بۇكىل ەلدى شۋلاتقان: قازاقستانداعى ەڭ كوپ تالقىلانعان تويلار

 استانا. قازاقپارات - قازاق ەرتەدەن باستاپ ءار قۋانىشىن دۇركىرەتىپ تويلاعان حالىق. ءبىراق بۇگىنگى كۇنى تويدىڭ تۇپكى ماعىناسى وزگەرىپ بارا جاتقان سياقتى.

كەيبىر قازاقتار حايپ قۋىپ، تويدى جاقىندارى مەن دوستارىڭنىڭ اراسىندا ابىرويىن ارتتىرۋ ءۇشىن وتكىزەدى دەسەك، ارتىق ايتقانىمىز ەمەس.

Stan.kz اقپاراتتىق اگەنتتىگى نازارلارىڭىزعا ەلىمىزدە وتكەن ەڭ شۋلى تويلارمەن تانىسىپ شىعۋعا كەڭەس بەرەدى.

«حوچۋ ك مەلادزە»، «قازاقستان داۋىسى» جوبالارى ارقىلى تانىلىپ، ءوز تىڭدارمانىن تاپقان MAKVIN (نۇربولات بازاربايەۆ) اتتى ءانشى جاقىندا شاڭىراق كوتەردى. الەۋمەتتىك جەلى پايدالانۋشىلارىنىڭ ءبىر بولىگى نۇربولاتقا جىلى لەبىزدەرىن ءبىلدىرىپ، جاس جۇبايلارعا باقىت تىلەپ جاتتى. ال ەكىنشى بولىگى توي الدىندا شاشىن تاقىرلاپ الىپ تاستاعان قالىڭدىقتى سىننىڭ استىنا الدى.

 

نۇربولاتتىڭ سوزىنە سەنسەك، ونىڭ ايەلى جانيا شاشىن تويعا 10 كۇن قالعاندا قىسقارتقىسى كەلدى. ونى ەشكىم بۇل قادامعا بارۋعا ماجبۇرلەمەگەن جانە ونىڭ ءىس-ارەكەتىندە ەشقانداي استارلى ماعىنا جوق. ايتسە دە جەلى قولدانۋشىلارى نۇربولاتتىڭ سوزىنە سەنبەي، جانيانىڭ ينستاگرامداعى پاراقشاسىنا كىرىپ، جاس ارۋدان شاشىن نەلىكتەن الىپ تاستاعانىن سۇراۋدان جالىعار ەمەس. «ادامدار مۇنداي قادامعا قۇردان- قۇر بارمايدى. شاشتى الىپ تاستاۋىنىڭ ءارتۇرلى سەبەپتەرى بولادى، زورلىق تا سول سەبەپتەردىڭ قاتارىنا كىرەدى. ءسىزدىڭ سەبەبىڭىز باسقا دەپ ويلايمىن. %100.

ءوزىڭىزدىڭ ىشكى دۇنيەڭىزدە قانداي ماسەلەنى شەشە الماي جۇرگەنىڭىزدى انىقتاڭىز. ءسىزدىڭ قولىڭىزدان كەلەدى. ءسىز مىقتىسىز» دەپ جازىپتى جەلى قولدانۋشىسى. جانيا كۇيەۋى نۇربولات سەكىلدى ونەر ادامى، ەندىگى كەزەكتە ول حالىقتى تاقىر باسىمەن ەمەس، ونەرىمەن ءتانتى ەتۋدى جوسپارلاپ وتىر.

 

قانات پەن گوززال اتتى جاس جۇبايلاردىڭ تويى دا الەۋمەتتىك جەلىنى شۋلاتقان بولاتىن. العاشقىدا جۇرت 35 جاستاعى جىگىت وزىنەن وتىز جاسقا ۇلكەن ايەلگە ۇيلەندى دەپ شۋلاستى. ال شىندىعىنا كەلگەندە، قانات پەن گوززال جاستى بولىپ شىقتى. ەكەۋى دە 1983 -جىلى تۋىلعان. اكەدەن ەرتە ايىرىلعان قانات انا مەيىرىمىن كورمەگەن گوززالمەن الەۋمەتتىك جەلى ارقىلى تانىسقان. سەگىز اي ءبىر-بىرىمەن سويلەسىپ، ەكەۋى شاڭىراق كوتەرۋدى ۇيعارعان. قانات گوززالداي ايەلدى تاپقانى ءۇشىن باقىتتى ەكەنىن ايتىپ، جەلىدەگى جالعان اقپاراتتىڭ بارلىعىن جوققا شىعاردى.

