىستەر باستالمايىنشا، شەكتەۋ الىنبايدى، دەلىنگەن حابارلامادا.
دۇيسەنبى كۇنى ۇڭگىردىڭ اۋزىندا مەكتەپ وقۋشىلارى مەن ولاردىڭ باپكەرلەرىنىڭ امان قالعانى ءۇشىن ارۋاقتارعا ريزاشىلىق ءبىلدىرىلدى. سونىمەن قاتار جينالعاندار وپەراتسيا بارىسىندا مەرت بولعان سارباز سامان كۋناندى ەسكە الدى.
وسى شارا بارىسىندا چيانگاراي پروۆينتسياسى اكىمشىلىگىنىڭ تايلاند ۇكىمەتىنە تحام لۋانگ ۇڭگىرىنە جالپى مەملەكەتتىك دەڭگەيدەگى ۇلتتىق پارك مارتەبەسىن بەرۋ تۋرالى ءوتىنىش جولداعانى جاريا ەتىلدى.
قازىرگى تاڭدا ۇڭگىر مەن ونىڭ اينالاسى پروۆينتسيالىق مارتەبەسى بار دوي نانگ نون قورىعىنىڭ اۋماعىندا. قورىقتىڭ مارتەبەسىن كوتەرۋ بولاشاقتا تحام لۋانگ ۇڭگىرىن قالىڭ كوپشىلىك ءۇشىن قولجەتىمدى تۋريستىك نىسانعا اينالدىرۋعا مۇمكىندىك تۋدىرادى. ال ازىرگە ۇڭگىرگە تەك ارنايى دايىندالعان تۋريستەر عانا كىرىپ ءجۇر.
ۇڭگىر تۋريستەر ءۇشىن كۇن جىلى كەزدە عانا اشىق بولادى. وندا بولاشاقتا قۇتقارۋ وپەراتسياسى مۋزەيى مەن ۇڭگىرلەردەن قۇتقارۋشى دايۆەرلەردى دايىندايتىن حالىقارالىق پوليگون ورنالاساتىن بولادى.