الماتىنىڭ اپتابى اق ايۋلار مەن لامالارعا قيىن تيۋدە
قالالىق حايۋاناتتار باعىندا اۆستراليادان مۇزدى مۇحيتقا دەيىنگى ارالىقتى مەكەندەيتىن، الەمنىڭ بارلىق كليماتتىق زوناسىنان جينالعان جانۋارلار بار.
«بۇلاردىڭ اراسىندا تەك انتاركتيدا فاۋناسىنىڭ وكىلدەرى عانا جوق. ارينە ورتالىق ازيانىڭ شۇعىل- كونتينەنتالدى كليماتى بارلىعىنا بىردەي جاعا بەرمەيدى. اسىرەسە وسى جاز ماۋسىمى قالىڭ ءجۇندى اق ايۋ مەن قوداسقا وڭاي بولماي تۇر. اق ايۋ مۇنداي اۋا رايىنا مۇلدە بەيىمدەلمەگەن. وعان تۋندرانىڭ وزىندە جاز ايلارىن وتكىزۋ قيىنعا سوعادى. ونىڭ مەكەنى اركتيكانىڭ شەتسىز مۇز ايدىنى. بيىك قارلى تاۋلاردى مەكەندەيتىن قوداستار ءۇشىن دە دالا تابيعاتى قولايسىز. لامالار اند تاۋلارىنىڭ ەتەگىن مەكەن ەتەدى»، - دەدى الماتى زووباعىنىڭ قىزمەتكەرى ميحايل سوروكوۋموۆ.
مۇنداي كليمات كەزىندە تەك تيان- شان قوڭىر ايۋى مەن دالا قاسقىرلارى سياقتى جانۋرالار ءوزىن جايلى سەزىنەدى.
«ءوز وتانىندا كەز كەلگەن جانۋار اۋا رايىنىڭ نورمادان اۋىتقۋشىلىعىنا توزە الادى. ال بۇعان باسقا كليماتتا شىدامدىلىق تانىتۋ قيىنىراق. ونىڭ ۇستىنە بيىلعى قىس قاتتى بولىپ، كوكتەمدە اسپان نوسەردەن اشىلمادى. جازدا تال تۇستەگى قاپىرىقتان قورعانۋ ءۇشىن قىزمەتكەرلەر توردا ىشۋگە ارنالعان سۋدىڭ، كولەڭكەنىڭ بولۋىن ءجىتى قاداعالايدى. كەيدە اپتاپ ىستىقتا كەيبىر جانۋارلارعا مۇزداتىلعان جەمىستەر، ەت نەمەسە بالىق دايىندالادى»، - دەدى ميحايل سوروكوۋموۆ.
حايۋاناتتار باعىنىڭ قىزمەتكەرلەرىنىڭ ايتۋىنشا، مۇنداي جاعدايدا قاجەت بولىپ جاتسا جانۋارلارعا كومەككە ۆەتەرينارلار كەلەدى.
فوتو: ميحايل سوروكوۋموۆ
اۆتور: ارايلىم جولداسباي