 

بىرەۋ تويىنا قازاق ەستراداسىنىڭ بارلىق جۇلدىزدارىن، ەكىنشىسى امەريكانىڭ بەيونسە، كانە ۋەست سىندى انشىلەردى شاقىرىپ حالىقتى تاڭعالدىرىپ ءجۇر. ءبىراق باعاسى 179 مىڭ دوللار تۇراتىن تورت ەشكىمنىڭ تويىندا بولماعان. راسىندا، رەسەيلىك تانىمال كونديتەر رەنات اگزاموۆتىڭ وسى تورتى قازاقستاندىقتاردى تاڭداندىردى. كونديتەر بولسا تورتتى شىمكەنتتىك وليگارحتىڭ تويىنا پىسىرگەنىن ايتقان بولاتىن. وسىدان كەيىن قاراپايىم حالىقتان باستاپ قوعام بەلسەندىلەرى تورت جايلى پىكىرلەرىن بىلدىرۋگە اسىقتى. ءتىپتى، ولار وليگارحتىڭ بۇل ءىسىن الەمدەگى ەڭ باي ادامداردىڭ قاتارىنا كىرەتىن بيلل گەيتس، مارك سۋكەربەرگ سىندى ميللياردەرلەردىڭ ءىس- ارەكەتتەرىمەن سالىستىردى. وليگارحقا ءدال سولار سەكىلدى قاراپايىم بولۋعا كەڭەس بەردى.

توي شىمكەنتتىڭ Rixos قوناق ۇيىندە ءوتتى. تويعا جاستارعا باقىت تىلەپ بوكسشى گەننادي گولوۆكين كەلگەن بولاتىن.

 

ءۇش جىل بۇرىن ايەلىنەن ايىرىلىپ، جاقىندا ەكىنشى رەت شاڭىراق كوتەرگەن اباي بەگەيدى حالىق سىننىڭ استىنا الدى. الەۋمەتتىك جەلىدە وقىرمانداردىڭ ءبىر بولىگى ءانشىنى قۋانىشىمەن قۇتتىقتاسا، ەكىنشى بولىگى وزىنەن بىرنەشە جاس كىشى قىزعا ۇيلەنىپ، توي جاساعانىن ۇيات نارسە دەپ تاپتى. دەگەنمەن ءانشىنىڭ ساحناداعى ارىپتەستەرى اباي بەگەيدى جاقتاپ، ونىڭ تەڭىن تاپقانىنا شىن جۇرەكتەن قۋانىشتى ەكەندەرىن ايتتى.

اسحات تارعىننىڭ سوزىنشە، جاس جۇبايلار ءبىر-بىرىمەن قوستانايدا، دوستارىنىڭ تويىندا تانىسقان. اباي بەگەي فاريزامەن ءبىر جىل سويلەسىپ، اقىرىندا ۇيلەنۋگە بەل بۋعان. تويدىڭ جاقسى وتكەنىنە اسحات تارعىننىڭ مىنا سوزدەرى دالەل بولا الادى:

«كەشەگى توي وتە جوعارى دەڭگەيدە ءوتتى. ابايدىڭ ونەردەگى اعالارى كەلىپ، تىلەكتەرىن ايتتى. فاريزا دا، اباي دا سويلەسىپ، ورتاقتاسىپ شەشكەن دۇنيە. ەشقانداي دا زورلىق تا، قورلىق تا جوق. ەكەۋى ءبىر-ءبىرىن ءبىلىپ بارىپ ۇيلەندى»، - دەيدى ءانشى.