ەلباسى ۇلتتىق بانك ءتوراعاسىنا ءبىرقاتار ناقتى تاپسىرما بەردى

استانا. قازاقپارات - مەملەكەت باسشىسى ۇلتتىق بانك ءتوراعاسى دانيار اقىشيەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

كەزدەسۋ بارىسىندا نۇرسۇلتان نازاربايەۆقا ۇلتتىق بانكتىڭ ءبىرىنشى جارتى جىلدىقتا اتقارعان جۇمىستارىنىڭ قورىتىندىلارى جونىندە ەسەپ بەرىلدى.

قازاقستان پرەزيدەنتى قازىرگى ۋاقىتتا ۆاليۋتا- قارجى نارىعىنداعى تۇراقتىلىقتى ساقتاۋ جانە ەكونوميكانى ءارى قاراي دامىتۋ ءۇشىن ەلىمىزدە قاجەتتى جاعداي جاسالعانىن اتاپ ءوتتى.

 «قازىر بىزدە ۇلتتىق ۆاليۋتا مەن ەكونوميكانىڭ تۇراقتىلىعىن قامتاماسىز ەتۋ ءۇشىن مۇمكىندىكتەر بار. ءبىرىنشى جارتى جىلدىقتا ەكونوميكا 4 پايىزدان استام ءوستى. قۇبىلمالى باعامعا كوشكەنىمىز دۇرىس بولدى. بەلگىلى ءبىر دەڭگەيدە اۋىتقۋلاردىڭ بولاتىنىنا ۇيرەنۋ كەرەك. بۇل تۇرعىنداردىڭ ءال- اۋقاتىنا اسەر ەتپەيدى»، - دەدى نۇرسۇلتان نازاربايەۆ.

قازاقستان پرەزيدەنتى بانك سەكتورىن ساۋىقتىرۋ ءۇشىن قابىلدانعان شارالار جونىندە ايتتى.

«مەملەكەت تاراپىنان بانكتەرگە ايتارلىقتاي كومەك كورسەتىلدى. بانك جۇيەسىن قولداۋ ماقساتىمەن ءۇش تريلليون تەڭگە ءبولىندى. سونىمەن قاتار، ۆاليۋتالىق رەتتەۋ جانە ۇلتتىق بانكتىڭ قىزمەتىن جەتىلدىرۋ ماسەلەلەرى جونىندەگى زاڭنامانى قايتا قارادىق. سوندىقتان، بانكتەردىڭ ەكونوميكاعا، سونىڭ ىشىندە شاعىن جانە ورتا بيزنەس سالاسىنا نەسيە بەرۋ جۇمىسىن جانداندىرۋ قاجەت»، - دەدى نۇرسۇلتان نازاربايەۆ.

مەملەكەت باسشىسى تۇرعىنداردىڭ سالىمدارىن ادال جۇمىس ىستەمەيتىن اكسيونەرلەردىڭ الاياقتىق ارەكەتتەرىنەن قورعاۋ ماقساتىمەن ۇلتتىق بانك ءتوراعاسىنىڭ نازارىن بانك سەكتورىنىڭ جۇمىسىن رەتكە كەلتىرۋ قاجەتتىگىنە اۋداردى.

د. اقىشيەۆتىڭ مالىمەتىنە سايكەس، نەگىزگى كورسەتكىشتەر بويىنشا، ەلىمىزدىڭ قارجى نارىعىندا تۇراقتى جاعداي قالىپتاسىپ وتىر.

«2018 -جىلعى ماۋسىم ايىنىڭ قورىتىندىسى بويىنشا ينفلياتسيانىڭ جىلدىق كورسەتكىشى 5,9 پايىزدى قۇرادى. بۇل - سوڭعى ءۇش جىل ىشىندەگى ەڭ تومەنگى كورسەتكىش. ۇلتتىق بانك ينفلياتسيا دەڭگەيىن 2020 -جىلعا قاراي 4 پايىزعا دەيىن تومەندەتۋدى كوزدەپ وتىر»، - دەدى ۇلتتىق بانك ءتوراعاسى.

د. اقىشيەۆ نۇرسۇلتان نازاربايەۆقا ۇلتتىق ۆاليۋتا باعامىنىڭ وزگەرۋىنە اسەر ەتەتىن نەگىزگى فاكتورلار جونىندە باياندادى.

«تەڭگە باعامىنىڭ وزگەرۋىنە اسەر ەتەتىن نەگىزگى فاكتور - قازاقستاننىڭ ساۋدا- ەكونوميكالىق نارىعىنداعى ۆاليۋتالىق- قارجىلىق جاعداي. ەكىنشى فاكتور - باسقا ۆاليۋتالارعا قاتىستى دوللاردىڭ بۇكىل الەم بويىنشا نىعايۋى. بۇل ورايدا، كاسىپورىندار مەن تۇرعىنداردىڭ مۇنداي قۇبىلمالى باعامعا بەيىمدەلگەنىن اتاپ ءوتۋ كەرەك. جالپى، ەلىمىزدە شەتەلدىك ۆاليۋتاعا دەگەن سۇرانىستىڭ تومەندەگەنى بايقالىپ وتىر»، - دەدى ۇلتتىق بانك ءتوراعاسى.

كەزدەسۋ سوڭىندا مەملەكەت باسشىسى ءبىرقاتار ناقتى تاپسىرما بەردى.