اقتوبە وبلىسىن تۇيەقۇستار جەرسىنىپ كەتە المادى

اقتوبە. قازاقپارات - اقتوبە وبلىسىندا تۇيەقۇستاردى اسىرۋعا ارنالعان بىردەن- ءبىر فەرما جابىلىپ قالدى، دەپ حابارلايدى قازاقپارات ءتىلشىسى.

«2016 -جىلى قوبدا اۋدانىندا تۇيەقۇستاردى اسىراۋعا ارنالعان فەرما اشىلعان بولاتىن. الايدا اتالعان قۇستاردىڭ ءتۇرى ءبىزدىڭ كليماتقا بوي ۇيرەتىپ كەتە المادى. ولاردى ارى قاراي ۇستاۋ تيىمدى ەمەس. قازىرگى تاڭدا اۋىل شارۋاشىلىعىنىڭ ءداستۇرلى ەمەس تۇرلەرىنىڭ باسقا دا سالالارى دامۋ ۇستىندە»، - دەيدى وبلىستىق اۋىل شارۋاشىلىعى باسقارماسى مال شارۋاشىلىعى ءبولىمىنىڭ باسشىسى پانابەك بيمۇراتوۆ.

اقتوبە وبلىسى ءۇشىن اۋىل شارۋاشىلىعىنىڭ ءداستۇرلى تۇرلەرىنە ءمۇيىزدى ءىرى قارا مەن ۇساق مالدى ءوسىرۋ جاتادى.

وبلىس اكىمى بەردىكبەك ساپاربايەۆتىڭ تاپسىرماسىمەن اۋىل تۇرعىندارىنىڭ اراسىندا ءداستۇرلى ەمەس مال شارۋاشىلىعىنىڭ تۇرلەرىن دامىتۋ جۇمىستارى جۇرگىزىلۋدە.

«اۋىل حالقى ءداستۇرلى ەمەس مال شارۋاشىلىعىنىڭ تۇرلەرىن بەلسەندى تۇردە يگەرۋ ۇستىندە. ياعني، ءسۇتى ساۋىلاتىن ەشكى، ارا، قويان، بودەنە، ۇيرەك پەن قاز ءوسىرىپ جاتىر. البەتتە، شىنىنا كەلگەندە بۇل تابىسى مول باعىت. ونى جولعا قويۋ ءۇشىن اسا ۇلكەن جايىلىم نەمەسە اقشالاي شىعىننىڭ قاجەتى جوق. ونىڭ ۇستىنە مەملەكەت تاراپىنان دا ولاردى قولعا العاندارعا جەڭىلدەتىلگەن نەسيە بەرىپ وتىر. مىسالى، قويانداردى ءوز ۇيىڭىزدە تور ىشىندە اسىراي الاسىز. وبلىس باسشىسىنىڭ تاپسىرماسىنا سايكەس، ءبىز بيىل ءدال سونداي 40 شارۋا قوجالىق اشۋىمىز كەرەك بولاتىن. قازىرگە دەيىن ولاردىڭ 75- ءى اشىلىپ قويدى. مەنىڭ ويىمشا، كوپتەگەن ادامدار ءداستۇرلى ەمەس شارۋاشىلىقتاردىڭ پايداسىن ەندى ءتۇيسىنىپ كەلە جاتقان سەكىلدى»، - دەيدى پانابەك بيمۇراتوۆ.

ماسەلەن، ومارتا شارۋاشىلىعى العا، مارتوك، ويىل اۋداندارى مەن اقتوبە قالاسىندا جولعا قويىلعان. وڭىردەگى اۋىلداردىڭ تۇرعىندارى ساۋىلاتىن ەشكىلەردىڭ دە سانىن 700-گە جەتكىزگەن. ەشكى ءسۇتىن ءوندىرۋشى شارۋاشىلىقتاردىڭ ەڭ ءىرىسى العىس اۋىلدىق وكرۋگىندەگى «شەكشەك اتا» كووپەراتيۆى بولىپ تابىلادى. ول جەردە سۇتتەن بولەك، ىرىمشىك پەن سۇزبە وندىرىلەدى.

جالپى، اقتوبە اۋدانىندا ءداستۇرلى ەمەس مال شارۋاشىلىعىمەن اينالىساتىن 263 شارۋا قوجالىق بار.

اۋدارما: ايان بەكەن ۇلى