ىستىقكولدەگى فەستيۆال كەزىندە بۇركىت قىزعا شابۋىل جاسادى

بىشكەك. قازاقپارات - ىستىقكول وبلىسىنداعى تون اۋىلىندا ءوتىپ جاتقان «تەسكەي جەەك» فەستيۆالى كەزىندە 10 جاسار قىزعا بۇركىت شابۋىل جاسادى، دەپ حابارلايدى «كابار» اگەنتتىگى.

ءمالىم بولعانداي، ول 15- شىلدە كۇنى اۋماقتىق اۋرۋحاناعا تۇسكەن.

«كەزەكشى دارىگەرلەر قىزدىڭ بۇركىتتىڭ تىرناعى جارالاعان باسى مەن كەۋدەسىنە حيرۋرگيالىق وڭدەۋ جاسادى. جاعدايى تاۋىر»، - دەپ حابارلادى اۋرۋحانادان.

ىستىقكول وبلىستىق ءى ءى ب باسپا ءسوز قىزمەتىنىڭ حابارلاۋىنشا، وقىس وقيعا ءداستۇرلى «سالبۋۋرۋن» اڭ اۋلاۋ شاراسى كەزىندە بولعان. جالعىز اياق جولدى قىز كەسىپ وتكەن شاقتا بۇركىت شۇيلىككەن.

ەسكە سالا كەتسەك، فەستيۆال باعدارلاماسىنا كوشپەندىلەردىڭ ات سپورتى تۇرلەرى، تەڭگە ءىلۋ جانە قىز قۋۋ، «سالبۋۋرۋن»، ساداقشىلار سايىسى جانە «كوك-بورۋ» كوماندالارىنىڭ باسەكەسى ەنگەن. سونداي-اق، قولونەرشىلەردىڭ كورمەسى مەن كيىزدەن بۇيىم دايىنداۋ، كادەسىيلار جاساۋدان شەبەرلىك سىنىپتارى وتكىزىلدى.