رەسەيدىڭ تۇمەن وبلىسىندا قازاقتاردىڭ قۇرىلتايى ءوتتى

 استانا. قازاقپارات - كورشى ەلدە تۇراتىن قانداستارىمىز بۇل جولى گولىشمانوۆو ەلدى مەكەنىندە باس قوسىپ، ءدۇبىرلى توي- دۋمان ۇيىمداستىردى. ءداستۇرلى مەرەكەدە قازاق حالقىنىڭ سالت- ءداستۇرى دارىپتەلىپ، ادەت- عۇرپى اسپەتتەلدى.

 القالى جيىنعا قازاقستاننان دا ارنايى دەلەگاتسيا باردى. جىلىنا ءبىر رەت وتەتىن قۇرىلتايعا 5 مىڭنان استام ادام قاتىستى. جەر- جەردەن جينالعان جۇرت ءبىر- بىرىمەن كورىسىپ، ارقا- جارقا بولدى. اشىق اسپان استىندا ونداعان كيىز ءۇي تىگىلىپ، ءان مەن جىردان شاشۋ شاشىلدى.

شارانىڭ كورىگىن ۇلتتىق ويىندار قىزدىردى. جاۋىرىنى جەرگە تيمەگەن بالۋاندار بوز كىلەمدە كۇش سىناسسا، شاباندوزدار دالانى دۇبىرگە بولەدى.

ەسەنعالي ىبىرايەۆ، ر ف، تۇمەن وبلىسى قازاقتارى ۇلتتىق- مادەني اۆتونومياسىنىڭ پرەزيدەنتى:

- بيىل قۇرىلتاي ەكىنشى اينالىمعا شىقتى. ويتكەنى ەڭ ءبىرىنشى مەرەكە وسى گولىشمانوۆو ەلدى مەكەنىندە وتكەن. بۇل اۋداندا قازاق كوپ، شامامەن 1 مىڭ 300 ادام تۇرادى. توي- دۋمان قازاقستان مەن رەسەي ەلدەرىنىڭ ىنتىماقتاستىعى اياسىندا ۇيىمداستىرىلادى.

www.24.kz