قاربىزدىڭ قانشا ءتىلىمى دەنساۋلىققا قاۋىپسىز؟

پەتروپاۆل. قازاقپارات - قاربىزدىڭ قانشا ءتىلىمىن جەگەن ءجون جانە ونداعى نيتراتتاردى قالاي انىقتاۋعا بولادى؟ بۇل جونىندە سولتۇستىك قازاقستان وبلىسى بويىنشا قوعامدىق دەنساۋلىقتى ساقتاۋ دەپارتامەنتىنىڭ باسشىسى سەرىكباي قاسماقاسوۆ ايتىپ بەردى، دەپ حابارلايدى قازاقپارات ءتىلشىسى.

ءوڭىردىڭ باس سانيتارلىق دارىگەرى جەمىس-كوكونىس ونىمدەرىن باقىلاۋدىڭ ماڭىزدىلىعى جوعارى ەكەنىن اتاپ ءوتتى. اسىرەسە بازارلاردا باقشا ونىمدەرى ساتىلا باستاعان كەزدى نازاردان تىس قالدىرماعان ءجون. ادەتتە ولار شىلدەنىڭ سوڭى مەن تامىزدىڭ باسىندا پىسەدى. الايدا قازىردىڭ وزىندە بارلىق بازارلار مەن ساۋدا ورىندارى قاربىز بەن قاۋىنعا تولىپ تۇر. اسىرەسە، جاڭا پىسكەن قيارلار، قىزاناقتار، اسقا پايدالانىلاتىن شوپتەر پايدا بولدى. ولاردىڭ بارلىعىندا ازوت قىشقىلىنىڭ نيتراتتارى بولۋى مۇمكىن. وندىرۋشىلەر ازوتتى تىڭايتقىشتاردى جەمىستەردىڭ جىلدام ءوسۋى ءۇشىن كوپ مولشەردە پايدالانۋى ىقتيمال.

وبلىسقا وسىمدىك ونىمدەرىنىڭ جەتكىزىلۋىنە باقىلاۋدى «فيتوسانيتاريا» زەرتحاناسى جۇرگىزەدى. ولار قالانىڭ ءىرى ساۋدا بازارلارىندا ورنالاسقان. ءبىرىنشى جارتىجىلدىقتا زەرتحانا 1,4 مىڭ تالداۋ جاساعان، ال ءبىزدىڭ ساراپتاما ورتالىق 800 مىڭ تالداۋ جۇرگىزدى.

دەگەنمەن، باس سانيتارلىق دارىگەر قاربىزداعى از عانا نيتراتتىڭ ءوزى ادام دەنساۋلىعىنا ۇلكەن قاۋىپ ءتوندىرۋى مۇمكىندىگىن ەسكەرتەدى.

«باقشا داقىلدارىنىڭ زەرتحانالىق تۇرعىدان بەلگىلى ءبىر نورماتيۆتەرى بولادى. مىندەتتى تۇردە قۇرامىندا ازداعان نيتراتتار كەزدەسەدى. 2-3 ادامنان تۇراتىن وتباسىلار ءۇشىن 8 كەلىلىك قاربىز - تىم كوپ بولادى. ەگەر ءبىر مەزەتتە جەپ تاستايتىن بولسا، اعزاداعى نيتراتتار مولشەرىنىڭ جوعارىلاۋىنا الىپ كەلەدى. ءار نارسەدە شەكتەۋ بولۋى كەرەك. جالپى، قاربىزدىڭ ەكى ءتىلىمىن عانا جەگەن ابزال»، - دەدى س. قاسماقاسوۆ.

نيتراتتاردى كوكونىستەردى سۋعا سالۋ ارقىلى جويۋعا بولادى. ولاردىڭ مولشەرى ىستىق سۋمەن وڭدەۋ كەزىندە ازايادى. سانيتارلىق دارىگەرلەردىڭ ايتۋىنشا، تازا كوكونىستەردىڭ وزىندە جاعىمسىز ءيىس بولۋى مۇمكىن. جالپى، حيميكاتتاردىڭ قولدانۋىنسىز ساياجايلاردا وسىرىلگەن جەرگىلىكتى ونىمدەردى تۇتىنعان ابزال.

س. قاسماقاسوۆ پەتروپاۆلداعى جابايى ساۋدانى رەتكە كەلتىرۋ كەرەك دەپ سانايدى. ءدال قازىر ساۋداگەرلەر ونىمدەرىن جولدىڭ بويىنا شەيىن اپارىپ ساتۋدا.

«بىزدە بازارلار مەن بوس تۇرعان جەرلەر بار. ولاردى ساياجاي يەلەرىنە ونىمدەرىن شىعارا الۋ ءۇشىن بەرۋ كەرەك. ادامداردىڭ باسىم بولىگى تابيعي جولمەن ساياجايدا وسىرىلگەن ونىمدەردى ساتىپ الادى. ول جەرلەردە زەرتحانا دا اشىپ قويۋعا بولادى. جەرگىلىكتى اتقارۋشى بيلىك وسى ءىستى قولعا الۋى كەرەك. تابيعي ساۋدادان قۇتىلا المايمىز، سوندىقتان ءبىر رەتكە كەلتىرگەن ءجون»، - دەدى باس سانيتارلىق دارىگەر.