سۋدا شومىلۋ قاۋىپسىزدىگىنىڭ ەرەجەلەرى قانداي

استانا. قازاقپارات - جاز ماۋسىمىنداعى كۇننىڭ ىستىعىندا سۋعا، سونىڭ ىشىندە شاعىن توعاندار، وزەن-كولدەرگە ءتۇسىپ، دەمالۋشىلار سانى ارتاتاتىنى بەلگىلى.

بۇل رەتتە شومىلۋ ورىندارىندا بولاتىن قايعىلى وقيعالاردىڭ سانى دا ارتا تۇسەتىنى انىق. وسىعان بايلانىستى دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ ۇلتتىق ورتالىعىنىڭ ماماندارى شومىلۋ ماۋسىمىندا قانداي ەرەجەلەر ۇستانۋ قاجەتتىگى تۋرالى ايتىپ بەردى، دەپ حابارلايدى قازاقپارات.

«شومىلۋ ماۋسىمىندا وقىس وقيعالاردان تۋىندايتىن قاۋىپتىلىك دەڭگەيى جوعارى دارەجەدە قالا بەرەدى. بۇل جەردە ءبىرىنشى كەزەكتە اسىرەسە بالالار قاۋىپسىزدىگىنە بارىنشا نازار اۋدارىلۋى ءتيىس. جالپى جۇرت سۋعا كەتۋ وقيعاسىن - سۋدىڭ ورتاسىندا تۇنشىققان ادامنىڭ ايقايلاپ قۇتقارۋشىلاردى كومەككە شاقىرۋى دەپ ەلەستەتەدى، ال نەگىزىندە بۇل ولاي ەمەس، كەرىسىنشە سۋعا كەتۋ ءبىرشاما تىنىش پروتسەسس. سوندىقتان دا، سۋعا تۇسەردە ەرەجەلەردى ساقتاپ، وزىڭە دە، اينالاڭا دا مۇقيات بولۋ كەرەك. سۋدا ويناپ، شومىلىپ جۇرگەن بالالار تىنىمسىز بولاتىنىن ەستەن شىعارماۋ كەرەك. ال ولار تىنىشتالىپ قالسا دەرەۋ الاڭداپ، كومەككە ۇمتىلۋ قاجەت»، - دەيدى ورتالىق ساراپشىلارى.

سونىمەن قاتار، ساراپشىلار سۋداعى، سۋ جاعاسىنداعى دەمالىس بارىسىندا ەستە بولۋى ءتيىس قاۋىپسىزدىك شارالارىن دا العا تارتىپ وتىر. ماسەلەن، ولار سۋعا كەتۋ وقيعاسىنىڭ الدىن الاتىن 6 ەرەجەنى ەسكەرتەدى:

1. مەكتەپكە دەيىنگى جاستاعى بالالار ءۇشىن سۋلاردان الىسىراق قاۋىپسىز الاڭداردى، وينايتىن ورىنداردى قامتاماسىز ەتۋ.

2. بالالاردىڭ ابايسىزدا سۋعا ءتۇسىپ كەتۋىنەن ساقتايتىن قورشاۋلار ورناتۋ.

3. مەكتەپ جاسىنداعى بالالاردى (6 جاستان جوعارى) ءجۇزۋ داعدىلارىنا، سۋداعى قاۋىپسىزدىك ەرەجەلەرىنە ۇيرەتۋ، وقىتۋ.

4. سۋ تاسقىنى جانە باسقا دا قاتەرلەر تۋىنداعاندا جاسالاتىن شارالارعا ۇيرەتۋ.

5. سۋعا كەتكەندەردى قۇتقارۋ، ولارعا العاشقى كومەك كورسەتۋ داعدىسىنا ۇيرەتۋ.

6. قايىقتاردى، كەمەلەر مەن پارومداردى پايدالانۋدا قاۋىپسىزدىك ەرەجەلەرىن ساقتاۋ.