مينيستر مۇحامەدي ۇلى تانىمال انشىلەردىڭ ماگيستراتۋرادا وقۋىنا قاتىستى پىكىر ءبىلدىردى
«مەن جاقىندا قايرات نۇرتاس، مەيرامبەك بەسپايەۆ ماگيستۋرانى وقىپ بىتىرگەنى جايىندا ماقالا وقىدىم. «ولار نە ءۇشىن وقىپ ءجۇر؟» دەگەن سىني پىكىرلەردى كوزىم شالدى. نەگىزى بۇل - وتە قۋانىشتى جاعداي. شىعارماشىلىق ادامدار ۇنەمى بىلىمگە قۇشتار بولىپ كەلەدى. مىسالى، ساكەن مايعازيەۆ تەمىربەك جۇرگەنوۆ اتىنداعى ونەر اكادەمياسىنىڭ دوكتورانتۋراسىندا وقىپ ءجۇر. بۇل وڭاي شارۋا ەمەس»، - دەدى ا. مۇحامەدي ۇلى استانادا «باستاۋ» دومبىراشىلار توبىمەن كەزدەسۋىندە.
ءمينيستردىڭ ايتۋىنشا، بۇل جەردە ونەر ادامدارىنىڭ ءبىلىم الۋعا دەگەن قۇلشىنىستارى ماڭىزدى.
«بىزدە وقۋىن جالعاستىرىپ جۇرگەن ونەر ادامدارىنىڭ ىشكى نەگىزى قالىپتاسقان. ماسەلەن، مەيرامبەك بەسپايەۆ كۇلاش بايسەيىتوۆا اتىنداعى مۋزىكالىق مەكتەپتى اياقتاعان. ت. جۇرگەنوۆ اتىنداعى اكادەميادا وقىعان. كەيىنىرەك، ول لەۆ گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ماگيستراتۋراسىن ءبىتىردى. ال قايرات نۇرتاس الماتىدا ەسترادالىق سيرك كوللەدجىندە تانىمال پەداگوگ لاكي كەسوگلۋدان ءدارىس العان. استاناعا قونىس اۋدارىپ، ەۋرازيا ۇلتتىق ۋنيۆەرسيتەتىندە ماگيستراتۋرادا وقىدى. بۇل وتە جاقسى كورسەتكىش. سەبەبى، بۇل شىعارماشىلىق ادامدارىنىڭ بىلىمگە دەگەن قۇشتارلىعىن، العا ۇمتىلىسىن بىلدىرەدى. ايتپەسە ولار «ءومىرىم ونسىز دا جاقسى عوي. وقۋدىڭ نە قاجەتى بار» دەپ ايتا الار ەدى عوي. وسى ورايدا، ينتەللەكتۋالدى شىعارماشىلىق ورتامىزدىڭ بارىن ماقتان تۇتۋىمىز كەرەك»، - دەدى مينيستر.
ايتا كەتەيىك، فيلولوگيا عىلىمدارىنىڭ كانديداتى، ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تەلەراديو جانە قوعاممەن بايلانىس كافەدراسىنىڭ دوتسەنتى مىرزانتاي جاقىپ فەيسبۋكتەگى پاراقشاسىندا ءانشى جانە تەلەجۇلدىزداردىڭ ۇلتتىق ۋنيۆەرسيتەتتەردىڭ ماگيستراتۋرالارى مەن PhD دوكتورانتۋرالارىنا مەملەكەتتىك ءبىلىم گرانتتارى بويىنشا وقۋعا ءتۇسىپ جاتقانىن سىنعا العان ەدى. وعان «مادەنيەت تانۋ» ماماندىعى بويىنشا ماگيستر ديپلومىن قورعاعان مەيرامبەك بەسبايەۆ جاۋاپ بەردى.
قازاقپارات اگەنتتىگىنە جولداعان پىكىرىندە مىرزانتاي جاقىپ توي-تومالاقتاردان كوپ قارجى تاباتىن انشىلەر مەن تەلەجۇلدىزداردىڭ ج و و ماگيستراتۋرالارى مەن PhD دوكتورانتۋرالارىندا ءوز قاراجاتتارىنا وقۋىن، شىن دارىندى جاستارعا ارنالعان مەملەكەتتىك ءبىلىم گرانتتارىنا تالاسپاۋىن جازدى.