استاناداعى انا ءولىمى: ءبىرتانوۆ پەن يسەكەشەۆ پرەمەر-مينيستر الدىندا جاۋاپ بەردى

استانا. قازاقپارات - ۇكىمەتتىڭ بۇگىنگى وتىرىسىندا ق ر پرەمەر-ءمينيسترى باقىتجان ساعىنتايەۆ ق ر دەنساۋلىق ساقتاۋ ءمينيسترى مەن استانا قالاسىنىڭ اكىمىنەن ەلوردا پەرزەنتحاناسىنداعى انا ءولىمىنىڭ سەبەبىن سۇرادى، دەپ حابارلايدى قازاقپارات ءتىلشىسى.

دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا، بارلىق قاجەتتى تەكسەرۋ جۇمىستارى ءجۇرىپ جاتىر.

«بارلىعى شىلدە ايىندا بولعاندىقتان، پاتولوگيالىق، اناتوميالىق، مورفولوگيالىق زەرتتەۋلەر جۇرگىزىلىپ جاتىر، زەرتتەۋ جۇمىستارى بىتكەن سوڭ تولىق اقپارات بەرەمىز. جالپى قازىر استانا قالاسىنداعى امبۋلاتوريالىق دەڭگەيدە ايەلدەرگە قانداي قىزمەت كورسەتىلگەنىن تەكسەرىپ جاتىرمىز. ارنايى شتاب قۇرىلعان. استانا قالاسىنىڭ اكىمدىگىمەن بىرگە جۇمىس ىستەپ جاتىرمىز. مۇندا ۇلكەن ماسەلەلەر بار دەپ ايتۋعا بولمايدى، كەي جاعدايدا بارلىعى ايەلدەردىڭ ءوز دەنساۋلىعىنا بايلانىستى بولادى. پەريناتالدىق ورتالىققا تەكسەرۋ جۇمىستارىن جۇرگىزدىك. سانيتاريالىق، ەپيدەميالىق رەجيمدە ءبارى دۇرىس. ءارى قاراي جۇمىس ىستەيمىز جانە قوسىمشا اقپارات بەرەمىز»، - دەدى ەلجان ءبىرتانوۆ ۇكىمەت وتىرىسىندا.

سونداي-اق، استانا قالاسىنىڭ اكىمى اسەت يسەكەشەۆ تە قايعىلى وقيعا بويىنشا پرەمەر-مينيستر الدىندا جاۋاپ بەردى.

«بارلىق جاعدايلار بويىنشا جەتەكشى مەديتسينالىق ورتالىق ماماندارىنىڭ قاتىسۋىمەن كونسيليۋم وتكىزىلدى جانە بارلىعى دەنساۋلىق ساقتاۋ مينيسترلىگىمەن تالقىلانىپ، ناقتى ءىس-ارەكەت جوسپارى ءتۇزىلدى. سونداي-اق، تاۋەلسىز ساراپتاما جۇرگىزۋ ءۇشىن جانە اكۋشەرلىك-گينەكولوگيالىق كومەك ءۇشىن ەۋروپانىڭ مىقتى دەپ سانالاتىن ماماندارىن شاقىرىپ وتىرمىز. ماسەلە باقىلاۋدا»، - دەدى اسەت يسەكەشەۆ.

ايتا كەتەيىك، كەشە استانانىڭ 2№ پەريناتالدى ورتالىعىندا بوسانعان كەلىنشەك كوز جۇمدى. دارىگەرلەر شاقالاقتى امان الىپ قالدى.

وعان دەيىن ەلورداداعى 1№ پەريناتالدىق ورتالىقتا ءۇش ايەل كوز جۇمعان ەدى.