قازاقستان مەن وزبەكستان ارمياسى بىرلەسكەن وقۋ-جاتتىعۋ وتكىزدى
بۇل تۋرالى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
جاتتىعۋلار كەزىندە قازاقستان مەن وزبەكستاننىڭ ارنايى وپەراتسيالىق كۇشتەرىنىڭ بولىمشەلەرى تۇنگى ۋاقىتتا بارلاۋ جانە جاۋىنگەرلىك وپەراتسيالاردى جۇرگىزۋ بويىنشا تاپسىرمالاردى ورىندادى.
«قازاقستان مەن وزبەكستان قارۋلى كۇشتەرىنىڭ ارنايى وپەراتسيالىق كۇشتەرى بولىمشەلەرىنە جۇكتەلگەن تاپسىرمالار ءساتتى وراندالىپ، بىرلەسكەن وقۋ-جاتتىعۋدىڭ ءبىرىنشى كەزەڭىنىڭ ماقساتتارىنا قول جەتكىزىلدى. جاتتىعۋدىڭ ەكىنشى كەزەڭى وزبەكستان رەسپۋبليكاسىنىڭ «فوريش» وقۋ ورتالىعى بازاسىندا جوسپارلانعان. ساپار بارىسىندا كوپتەگەن ماسەلەلەردى شەشكەنىمىزدى اتاپ وتكىم كەلەدى. ءبىزدىڭ پرەزيدەنتىمىز، جوعارعى باس قولباسشىمىزدىڭ قويعان مىندەتتەرى اياسىنداعى ماسەلەلەردى تالقىلادىق. جەدەل جاۋىنگەرلىك دايارلىق پەن كادرلاردى دايىنداۋ ماسەلەلەرىن شەشۋدە تولىق تۇسىنىستىك پەن ۇيلەسىمدىلىككە قول جەتكىزدىك»، - دەپ اتاپ ءوتتى ق ر قورعانىس ءمينيسترى س. جاسۇزاقوۆ.
ءوز كەزەگىندە، وزبەكستان اسكەري ۆەدومستۆوسىنىڭ باستىعى ا. ازيزوۆ ارىپتەسىنە جىلى قابىلداعانى ءۇشىن العىس ايتىپ، تۇراقتى كەزدەسۋلەر وتكىزۋدىڭ ەكى ارميا اراسىنداعى قارىم-قاتىناسقا جوعارى سەرپىن بەرەتىنىن اتاپ ءوتتى.