استانا اۆتوبۋستارىندا جولاۋشىلاردىڭ ءمىنىپ-ءتۇسۋ ءتارتىبى وزگەرەدى

استانا. قازاقپارات - استانادا قوعامدىق كولىكتەرگە ارنالعان كولىك كارتاسى كوپتەپ ساتىلعان سوڭ، كوندۋكتورلاردىڭ لاۋازىمى بىرتىندەپ قىسقارا باستايدى، دەپ حابارلايدى قازاقپارات ءتىلشىسى.

«2018 -جىلدىڭ 21 -شىلدەسىندە ديففەرەنسيالدى تاريف ەنگىزىلەتىن بولعاندىقتان، كوندۋكتورلار بىرتىندەپ جۇمىستان شىعا باستايدى. بارلىق كوندۋكتوردى بىردەن جۇمىستان بوساتا المايمىز، سەبەبى كولىك كارتاسىن بارلىعى الىپ ۇلگەرگەن جوق، قولما-قول اقشامەن ەسەپتەسەتىن جولاۋشىلار ءالى دە بار. 1-17 -شىلدە ارالىعىندا، ياعني ەكى اپتادا 42 مىڭ كارتا ساتىلدى. بۇعان دەيىن 40 مىڭ كارتانى ءۇش ايدا ساتاتىنبىز. قازىر اپتاسىنا 20 مىڭ كارتادان ساتىلادى»، - دەپ اتاپ ءوتتى «استانا LRT»  كومپانياسىنىڭ باسپا ءسوز حاتشىسى ناۋات ازانبايەۆا قازاقپارات تىلشىسىنە بەرگەن سۇحباتتا.

ونىڭ ايتۋىنشا، جۇمىستان بوساتىلعان كوندۋكتورلار كەڭەسشى بولا الادى.

«جولاۋشىلاردىڭ %70 استامى كولىك كارتاسىن يەلەنگەن سوڭ، كوندۋكتورلار قىزمەتى جويىلادى. ءبىراق، ولاردى جۇمىستان شىعارمايمىز، جولاقى تولەۋدىڭ اقپاراتتىق جۇيەسى بويىنشا كەڭەسشى ەتىپ تاعايىندايمىز. ولار اقپاراتتىق جۇيەنى قالاي قولدانۋ قاجەتتىگىن، تەڭگەرىمدى قالاي تەكسەرۋ كەرەكتىگىن ۇيرەتەدى. ءبىراق، ولار جولاۋشىدان ەشنارسە تالاپ ەتە المايدى، بۇل ءۇشىن كولىكتىك باقىلاۋ جۇيەسى مەن جەلىلىك باقىلاۋ قىزمەتى بار»، - دەپ ءتۇسىندىردى باسپا ءسوز حاتشىسى.

سونداي-اق، قوعامدىق كولىكتەردە جولاۋشىلاردى مىنگىزىپ-ءتۇسىرۋ ءتارتىبى دە وزگەرەدى.

«كوندۋكتورلار كەتەتىن بولعاندىقتان، جولاۋشىلار اۆتوبۋسقا ءمىنىپ-ءتۇسۋ مادەنيەتىن قالىپتاستىرۋى ءتيىس. ورتاڭعى ەسىك مۇمكىندىگى شەكتەۋلى جانە قولارباسى بار جولاۋشىلارعا ارنالعان. ال باسقا جولاۋشىلار الدىڭعى ەسىكتەن كىرىپ، ارتقى جانە ورتاڭعى ەسىكتەن تۇسكەندەرى ءجون»، - دەدى ناۋات ازانبايەۆا.